೮. ಸೋಣಾಥೇರೀಗಾಥಾವಣ್ಣನಾ

ದಸ ಪುತ್ತೇ ವಿಜಾಯಿತ್ವಾತಿಆದಿಕಾ ಸೋಣಾಯ ಥೇರಿಯಾ ಗಾಥಾ. ಅಯಮ್ಪಿ ಪದುಮುತ್ತರಸ್ಸ ಭಗವತೋ ಕಾಲೇ ಹಂಸವತೀನಗರೇ ಕುಲಗೇಹೇ ನಿಬ್ಬತ್ತಿತ್ವಾ ವಿಞ್ಞುತಂ ಪತ್ವಾ ಏಕದಿವಸಂ ಸತ್ಥು ಸನ್ತಿಕೇ ಧಮ್ಮಂ ಸುಣನ್ತೀ ಸತ್ಥಾರಂ ಏಕಂ ಭಿಕ್ಖುನಿಂ ಆರದ್ಧವೀರಿಯಾನಂ ಭಿಕ್ಖುನೀನಂ ಅಗ್ಗಟ್ಠಾನೇ ಠಪೇನ್ತಂ ದಿಸ್ವಾ, ಅಧಿಕಾರಕಮ್ಮಂ ಕತ್ವಾ ಸಯಮ್ಪಿ ತಂ ಠಾನನ್ತರಂ ಪತ್ಥೇತ್ವಾ ಯಾವಜೀವಂ ಪುಞ್ಞಾನಿ ಕತ್ವಾ, ತತೋ ಚುತಾ ಕಪ್ಪಸತಸಹಸ್ಸಂ ದೇವಮನುಸ್ಸೇಸು ಸಂಸರಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಕುಲಗೇಹೇ ನಿಬ್ಬತ್ತಿತ್ವಾ ವಯಪ್ಪತ್ತಾ ಪತಿಕುಲಂ ಗತಾ ದಸ ಪುತ್ತಧೀತರೋ ಲಭಿತ್ವಾ ಬಹುಪುತ್ತಿಕಾತಿ ಪಞ್ಞಾಯಿತ್ಥ. ಸಾ ಸಾಮಿಕೇ ಪಬ್ಬಜಿತೇ ವಯಪ್ಪತ್ತೇ ಪುತ್ತಧೀತರೋ ಘರಾವಾಸೇ ಪತಿಟ್ಠಾಪೇತ್ವಾ ಸಬ್ಬಂ ಧನಂ ಪುತ್ತಾನಂ ವಿಭಜಿತ್ವಾ ಅದಾಸಿ, ನ ಕಿಞ್ಚಿ ಅತ್ತನೋ ಠಪೇಸಿ. ತಂ ಪುತ್ತಾ ಚ ಧೀತರೋ ಚ ಕತಿಪಾಹಮೇವ ಉಪಟ್ಠಹಿತ್ವಾ ಪರಿಭವಂ ಅಕಂಸು. ಸಾ ‘‘ಕಿಂ ಮಯ್ಹಂ ಇಮೇಹಿ ಪರಿಭವಾಯ ಘರೇ ವಸನ್ತಿಯಾ’’ತಿ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿ. ತಂ ಭಿಕ್ಖುನಿಯೋ ಪಬ್ಬಾಜೇಸುಂ. ಸಾ ಲದ್ಧೂಪಸಮ್ಪದಾ ‘‘ಅಹಂ ಮಹಲ್ಲಿಕಾಕಾಲೇ ಪಬ್ಬಜಿತ್ವಾ ಅಪ್ಪಮತ್ತಾಯ ಭವಿತಬ್ಬ’’ನ್ತಿ ಭಿಕ್ಖುನೀನಂ ವತ್ತಪಟಿವತ್ತಂ ಕರೋನ್ತೀ ‘‘ಸಬ್ಬರತ್ತಿಂ ಸಮಣಧಮ್ಮಂ ಕರಿಸ್ಸಾಮೀ’’ತಿ ಹೇಟ್ಠಾಪಾಸಾದೇ ಏಕಥಮ್ಭಂ ಹತ್ಥೇನ ಗಹೇತ್ವಾ ತಂ ಅವಿಜಹಮಾನಾ ಸಮಣಧಮ್ಮಂ ಕರೋನ್ತೀ ಚಙ್ಕಮಮಾನಾಪಿ ‘‘ಅನ್ಧಕಾರೇ ಠಾನೇ ರುಕ್ಖಾದೀಸು ಯತ್ಥ ಕತ್ಥಚಿ ಮೇ ಸೀಸಂ ಪಟಿಹಞ್ಞೇಯ್ಯಾ’’ತಿ ರುಕ್ಖಂ ಹತ್ಥೇನ ಗಹೇತ್ವಾ ತಂ ಅವಿಜಹಮಾನಾವ ಸಮಣಧಮ್ಮಂ ಕರೋತಿ. ತತೋ ಪಟ್ಠಾಯ ಸಾ ಆರದ್ಧವೀರಿಯತಾಯ ಪಾಕಟಾ ಅಹೋಸಿ. ಸತ್ಥಾ ತಸ್ಸಾ ಞಾಣಪರಿಪಾಕಂ ದಿಸ್ವಾ ಗನ್ಧಕುಟಿಯಂ ನಿಸಿನ್ನೋವ ಓಭಾಸಂ ಫರಿತ್ವಾ ಸಮ್ಮುಖೇ ನಿಸಿನ್ನೋ ವಿಯ ಅತ್ತಾನಂ ದಸ್ಸೇತ್ವಾ –

‘‘ಯೋ ಚ ವಸ್ಸಸತಂ ಜೀವೇ, ಅಪಸ್ಸಂ ಧಮ್ಮಮುತ್ತಮಂ;

ಏಕಾಹಂ ಜೀವಿತಂ ಸೇಯ್ಯೋ, ಪಸ್ಸತೋ ಧಮ್ಮಮುತ್ತಮ’’ನ್ತಿ. (ಧ. ಪ. ೧೧೫) –

ಗಾಥಂ ಅಭಾಸಿ. ಸಾ ಗಾಥಾಪರಿಯೋಸಾನೇ ಅರಹತ್ತಂ ಪಾಪುಣಿ. ತೇನ ವುತ್ತಂ ಅಪದಾನೇ (ಅಪ. ಥೇರೀ ೨.೩.೨೨೦-೨೪೩) –

‘‘ಪದುಮುತ್ತರೋ ನಾಮ ಜಿನೋ, ಸಬ್ಬಧಮ್ಮಾನ ಪಾರಗೂ;

ಇತೋ ಸತಸಹಸ್ಸಮ್ಹಿ, ಕಪ್ಪೇ ಉಪ್ಪಜ್ಜಿ ನಾಯಕೋ.

‘‘ತದಾ ಸೇಟ್ಠಿಕುಲೇ ಜಾತಾ, ಸುಖಿತಾ ಪೂಜಿತಾ ಪಿಯಾ;

ಉಪೇತ್ವಾ ತಂ ಮುನಿವರಂ, ಅಸ್ಸೋಸಿಂ ಮಧುರಂ ವಚಂ.

‘‘ಆರದ್ಧವೀರಿಯಾನಗ್ಗಂ, ವಣ್ಣೇಸಿ ಭಿಕ್ಖುನಿಂ ಜಿನೋ;

ತಂ ಸುತ್ವಾ ಮುದಿತಾ ಹುತ್ವಾ, ಕಾರಂ ಕತ್ವಾನ ಸತ್ಥುನೋ.

‘‘ಅಭಿವಾದಿಯ ಸಮ್ಬುದ್ಧಂ, ಠಾನಂ ತಂ ಪತ್ಥಯಿಂ ತದಾ;

ಅನುಮೋದಿ ಮಹಾವೀರೋ, ಸಿಜ್ಝತಂ ಪಣಿಧೀ ತವ.

‘‘ಸತಸಹಸ್ಸಿತೋ ಕಪ್ಪೇ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

‘‘ತಸ್ಸ ಧಮ್ಮೇಸು ದಾಯಾದಾ, ಓರಸಾ ಧಮ್ಮನಿಮ್ಮಿತಾ;

ಸೋಣಾತಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಿಕಾ.

‘‘ತಂ ಸುತ್ವಾ ಮುದಿತಾ ಹುತ್ವಾ, ಯಾವಜೀವಂ ತದಾ ಜಿನಂ;

ಮೇತ್ತಚಿತ್ತಾ ಪರಿಚರಿಂ, ಪಚ್ಚಯೇಹಿ ವಿನಾಯಕಂ.

‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಚ್ಛಹಂ.

‘‘ಪಚ್ಛಿಮೇ ಚ ಭವೇ ದಾನಿ, ಜಾತಾ ಸೇಟ್ಠಿಕುಲೇ ಅಹಂ;

ಸಾವತ್ಥಿಯಂ ಪುರವರೇ, ಇದ್ಧೇ ಫೀತೇ ಮಹದ್ಧನೇ.

‘‘ಯದಾ ಚ ಯೋಬ್ಬನಪ್ಪತ್ತಾ, ಗನ್ತ್ವಾ ಪತಿಕುಲಂ ಅಹಂ;

ದಸ ಪುತ್ತಾನಿ ಅಜನಿಂ, ಸುರೂಪಾನಿ ವಿಸೇಸತೋ.

‘‘ಸುಖೇಧಿತಾ ಚ ತೇ ಸಬ್ಬೇ, ಜನನೇತ್ತಮನೋಹರಾ;

ಅಮಿತ್ತಾನಮ್ಪಿ ರುಚಿತಾ, ಮಮ ಪಗೇವ ತೇ ಸಿಯಾ.

‘‘ತತೋ ಮಯ್ಹಂ ಅಕಾಮಾಯ, ದಸಪುತ್ತಪುರಕ್ಖತೋ;

ಪಬ್ಬಜಿತ್ಥ ಸ ಮೇ ಭತ್ತಾ, ದೇವದೇವಸ್ಸ ಸಾಸನೇ.

‘‘ತದೇಕಿಕಾ ವಿಚಿನ್ತೇಸಿಂ, ಜೀವಿತೇನಾಲಮತ್ಥು ಮೇ;

ಚತ್ತಾಯ ಪತಿಪುತ್ತೇಹಿ, ವುಡ್ಢಾಯ ಚ ವರಾಕಿಯಾ.

‘‘ಅಹಮ್ಪಿ ತತ್ಥ ಗಚ್ಛಿಸ್ಸಂ, ಸಮ್ಪತ್ತೋ ಯತ್ಥ ಮೇ ಪತಿ;

ಏವಾಹಂ ಚಿನ್ತಯಿತ್ವಾನ, ಪಬ್ಬಜಿಂ ಅನಗಾರಿಯಂ.

‘‘ತತೋ ಚ ಮಂ ಭಿಕ್ಖುನಿಯೋ, ಏಕಂ ಭಿಕ್ಖುನುಪಸ್ಸಯೇ;

ವಿಹಾಯ ಗಚ್ಛುಮೋವಾದಂ, ತಾಪೇಹಿ ಉದಕಂ ಇತಿ.

‘‘ತದಾ ಉದಕಮಾಹಿತ್ವಾ, ಓಕಿರಿತ್ವಾನ ಕುಮ್ಭಿಯಾ;

ಚುಲ್ಲೇ ಠಪೇತ್ವಾ ಆಸೀನಾ, ತತೋ ಚಿತ್ತಂ ಸಮಾದಹಿಂ.

‘‘ಖನ್ಧೇ ಅನಿಚ್ಚತೋ ದಿಸ್ವಾ, ದುಕ್ಖತೋ ಚ ಅನತ್ತತೋ;

ಖೇಪೇತ್ವಾ ಆಸವೇ ಸಬ್ಬೇ, ಅರಹತ್ತಮಪಾಪುಣಿಂ.

‘‘ತದಾಗನ್ತ್ವಾ ಭಿಕ್ಖುನಿಯೋ, ಉಣ್ಹೋದಕಮಪುಚ್ಛಿಸುಂ;

ತೇಜೋಧಾತುಮಧಿಟ್ಠಾಯ, ಖಿಪ್ಪಂ ಸನ್ತಾಪಯಿಂ ಜಲಂ.

‘‘ವಿಮ್ಹಿತಾ ತಾ ಜಿನವರಂ, ಏತಮತ್ಥಮಸಾವಯುಂ;

ತಂ ಸುತ್ವಾ ಮುದಿತೋ ನಾಥೋ, ಇಮಂ ಗಾಥಂ ಅಭಾಸಥ.

‘‘ಯೋ ಚ ವಸ್ಸಸತಂ ಜೀವೇ, ಕುಸೀತೋ ಹೀನವೀರಿಯೋ;

ಏಕಾಹಂ ಜೀವಿತಂ ಸೇಯ್ಯೋ, ವೀರಿಯಮಾರಭತೋ ದಳ್ಹಂ.

‘‘ಆರಾಧಿತೋ ಮಹಾವೀರೋ, ಮಯಾ ಸುಪ್ಪಟಿಪತ್ತಿಯಾ;

ಆರದ್ಧವೀರಿಯಾನಗ್ಗಂ, ಮಮಾಹ ಸ ಮಹಾಮುನಿ.

‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ಕತಂ ಬುದ್ಧಸ್ಸ ಸಾಸನ’’ನ್ತಿ.

ಅಥ ನಂ ಭಗವಾ ಭಿಕ್ಖುನಿಯೋ ಪಟಿಪಾಟಿಯಾ ಠಾನನ್ತರೇ ಠಪೇನ್ತೋ ಆರದ್ಧವೀರಿಯಾನಂ ಅಗ್ಗಟ್ಠಾನೇ ಠಪೇಸಿ. ಸಾ ಏಕದಿವಸಂ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಉದಾನವಸೇನ –

೧೦೨. ‘‘ದಸ ಪುತ್ತೇ ವಿಜಾಯಿತ್ವಾ, ಅಸ್ಮಿಂ ರೂಪಸಮುಸ್ಸಯೇ;

ತತೋಹಂ ದುಬ್ಬಲಾ ಜಿಣ್ಣಾ, ಭಿಕ್ಖುನಿಂ ಉಪಸಙ್ಕಮಿಂ.

೧೦೩. ‘‘ಸಾ ಮೇ ಧಮ್ಮಮದೇಸೇಸಿ, ಖನ್ಧಾಯತನಧಾತುಯೋ;

ತಸ್ಸಾ ಧಮ್ಮಂ ಸುಣಿತ್ವಾನ, ಕೇಸೇ ಛೇತ್ವಾನ ಪಬ್ಬಜಿಂ.

೧೦೪. ‘‘ತಸ್ಸಾ ಮೇ ಸಿಕ್ಖಮಾನಾಯ, ದಿಬ್ಬಚಕ್ಖು ವಿಸೋಧಿತಂ;

ಪುಬ್ಬೇನಿವಾಸಂ ಜಾನಾಮಿ, ಯತ್ಥ ಮೇ ವುಸಿತಂ ಪುರೇ.

೧೦೫. ‘‘ಅನಿಮಿತ್ತಞ್ಚ ಭಾವೇಮಿ, ಏಕಗ್ಗಾ ಸುಸಮಾಹಿತಾ;

ಅನನ್ತರಾವಿಮೋಕ್ಖಾಸಿಂ, ಅನುಪಾದಾಯ ನಿಬ್ಬುತಾ.

೧೦೬. ‘‘ಪಞ್ಚಕ್ಖನ್ಧಾ ಪರಿಞ್ಞಾತಾ, ತಿಟ್ಠನ್ತಿ ಛಿನ್ನಮೂಲಕಾ;

ಧಿ ತವತ್ಥು ಜರೇ ಜಮ್ಮೇ, ನತ್ಥಿ ದಾನಿ ಪುನಬ್ಭವೋ’’ತಿ. – ಇಮಾ ಗಾಥಾ ಅಭಾಸಿ;

ತತ್ಥ ರೂಪಸಮುಸ್ಸಯೇತಿ ರೂಪಸಙ್ಖಾತೇ ಸಮುಸ್ಸಯೇ. ಅಯಞ್ಹಿ ರೂಪಸದ್ದೋ ‘‘ಚಕ್ಖುಞ್ಚ ಪಟಿಚ್ಚ ರೂಪೇ ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣ’’ನ್ತಿಆದೀಸು (ಸಂ. ನಿ. ೪.೬೦) ರೂಪಾಯತನೇ ಆಗತೋ. ‘‘ಯಂಕಿಞ್ಚಿ ರೂಪಂ ಅತೀತಾನಾಗತಪಚ್ಚುಪ್ಪನ್ನ’’ನ್ತಿಆದೀಸು (ಅ. ನಿ. ೪.೧೮೧) ರೂಪಕ್ಖನ್ಧೇ. ‘‘ಪಿಯರೂಪೇ ಸಾತರೂಪೇ ರಜ್ಜತೀ’’ತಿಆದೀಸು (ಮ. ನಿ. ೧.೪೦೯) ಸಭಾವೇ. ‘‘ಬಹಿದ್ಧಾ ರೂಪಾನಿ ಪಸ್ಸತೀ’’ತಿಆದೀಸು (ದೀ. ನಿ. ೩.೩೩೮; ಅ. ನಿ. ೧.೪೨೭-೪೩೪) ಕಸಿಣಾಯತನೇ. ‘‘ರೂಪೀ ರೂಪಾನಿ ಪಸ್ಸತೀ’’ತಿಆದೀಸು (ದೀ. ನಿ. ೩.೩೩೯; ಅ. ನಿ. ೧.೪೩೫-೪೪೨) ರೂಪಝಾನೇ. ‘‘ಅಟ್ಠಿಞ್ಚ ಪಟಿಚ್ಚ ನ್ಹಾರುಞ್ಚ ಪಟಿಚ್ಚ ಮಂಸಞ್ಚ ಪಟಿಚ್ಚ ಚಮ್ಮಞ್ಚ ಪಟಿಚ್ಚ ಆಕಾಸೋ ಪರಿವಾರಿತೋ ರೂಪನ್ತ್ವೇವ ಸಙ್ಖಂ ಗಚ್ಛತೀ’’ತಿಆದೀಸು (ಮ. ನಿ. ೧.೩೦೬) ರೂಪಕಾಯೇ. ಇಧಾಪಿ ರೂಪಕಾಯೇವ ದಟ್ಠಬ್ಬೋ. ಸಮುಸ್ಸಯಸದ್ದೋಪಿ ಅಟ್ಠೀನಂ ಸರೀರಸ್ಸ ಪರಿಯಾಯೋ. ‘‘ಸತನ್ತಿ ಸಮುಸ್ಸಯಾ’’ತಿಆದೀಸು ಅಟ್ಠಿಸರೀರಪರಿಯಾಯೇ. ‘‘ಆತುರಂ ಅಸುಚಿಂ ಪೂತಿಂ, ಪಸ್ಸ ನನ್ದೇ ಸಮುಸ್ಸಯ’’ನ್ತಿಆದೀಸು (ಥೇರಗಾ. ೧೯) ಸರೀರೇ. ಇಧಾಪಿ ಸರೀರೇ ಏವ ದಟ್ಠಬ್ಬೋ. ತೇನ ವುತ್ತಂ – ‘‘ರೂಪಸಮುಸ್ಸಯೇ’’ತಿ, ರೂಪಸಙ್ಖಾತೇ ಸಮುಸ್ಸಯೇ ಸರೀರೇತಿ ಅತ್ಥೋ. ಠತ್ವಾತಿ ವಚನಸೇಸೋ. ಅಸ್ಮಿಂ ರೂಪಸಮುಸ್ಸಯೇತಿ ಹಿ ಇಮಸ್ಮಿಂ ರೂಪಸಮುಸ್ಸಯೇ ಠತ್ವಾ ಇಮಂ ರೂಪಕಾಯಂ ನಿಸ್ಸಾಯ ದಸ ಪುತ್ತೇ ವಿಜಾಯಿತ್ವಾತಿ ಯೋಜನಾ. ತತೋತಿ ತಸ್ಮಾ ದಸಪುತ್ತವಿಜಾಯನಹೇತು. ಸಾ ಹಿ ಪಠಮವಯಂ ಅತಿಕ್ಕಮಿತ್ವಾ ಪುತ್ತಕೇ ವಿಜಾಯನ್ತೀ ಅನುಕ್ಕಮೇನ ದುಬ್ಬಲಸರೀರಾ ಜರಾಜಿಣ್ಣಾ ಚ ಅಹೋಸಿ. ತೇನ ವುತ್ತಂ ‘‘ತತೋಹಂ ದುಬ್ಬಲಾ ಜಿಣ್ಣಾ’’ತಿ.

ತಸ್ಸಾತಿ ತತೋ, ತಸ್ಸಾತಿ ವಾ ತಸ್ಸಾ ಸನ್ತಿಕೇ. ಪುನ ತಸ್ಸಾತಿ ಕರಣೇ ಸಾಮಿವಚನಂ, ತಾಯಾತಿ ಅತ್ಥೋ. ಸಿಕ್ಖಮಾನಾಯಾತಿ ತಿಸ್ಸೋಪಿ ಸಿಕ್ಖಾ ಸಿಕ್ಖಮಾನಾ.

ಅನನ್ತರಾವಿಮೋಕ್ಖಾಸಿನ್ತಿ ಅಗ್ಗಮಗ್ಗಸ್ಸ ಅನನ್ತರಾ ಉಪ್ಪನ್ನವಿಮೋಕ್ಖಾ ಆಸಿಂ. ರೂಪೀ ರೂಪಾನಿ ಪಸ್ಸತೀತಿಆದಯೋ ಹಿ ಅಟ್ಠಪಿ ವಿಮೋಕ್ಖಾ ಅನನ್ತರವಿಮೋಕ್ಖಾ ನಾಮ ನ ಹೋನ್ತಿ. ಮಗ್ಗಾನನ್ತರಂ ಅನುಪ್ಪತ್ತಾ ಹಿ ಫಲವಿಮೋಕ್ಖಾ ಫಲಸಮಾಪತ್ತಿಕಾಲೇ ಪವತ್ತಮಾನಾಪಿ ಪಠಮಮಗ್ಗಾನನ್ತರಮೇವ ಸಮುಪ್ಪತ್ತಿತೋ ತಂ ಉಪಾದಾಯ ಅನನ್ತರವಿಮೋಕ್ಖಾ ನಾಮ, ಯಥಾ ಮಗ್ಗಸಮಾಧಿ ಆನನ್ತರಿಕಸಮಾಧೀತಿ ವುಚ್ಚತಿ. ಅನುಪಾದಾಯ ನಿಬ್ಬುತಾತಿ ರೂಪಾದೀಸು ಕಿಞ್ಚಿಪಿ ಅಗ್ಗಹೇತ್ವಾ ಕಿಲೇಸಪರಿನಿಬ್ಬಾನೇನ ನಿಬ್ಬುತಾ ಆಸಿಂ.

ಏವಂ ವಿಜ್ಜಾತ್ತಯಂ ವಿಭಾವೇತ್ವಾ ಅರಹತ್ತಫಲೇನ ಕೂಟಂ ಗಣ್ಹನ್ತೀ ಉದಾನೇತ್ವಾ, ಇದಾನಿ ಜರಾಯ ಚಿರಕಾಲಂ ಉಪದ್ದುತಸರೀರಂ ವಿಗರಹನ್ತೀ ಸಹ ವತ್ಥುನಾ ತಸ್ಸ ಸಮತಿಕ್ಕನ್ತಭಾವಂ ವಿಭಾವೇತುಂ ‘‘ಪಞ್ಚಕ್ಖನ್ಧಾ ಪರಿಞ್ಞಾತಾ’’ತಿ ಓಸಾನಗಾಥಮಾಹ. ತತ್ಥ ಧಿ ತವತ್ಥು ಜರೇ ಜಮ್ಮೇತಿ ಅಙ್ಗಾನಂ ಸಿಥಿಲಭಾವಕರಣಾದಿನಾ ಜರೇ ಜಮ್ಮೇ ಲಾಮಕೇ ಹೀನೇ ತವ ತುಯ್ಹಂ ಧಿ ಅತ್ಥು ಧಿಕಾರೋ ಹೋತು. ನತ್ಥಿ ದಾನಿ ಪುನಬ್ಭವೋತಿ ತಸ್ಮಾ ತ್ವಂ ಮಯಾ ಅತಿಕ್ಕನ್ತಾ ಅಭಿಭೂತಾಸೀತಿ ಅಧಿಪ್ಪಾಯೋ.

ಸೋಣಾಥೇರೀಗಾಥಾವಣ್ಣನಾ ನಿಟ್ಠಿತಾ.