೪. ಸುಜಾತಾಥೇರೀಗಾಥಾವಣ್ಣನಾ

ಅಲಙ್ಕತಾ ಸುವಸನಾತಿಆದಿಕಾ ಸುಜಾತಾಯ ಥೇರಿಯಾ ಗಾಥಾ. ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ ಅನುಕ್ಕಮೇನ ಸಮ್ಭತವಿಮೋಕ್ಖಸಮ್ಭಾರಾ ಹುತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾಕೇತನಗರೇ ಸೇಟ್ಠಿಕುಲೇ ನಿಬ್ಬತ್ತಿತ್ವಾ ವಯಪ್ಪತ್ತಾ ಮಾತಾಪಿತೂಹಿ ಸಮಾನಜಾತಿಕಸ್ಸ ಸೇಟ್ಠಿಪುತ್ತಸ್ಸ ದಿನ್ನಾ ಹುತ್ವಾ ಪತಿಕುಲಂ ಗತಾ. ತತ್ಥ ತೇನ ಸದ್ಧಿಂ ಸುಖಸಂವಾಸಂ ವಸನ್ತೀ ಏಕದಿವಸಂ ಉಯ್ಯಾನಂ ಗನ್ತ್ವಾ ನಕ್ಖತ್ತಕೀಳಂ ಕೀಳಿತ್ವಾ ಪರಿಜನೇನ ಸದ್ಧಿಂ ನಗರಂ ಆಗಚ್ಛನ್ತೀ ಅಞ್ಜನವನೇ ಸತ್ಥಾರಂ ದಿಸ್ವಾ ಪಸನ್ನಮಾನಸಾ ಉಪಸಙ್ಕಮಿತ್ವಾ ವನ್ದಿತ್ವಾ ಏಕಮನ್ತಂ ನಿಸೀದಿ. ಸತ್ಥಾ ತಸ್ಸಾ ಅನುಪುಬ್ಬಿಂ ಕಥಂ ಕಥೇತ್ವಾ ಕಲ್ಲಚಿತ್ತತಂ ಞತ್ವಾ ಉಪರಿ ಸಾಮುಕ್ಕಂಸಿಕಂ ಧಮ್ಮದೇಸನಂ ಪಕಾಸೇಸಿ. ಸಾ ದೇಸನಾವಸಾನೇ ಅತ್ತನೋ ಕತಾಧಿಕಾರತಾಯ ಞಾಣಸ್ಸ ಪರಿಪಾಕಂ ಗತತ್ತಾ ಚ, ಸತ್ಥು ಚ ದೇಸನಾವಿಲಾಸೇನ ಯಥಾನಿಸಿನ್ನಾವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಸತ್ಥಾರಂ ವನ್ದಿತ್ವಾ ಗೇಹಂ ಗನ್ತ್ವಾ ಸಾಮಿಕಞ್ಚ ಮಾತಾಪಿತರೋ ಚ ಅನುಜಾನಾಪೇತ್ವಾ ಸತ್ಥುಆಣಾಯ ಭಿಕ್ಖುನುಪಸ್ಸಯಂ ಗನ್ತ್ವಾ ಭಿಕ್ಖುನೀನಂ ಸನ್ತಿಕೇ ಪಬ್ಬಜಿ. ಪಬ್ಬಜಿತ್ವಾ ಚ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಉದಾನವಸೇನ –

೧೪೫. ‘‘ಅಲಙ್ಕತಾ ಸುವಸನಾ, ಮಾಲಿನೀ ಚನ್ದನೋಕ್ಖಿತಾ;

ಸಬ್ಬಾಭರಣಸಞ್ಛನ್ನಾ, ದಾಸೀಗಣಪುರಕ್ಖತಾ.

೧೪೬. ‘‘ಅನ್ನಂ ಪಾನಞ್ಚ ಆದಾಯ, ಖಜ್ಜಂ ಭೋಜ್ಜಂ ಅನಪ್ಪಕಂ;

ಗೇಹತೋ ನಿಕ್ಖಮಿತ್ವಾನ, ಉಯ್ಯಾನಮಭಿಹಾರಯಿಂ.

೧೪೭. ‘‘ತತ್ಥ ರಮಿತ್ವಾ ಕೀಳಿತ್ವಾ, ಆಗಚ್ಛನ್ತೀ ಸಕಂ ಘರಂ;

ವಿಹಾರಂ ದಟ್ಠುಂ ಪಾವಿಸಿಂ, ಸಾಕೇತೇ ಅಞ್ಜನಂ ವನಂ.

೧೪೮. ‘‘ದಿಸ್ವಾನ ಲೋಕಪಜ್ಜೋತಂ, ವನ್ದಿತ್ವಾನ ಉಪಾವಿಸಿಂ;

ಸೋ ಮೇ ಧಮ್ಮಮದೇಸೇಸಿ, ಅನುಕಮ್ಪಾಯ ಚಕ್ಖುಮಾ.

೧೪೯. ‘‘ಸುತ್ವಾ ಚ ಖೋ ಮಹೇಸಿಸ್ಸ, ಸಚ್ಚಂ ಸಮ್ಪಟಿವಿಜ್ಝಹಂ;

ತತ್ಥೇವ ವಿರಜಂ ಧಮ್ಮಂ, ಫುಸಯಿಂ ಅಮತಂ ಪದಂ.

೧೫೦. ‘‘ತತೋ ವಿಞ್ಞಾತಸದ್ಧಮ್ಮಾ, ಪಬ್ಬಜಿಂ ಅನಗಾರಿಯಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಅಮೋಘಂ ಬುದ್ಧಸಾಸನ’’ನ್ತಿ. –

ಇಮಾ ಗಾಥಾ ಅಭಾಸಿ.

ತತ್ಥ ಅಲಙ್ಕತಾತಿ ವಿಭೂಸಿತಾ. ತಂ ಪನ ಅಲಙ್ಕತಾಕಾರಂ ದಸ್ಸೇತುಂ ‘‘ಸುವಸನಾ ಮಾಲಿನೀ ಚನ್ದನೋಕ್ಖಿತಾ’’ತಿ ವುತ್ತಂ. ತತ್ಥ ಮಾಲಿನೀತಿ ಮಾಲಾಧಾರಿನೀ. ಚನ್ದನೋಕ್ಖಿತಾತಿ ಚನ್ದನಾನುಲಿತ್ತಾ. ಸಬ್ಬಾಭರಣಸಞ್ಛನ್ನಾತಿ ಹತ್ಥೂಪಗಾದೀಹಿ ಸಬ್ಬೇಹಿ ಆಭರಣೇಹಿ ಅಲಙ್ಕಾರವಸೇನ ಸಞ್ಛಾದಿತಸರೀರಾ.

ಅನ್ನಂ ಪಾನಞ್ಚ ಆದಾಯ, ಖಜ್ಜಂ ಭೋಜ್ಜಂ ಅನಪ್ಪಕನ್ತಿ ಸಾಲಿಓದನಾದಿಅನ್ನಂ, ಅಮ್ಬಪಾನಾದಿಪಾನಂ, ಪಿಟ್ಠಖಾದನೀಯಾದಿಖಜ್ಜಂ, ಅವಸಿಟ್ಠಂ ಆಹಾರಸಙ್ಖಾತಂ ಭೋಜ್ಜಞ್ಚ ಪಹೂತಂ ಗಹೇತ್ವಾ. ಉಯ್ಯಾನಮಭಿಹಾರಯಿನ್ತಿ ನಕ್ಖತ್ತಕೀಳಾವಸೇನ ಉಯ್ಯಾನಂ ಉಪನೇಸಿಂ. ಅನ್ನಪಾನಾದಿಂ ತತ್ಥ ಆನೇತ್ವಾ ಸಹ ಪರಿಜನೇನ ಕೀಳನ್ತೀ ರಮನ್ತೀ ಪರಿಚಾರೇಸಿನ್ತಿ ಅಧಿಪ್ಪಾಯೋ.

ಸಾಕೇತೇ ಅಞ್ಜನಂ ವನನ್ತಿ ಸಾಕೇತಸಮೀಪೇ ಅಞ್ಜನವನೇ ವಿಹಾರಂ ಪಾವಿಸಿಂ.

ಲೋಕಪಜ್ಜೋತನ್ತಿ ಞಾಣಪಜ್ಜೋತೇನ ಲೋಕಸ್ಸ ಪಜ್ಜೋತಭೂತಂ.

ಫುಸಯಿನ್ತಿ ಫುಸಿಂ, ಅಧಿಗಚ್ಛಿನ್ತಿ ಅತ್ಥೋ. ಸೇಸಂ ವುತ್ತನಯಮೇವ.

ಸುಜಾತಾಥೇರೀಗಾಥಾವಣ್ಣನಾ ನಿಟ್ಠಿತಾ.