೨. ರೋಹಿನೀಥೇರೀಗಾಥಾವಣ್ಣನಾ

ಸಮಣಾತಿ ಭೋತಿ ಸುಪೀತಿಆದಿಕಾ ರೋಹಿನಿಯಾ ಥೇರಿಯಾ ಗಾಥಾ. ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ ಇತೋ ಏಕನವುತಿಕಪ್ಪೇ ವಿಪಸ್ಸಿಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತಿತ್ವಾ ವಿಞ್ಞುತಂ ಪತ್ವಾ, ಏಕದಿವಸಂ ಬನ್ಧುಮತೀನಗರೇ ಭಗವನ್ತಂ ಪಿಣ್ಡಾಯ ಚರನ್ತಂ ದಿಸ್ವಾ ಪತ್ತಂ ಗಹೇತ್ವಾ ಪೂವಸ್ಸ ಪೂರೇತ್ವಾ ಭಗವತೋ ದತ್ವಾ ಪೀತಿಸೋಮನಸ್ಸಜಾತಾ ಪಞ್ಚಪತಿಟ್ಠಿತೇನ ವನ್ದಿ. ಸಾ ತೇನ ಪುಞ್ಞಕಮ್ಮೇನ ದೇವಮನುಸ್ಸೇಸು ಸಂಸರನ್ತೀ ಅನುಕ್ಕಮೇನ ಉಪಚಿತವಿಮೋಕ್ಖಸಮ್ಭಾರಾ ಹುತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ವೇಸಾಲಿಯಂ ಮಹಾವಿಭವಸ್ಸ ಬ್ರಾಹ್ಮಣಸ್ಸ ಗೇಹೇ ನಿಬ್ಬತ್ತಿತ್ವಾ ರೋಹಿನೀತಿ ಲದ್ಧನಾಮಾ ವಿಞ್ಞುತಂ ಪತ್ವಾ, ಸತ್ಥರಿ ವೇಸಾಲಿಯಂ ವಿಹರನ್ತೇ ವಿಹಾರಂ ಗನ್ತವಾ ಧಮ್ಮಂ ಸುತ್ವಾ ಸೋತಾಪನ್ನಾ ಹುತ್ವಾ ಮಾತಾಪಿತೂನಂ ಧಮ್ಮಂ ದೇಸೇತ್ವಾ ಸಾಸನೇ ಪಸಾದಂ ಉಪ್ಪಾದೇತ್ವಾ ತೇ ಅನುಜಾನಾಪೇತ್ವಾ ಸಯಂ ಪಬ್ಬಜಿತ್ವಾ ವಿಪಸ್ಸನಾಯ ಕಮ್ಮಂ ಕರೋನ್ತೀ ನ ಚಿರಸ್ಸೇವ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪಾಪುಣಿ. ತೇನ ವುತ್ತಂ –

‘‘ನಗರೇ ಬನ್ಧುಮತಿಯಾ, ವಿಪಸ್ಸಿಸ್ಸ ಮಹೇಸಿನೋ;

ಪಿಣ್ಡಾಯ ವಿಚರನ್ತಸ್ಸ, ಪೂವೇದಾಸಿಮಹಂ ತದಾ.

‘‘ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿ ಚ;

ತತ್ಥ ಚಿತ್ತಂ ಪಸಾದೇತ್ವಾ, ತಾವತಿಂಸಮಗಚ್ಛಹಂ.

‘‘ಛತ್ತಿಂಸದೇವರಾಜೂನಂ, ಮಹೇಸಿತ್ತಮಕಾರಯಿಂ;

ಪಞ್ಞಾಸಚಕ್ಕವತ್ತೀನಂ, ಮಹೇಸಿತ್ತಮಕಾರಯಿಂ.

‘‘ಮನಸಾ ಪತ್ಥಿತಾ ನಾಮ, ಸಬ್ಬಾ ಮಯ್ಹಂ ಸಮಿಜ್ಝಥ;

ಸಮ್ಪತ್ತಿಂ ಅನುಭೋತ್ವಾನ, ದೇವೇಸು ಮನುಜೇಸು ಚ.

‘‘ಪಚ್ಛಿಮೇ ಭವಸಮ್ಪತ್ತೇ, ಜಾತೋ ವಿಪ್ಪಕುಲೇ ಅಹಂ;

ರೋಹಿನೀ ನಾಮ ನಾಮೇನ, ಞಾತಕೇಹಿ ಪಿಯಾಯಿತಾ.

‘‘ಭಿಕ್ಖೂನಂ ಸನ್ತಿಕಂ ಗನ್ತ್ವಾ, ಧಮ್ಮಂ ಸುತ್ವಾ ಯಥಾತಥಂ;

ಸಂವಿಗ್ಗಮಾನಸಾ ಹುತ್ವಾ, ಪಬ್ಬಜಿಂ ಅನಗಾರಿಯಂ.

‘‘ಯೋನಿಸೋ ಪದಹನ್ತೀನಂ, ಅರಹತ್ತಮಪಾಪುಣಿಂ;

ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪೂವದಾನಸ್ಸಿದಂ ಫಲಂ.

‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ಕತಂ ಬುದ್ಧಸ್ಸ ಸಾಸನ’’ನ್ತಿ.

ಅರಹತ್ತಂ ಪನ ಪತ್ವಾ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಪುಬ್ಬೇ ಸೋತಾಪನ್ನಕಾಲೇ ಪಿತರಾ ಅತ್ತನಾ ಚ ವಚನಪಟಿವಚನವಸೇನ ವುತ್ತಗಾಥಾ ಉದಾನವಸೇನ ಭಾಸನ್ತೀ –

೨೭೧. ‘‘ಸಮಣಾತಿ ಭೋತಿ ಸುಪಿ, ಸಮಣಾತಿ ಪಬುಜ್ಝಸಿ;

ಸಮಣಾನೇವ ಕಿತ್ತೇಸಿ, ಸಮಣೀ ನೂನ ಭವಿಸ್ಸಸಿ.

೨೭೨. ‘‘ವಿಪುಲಂ ಅನ್ನಞ್ಚ ಪಾನಞ್ಚ, ಸಮಣಾನಂ ಪವೇಚ್ಛಸಿ;

ರೋಹಿನೀ ದಾನಿ ಪುಚ್ಛಾಮಿ, ಕೇನ ತೇ ಸಮಣಾ ಪಿಯಾ.

೨೭೩. ‘‘ಅಕಮ್ಮಕಾಮಾ ಅಲಸಾ, ಪರದತ್ತೂಪಜೀವಿನೋ;

ಆಸಂಸುಕಾ ಸಾದುಕಾಮಾ, ಕೇನ ತೇ ಸಮಣಾ ಪಿಯಾ.

೨೭೪. ‘‘ಚಿರಸ್ಸಂ ವತ ಮಂ ತಾತ, ಸಮಣಾನಂ ಪರಿಪುಚ್ಛಸಿ;

ತೇಸಂ ತೇ ಕಿತ್ತಯಿಸ್ಸಾಮಿ, ಪಞ್ಞಾಸೀಲಪರಕ್ಕಮಂ.

೨೭೫. ‘‘ಕಮ್ಮಕಾಮಾ ಅನಲಸಾ, ಕಮ್ಮಸೇಟ್ಠಸ್ಸ ಕಾರಕಾ;

ರಾಗಂ ದೋಸಂ ಪಜಹನ್ತಿ, ತೇನ ಮೇ ಸಮಣಾ ಪಿಯಾ.

೨೭೬. ‘‘ತೀಣಿ ಪಾಪಸ್ಸ ಮೂಲಾನಿ, ಧುನನ್ತಿ ಸುಚಿಕಾರಿನೋ;

ಸಬ್ಬಂ ಪಾಪಂ ಪಹೀನೇಸಂ, ತೇನ ಮೇ ಸಮಣಾ ಪಿಯಾ.

೨೭೭. ‘‘ಕಾಯಕಮ್ಮಂ ಸುಚಿ ನೇಸಂ, ವಚೀಕಮ್ಮಞ್ಚ ತಾದಿಸಂ;

ಮನೋಕಮ್ಮಂ ಸುಚಿ ನೇಸಂ, ತೇನ ಮೇ ಸಮಣಾ ಪಿಯಾ.

೨೭೮. ‘‘ವಿಮಲಾ ಸಙ್ಖಮುತ್ತಾವ, ಸುದ್ಧಾ ಸನ್ತರಬಾಹಿರಾ;

ಪುಣ್ಣಾ ಸುಕ್ಕಾನ ಧಮ್ಮಾನಂ, ತೇನ ಮೇ ಸಮಣಾ ಪಿಯಾ.

೨೭೯. ‘‘ಬಹುಸ್ಸುತಾ ಧಮ್ಮಧರಾ, ಅರಿಯಾ ಧಮ್ಮಜೀವಿನೋ;

ಅತ್ಥಂ ಧಮ್ಮಞ್ಚ ದೇಸೇನ್ತಿ, ತೇನ ಮೇ ಸಮಣಾ ಪಿಯಾ.

೨೮೦. ‘‘ಬಹುಸ್ಸುತಾ ಧಮ್ಮಧರಾ, ಅರಿಯಾ ಧಮ್ಮಜೀವಿನೋ;

ಏಕಗ್ಗಚಿತ್ತಾ ಸತಿಮನ್ತೋ, ತೇನ ಮೇ ಸಮಣಾ ಪಿಯಾ.

೨೮೧. ‘‘ದೂರಙ್ಗಮಾ ಸತಿಮನ್ತೋ, ಮನ್ತಭಾಣೀ ಅನುದ್ಧತಾ;

ದುಕ್ಖಸ್ಸನ್ತಂ ಪಜಾನನ್ತಿ, ತೇನ ಮೇ ಸಮಣಾ ಪಿಯಾ.

೨೮೨. ‘‘ಯಸ್ಮಾ ಗಾಮಾ ಪಕ್ಕಮನ್ತಿ, ನ ವಿಲೋಕೇನ್ತಿ ಕಿಞ್ಚನಂ;

ಅನಪೇಕ್ಖಾವ ಗಚ್ಛನ್ತಿ, ತೇನ ಮೇ ಸಮಣಾ ಪಿಯಾ.

೨೮೩. ‘‘ನ ತೇ ಸಂ ಕೋಟ್ಠೇ ಓಪೇನ್ತಿ, ನ ಕುಮ್ಭಿಂ ನ ಖಳೋಪಿಯಂ;

ಪರಿನಿಟ್ಠಿತಮೇಸಾನಾ, ತೇನ ಮೇ ಸಮಣಾ ಪಿಯಾ.

೨೮೪. ‘‘ನ ತೇ ಹಿರಞ್ಞಂ ಗಣ್ಹನ್ತಿ, ನ ಸುವಣ್ಣಂ ನ ರೂಪಿಯಂ;

ಪಚ್ಚುಪ್ಪನ್ನೇನ ಯಾಪೇನ್ತಿ, ತೇನ ಮೇ ಸಮಣಾ ಪಿಯಾ.

೨೮೫. ‘‘ನಾನಾಕುಲಾ ಪಬ್ಬಜಿತಾ, ನಾನಾಜನಪದೇಹಿ ಚ;

ಅಞ್ಞಮಞ್ಞಂ ಪಿಹಯನ್ತಿ, ತೇನ ಮೇ ಸಮಣಾ ಪಿಯಾ.

೨೮೬. ‘‘ಅತ್ಥಾಯ ವತ ನೋ ಭೋತಿ, ಕುಲೇ ಜಾತಾಸಿ ರೋಹಿನೀ;

ಸದ್ಧಾ ಬುದ್ಧೇ ಚ ಧಮ್ಮೇ ಚ, ಸಙ್ಘೇ ಚ ತಿಬ್ಬಗಾರವಾ.

೨೮೭. ‘‘ತುವಞ್ಹೇತಂ ಪಜಾನಾಸಿ, ಪುಞ್ಞಕ್ಖೇತ್ತಂ ಅನುತ್ತರಂ;

ಅಮ್ಹಮ್ಪಿ ಏತೇ ಸಮಣಾ, ಪಟಿಗ್ಗಣ್ಹನ್ತಿ ದಕ್ಖಿಣಂ.

೨೮೮. ‘‘ಪತಿಟ್ಠಿತೋ ಹೇತ್ಥ ಯಞ್ಞೋ, ವಿಪುಲೋ ನೋ ಭವಿಸ್ಸತಿ;

ಸಚೇ ಭಾಯಸಿ ದುಕ್ಖಸ್ಸ, ಸಚೇ ತೇ ದುಕ್ಖಮಪ್ಪಿಯಂ.

೨೮೯. ‘‘ಉಪೇಹಿ ಸರಣಂ ಬುದ್ಧಂ, ಧಮ್ಮಂ ಸಙ್ಘಞ್ಚ ತಾದಿನಂ;

ಸಮಾದಿಯಾಹಿ ಸೀಲಾನಿ, ತಂ ತೇ ಅತ್ಥಾಯ ಹೇಹಿತಿ.

೨೯೦. ‘‘ಉಪೇಮಿ ಸರಣಂ ಬುದ್ಧಂ, ಧಮ್ಮಂ ಸಙ್ಘಞ್ಚ ತಾದಿನಂ;

ಸಮಾದಿಯಾಮಿ ಸೀಲಾನಿ, ತಂ ಮೇ ಅತ್ಥಾಯ ಹೇಹಿತಿ.

೨೯೧. ‘‘ಬ್ರಹ್ಮಬನ್ಧು ಪುರೇ ಆಸಿಂ, ಸೋ ಇದಾನಿಮ್ಹಿ ಬ್ರಾಹ್ಮಣೋ;

ತೇವಿಜ್ಜೋ ಸೋತ್ತಿಯೋ ಚಮ್ಹಿ, ವೇದಗೂ ಚಮ್ಹಿ ನ್ಹಾತಕೋ’’ತಿ. –

ಇಮಾ ಗಾಥಾ ಪಚ್ಚುದಾಹಾಸಿ.

ತತ್ಥ ಆದಿತೋ ತಿಸ್ಸೋ ಗಾಥಾ ಅತ್ತನೋ ಧೀತು ಭಿಕ್ಖೂಸು ಸಮ್ಮುತಿಂ ಅನಿಚ್ಛನ್ತೇನ ವುತ್ತಾ. ತತ್ಥ ಸಮಣಾತಿ ಭೋತಿ ಸುಪೀತಿ ಭೋತಿ ತ್ವಂ ಸುಪನಕಾಲೇಪಿ ‘‘ಸಮಣಾ ಸಮಣಾ’’ತಿ ಕಿತ್ತೇನ್ತೀ ಸಮಣಪಟಿಬದ್ಧಂಯೇವ ಕಥಂ ಕಥೇನ್ತೀ ಸುಪಸಿ. ಸಮಣಾತಿ ಪಬುಜ್ಝಸೀತಿ ಸುಪನತೋ ಉಟ್ಠಹನ್ತೀಪಿ ‘‘ಸಮಣಾ’’ಇಚ್ಚೇವಂ ವತ್ವಾ ಪಬುಜ್ಝಸಿ ನಿದ್ದಾಯ ವುಟ್ಠಾಸಿ. ಸಮಣಾನೇವ ಕಿತ್ತೇಸೀತಿ ಸಬ್ಬಕಾಲಮ್ಪಿ ಸಮಣೇ ಏವ ಸಮಣಾನಮೇವ ವಾ ಗುಣೇ ಕಿತ್ತೇಸಿ ಅಭಿತ್ಥವಸಿ. ಸಮಣೀ ನೂನ ಭವಿಸ್ಸಸೀತಿ ಗಿಹಿರೂಪೇನ ಠಿತಾಪಿ ಚಿತ್ತೇನ ಸಮಣೀ ಏವ ಮಞ್ಞೇ ಭವಿಸ್ಸಸಿ. ಅಥ ವಾ ಸಮಣೀ ನೂನ ಭವಿಸ್ಸಸೀತಿ ಇದಾನಿ ಗಿಹಿರೂಪೇನ ಠಿತಾಪಿ ನ ಚಿರೇನೇವ ಸಮಣೀ ಏವ ಮಞ್ಞೇ ಭವಿಸ್ಸಸಿ ಸಮಣೇಸು ಏವ ನಿನ್ನಪೋಣಭಾವತೋ.

ಪವೇಚ್ಛಸೀತಿ ದೇಸಿ. ರೋಹಿನೀ ದಾನಿ ಪುಚ್ಛಾಮೀತಿ, ಅಮ್ಮ ರೋಹಿನಿ, ತಂ ಅಹಂ ಇದಾನಿ ಪುಚ್ಛಾಮೀತಿ ಬ್ರಾಹ್ಮಣೋ ಅತ್ತನೋ ಧೀತರಂ ಪುಚ್ಛನ್ತೋ ಆಹ. ಕೇನ ತೇ ಸಮಣಾ ಪಿಯಾತಿ, ಅಮ್ಮ ರೋಹಿನಿ, ತ್ವಂ ಸಯನ್ತೀಪಿ ಪಬುಜ್ಝನ್ತೀಪಿ ಅಞ್ಞದಾಪಿ ಸಮಣಾನಮೇವ ಗುಣೇ ಕಿತ್ತಯಸಿ, ಕೇನ ನಾಮ ಕಾರಣೇನ ತುಯ್ಹಂ ಸಮಣಾ ಪಿಯಾಯಿತಬ್ಬಾ ಜಾತಾತಿ ಅತ್ಥೋ.

ಇದಾನಿ ಬ್ರಾಹ್ಮಣೋ ಸಮಣೇಸು ದೋಸಂ ಧೀತು ಆಚಿಕ್ಖನ್ತೋ ‘‘ಅಕಮ್ಮಕಾಮಾ’’ತಿ ಗಾಥಮಾಹ. ತತ್ಥ ಅಕಮ್ಮಕಾಮಾತಿ ನ ಕಮ್ಮಕಾಮಾ, ಅತ್ತನೋ ಪರೇಸಞ್ಚ ಅತ್ಥಾವಹಂ ಕಿಞ್ಚಿ ಕಮ್ಮಂ ನ ಕಾತುಕಾಮಾ. ಅಲಸಾತಿ ಕುಸೀತಾ. ಪರದತ್ತೂಪಜೀವಿನೋತಿ ಪರೇಹಿ ದಿನ್ನೇನೇವ ಉಪಜೀವನಸೀಲಾ. ಆಸಂಸುಕಾತಿ ತತೋ ಏವ ಘಾಸಚ್ಛಾದನಾದೀನಂ ಆಸೀಸನಕಾ. ಸಾದುಕಾಮಾತಿ ಸಾದುಂ ಮಧುರಮೇವ ಆಹಾರಂ ಇಚ್ಛನಕಾ. ಸಬ್ಬಮೇತಂ ಬ್ರಾಹ್ಮಣೋ ಸಮಣಾನಂ ಗುಣೇ ಅಜಾನನ್ತೋ ಅತ್ತನಾವ ಪರಿಕಪ್ಪಿತಂ ದೋಸಮಾಹ.

ತಂ ಸುತ್ವಾ ರೋಹಿನೀ ‘‘ಲದ್ಧೋ ದಾನಿ ಮೇ ಓಕಾಸೋ ಅಯ್ಯಾನಂ ಗುಣೇ ಕಥೇತು’’ನ್ತಿ ತುಟ್ಠಮಾನಸಾ ಭಿಕ್ಖೂನಂ ಗುಣೇ ಕಿತ್ತೇತುಕಾಮಾ ಪಠಮಂ ತಾವ ತೇಸಂ ಕಿತ್ತನೇ ಸೋಮನಸ್ಸಂ ಪವೇದೇನ್ತೀ ‘‘ಚೀರಸ್ಸಂ ವತ ಮಂ, ತಾತಾ’’ತಿ ಗಾಥಮಾಹ. ತತ್ಥ ಚಿರಸ್ಸಂ ವತಾತಿ ಚಿರೇನ ವತ. ತಾತಾತಿ ಪಿತರಂ ಆಲಪತಿ. ಸಮಣಾನನ್ತಿ ಸಮಣೇ ಸಮಣಾನಂ ವಾ ಮಯ್ಹಂ ಪಿಯಾಯಿತಬ್ಬಂ ಪರಿಪುಚ್ಛಸಿ. ತೇಸನ್ತಿ ಸಮಣಾನಂ. ಪಞ್ಞಾಸೀಲಪರಕ್ಕಮನ್ತಿ ಪಞ್ಞಞ್ಚ ಸೀಲಞ್ಚ ಉಸ್ಸಾಹಞ್ಚ.

ಕಿತ್ತಯಿಸ್ಸಾಮೀತಿ ಕಥಯಿಸ್ಸಾಮಿ. ಪಟಿಜಾನೇತ್ವಾ ತೇ ಕಿತ್ತೇನ್ತೀ ‘‘ಅಕಮ್ಮಕಾಮಾ ಅಲಸಾ’’ತಿ ತೇನ ವುತ್ತಂ ದೋಸಂ ತಾವ ನಿಬ್ಬೇಠೇತ್ವಾ ತಪ್ಪಟಿಪಕ್ಖಭೂತಂ ಗುಣಂ ದಸ್ಸೇತುಂ ‘‘ಕಮ್ಮಕಾಮಾ’’ತಿಆದಿಮಾಹ. ತತ್ಥ ಕಮ್ಮಕಾಮಾತಿ ವತ್ತಪಟಿವತ್ತಾದಿಭೇದಂ ಕಮ್ಮಂ ಸಮಣಕಿಚ್ಚಂ ಪರಿಪೂರಣವಸೇನ ಕಾಮೇನ್ತಿ ಇಚ್ಛನ್ತೀತಿ ಕಮ್ಮಕಾಮಾ. ತತ್ಥ ಯುತ್ತಪ್ಪಯುತ್ತಾ ಹುತ್ವಾ ಉಟ್ಠಾಯ ಸಮುಟ್ಠಾಯ ವಾಯಮನತೋ ನ ಅಲಸಾತಿ ಅನಲಸಾ. ತಂ ಪನ ಕಮ್ಮಂ ಸೇಟ್ಠಂ ಉತ್ತಮಂ ನಿಬ್ಬಾನಾವಹಮೇವ ಕರೋನ್ತೀತಿ ಕಮ್ಮಸೇಟ್ಠಸ್ಸ ಕಾರಕಾ. ಕರೋನ್ತಾ ಪನ ತಂ ಪಟಿಪತ್ತಿಯಾ ಅನವಜ್ಜಭಾವತೋ ರಾಗಂ ದೋಸಂ ಪಜಹನ್ತಿ, ಯಥಾ ರಾಗದೋಸಾ ಪಹೀಯನ್ತಿ, ಏವಂ ಸಮಣಾ ಕಮ್ಮಂ ಕರೋನ್ತಿ. ತೇನ ಮೇ ಸಮಣಾ ಪಿಯಾತಿ ತೇನ ಯಥಾವುತ್ತೇನ ಸಮ್ಮಾಪಟಿಪಜ್ಜನೇನ ಮಯ್ಹಂ ಸಮಣಾ ಪಿಯಾಯಿತಬ್ಬಾತಿ ಅತ್ಥೋ.

ತೀಣಿ ಪಾಪಸ್ಸ ಮೂಲಾನೀತಿ ಲೋಭದೋಸಮೋಹಸಙ್ಖಾತಾನಿ ಅಕುಸಲಸ್ಸ ತೀಣಿ ಮೂಲಾನಿ. ಧುನನ್ತೀತಿ ನಿಗ್ಘಾತೇನ್ತಿ, ಪಜಹನ್ತೀತಿ ಅತ್ಥೋ. ಸುಚಿಕಾರಿನೋತಿ ಅನವಜ್ಜಕಮ್ಮಕಾರಿನೋ. ಸಬ್ಬಂ ಪಾಪಂ ಪಹೀನೇಸನ್ತಿ ಅಗ್ಗಮಗ್ಗಾಧಿಗಮೇನ ಏಸಂ ಸಬ್ಬಮ್ಪಿ ಪಾಪಂ ಪಹೀನಂ.

ಏವಂ ‘‘ಸಮಣಾ ಸುಚಿಕಾರಿನೋ’’ತಿ ಸಙ್ಖೇಪತೋ ವುತ್ತಮತ್ಥಂ ವಿಭಜಿತ್ವಾ ದಸ್ಸೇತುಂ ‘‘ಕಾಯಕಮ್ಮ’’ನ್ತಿ ಗಾಥಮಾಹ. ತಂ ಸುವಿಞ್ಞೇಯ್ಯಮೇವ.

ವಿಮಲಾ ಸಙ್ಖಮುತ್ತಾವಾತಿ ಸುಧೋತಸಙ್ಖಾ ವಿಯ ಮುತ್ತಾ ವಿಯ ಚ ವಿಗತಮಲಾ ರಾಗಾದಿಮಲರಹಿತಾ. ಸುದ್ಧಾ ಸನ್ತರಬಾಹಿರಾತಿ ಸನ್ತರಞ್ಚ ಬಾಹಿರಞ್ಚ ಸನ್ತರಬಾಹಿರಂ. ತತೋ ಸನ್ತರಬಾಹಿರತೋ ಸುದ್ಧಾ, ಸುದ್ಧಾಸಯಪಯೋಗಾತಿ ಅತ್ಥೋ. ಪುಣ್ಣಾ ಸುಕ್ಕಾನ ಧಮ್ಮಾನನ್ತಿ ಏಕನ್ತಸುಕ್ಕೇಹಿ ಅನವಜ್ಜಧಮ್ಮೇಹಿ ಪರಿಪುಣ್ಣಾ, ಅಸೇಖೇಹಿ ಸೀಲಕ್ಖನ್ಧಾದೀಹಿ ಸಮನ್ನಾಗತಾತಿ ಅತ್ಥೋ.

ಸುತ್ತಗೇಯ್ಯಾದಿಬಹುಂ ಸುತಂ ಏತೇಸಂ, ಸುತೇನ ವಾ ಉಪ್ಪನ್ನಾತಿ ಬಹುಸ್ಸುತಾ, ಪರಿಯತ್ತಿಬಾಹುಸಚ್ಚೇನ ಪಟಿವೇಧಬಾಹುಸಚ್ಚೇನ ಚ ಸಮನ್ನಾಗತಾತಿ ಅತ್ಥೋ. ತಮೇವ ದುವಿಧಮ್ಪಿ ಧಮ್ಮಂ ಧಾರೇನ್ತೀತಿ ಧಮ್ಮಧರಾ. ಸತ್ತಾನಂ ಆಚಾರಸಮಾಚಾರಸಿಕ್ಖಾಪದೇನ ಅರೀಯನ್ತೀತಿ ಅರಿಯಾ. ಧಮ್ಮೇನ ಞಾಯೇನ ಜೀವನ್ತೀತಿ ಧಮ್ಮಜೀವಿನೋ. ಅತ್ಥಂ ಧಮ್ಮಞ್ಚ ದೇಸೇನ್ತೀತಿ ಭಾಸಿತತ್ಥಞ್ಚ ದೇಸನಾಧಮ್ಮಞ್ಚ ಕಥೇನ್ತಿ ಪಕಾಸೇನ್ತಿ. ಅಥ ವಾ ಅತ್ಥತೋ ಅನಪೇತಂ ಧಮ್ಮತೋ ಅನಪೇತಞ್ಚ ದೇಸೇನ್ತಿ ಆಚಿಕ್ಖನ್ತಿ.

ಏಕಗ್ಗಚಿತ್ತಾತಿ ಸಮಾಹಿತಚಿತ್ತಾ. ಸತಿಮನ್ತೋತಿ ಉಪಟ್ಠಿತಸತಿನೋ.

ದೂರಙ್ಗಮಾತಿ ಅರಞ್ಞಗತಾ, ಮನುಸ್ಸೂಪಚಾರಂ ಮುಞ್ಚಿತ್ವಾ ದೂರಂ ಗಚ್ಛನ್ತಾ, ಇದ್ಧಾನುಭಾವೇನ ವಾ ಯಥಾರುಚಿತಂ ದೂರಂ ಠಾನಂ ಗಚ್ಛನ್ತೀತಿ ದೂರಙ್ಗಮಾ. ಮನ್ತಾ ವುಚ್ಚತಿ ಪಞ್ಞಾ, ತಾಯ ಭಣನಸೀಲತಾಯ ಮನ್ತಭಾಣೀ. ನ ಉದ್ಧತಾತಿ ಅನುದ್ಧತಾ, ಉದ್ಧಚ್ಚರಹಿತಾ ವೂಪಸನ್ತಚಿತ್ತಾ. ದುಕ್ಖಸ್ಸನ್ತಂ ಪಜಾನನ್ತೀತಿ ವಟ್ಟದುಕ್ಖಸ್ಸ ಪರಿಯನ್ತಭೂತಂ ನಿಬ್ಬಾನಂ ಪಟಿವಿಜ್ಝನ್ತಿ.

ನ ವಿಲೋಕೇನ್ತಿ ಕಿಞ್ಚನನ್ತಿ ಯತೋ ಗಾಮತೋ ಪಕ್ಕಮನ್ತಿ, ತಸ್ಮಿಂ ಗಾಮೇ ಕಞ್ಚಿ ಸತ್ತಂ ವಾ ಸಙ್ಖಾರಂ ವಾ ಅಪೇಕ್ಖಾವಸೇನ ನ ಓಲೋಕೇನ್ತಿ, ಅಥ ಖೋ ಪನ ಅನಪೇಕ್ಖಾವ ಗಚ್ಛನ್ತಿ ಪಕ್ಕಮನ್ತಿ.

ನ ತೇ ಸಂ ಕೋಟ್ಠೇ ಓಪೇನ್ತೀತಿ ತೇ ಸಮಣಾ ಸಂ ಅತ್ತನೋ ಸನ್ತಕಂ ಸಾಪತೇಯ್ಯಂ ಕೋಟ್ಠೇ ನ ಓಪೇನ್ತಿ ನ ಪಟಿಸಾಮೇತ್ವಾ ಠಪೇನ್ತಿ ತಾದಿಸಸ್ಸ ಪರಿಗ್ಗಹಸ್ಸ ಅಭಾವತೋ. ಕುಮ್ಭಿನ್ತಿ ಕುಮ್ಭಿಯಂ. ಖಳೋಪಿಯನ್ತಿ ಪಚ್ಛಿಯಂ. ಪರಿನಿಟ್ಠಿತಮೇಸಾನಾತಿ ಪರಕುಲೇಸು ಪರೇಸಂ ಅತ್ಥಾಯ ಸಿದ್ಧಮೇವ ಘಾಸಂ ಪರಿಯೇಸನ್ತಾ.

ಹಿರಞ್ಞನ್ತಿ ಕಹಾಪಣಂ. ರೂಪಿಯನ್ತಿ ರಜತಂ. ಪಚ್ಚುಪ್ಪನ್ನೇನ ಯಾಪೇನ್ತೀತಿ ಅತೀತಂ ಅನನುಸೋಚನ್ತಾ ಅನಾಗತಞ್ಚ ಅಪಚ್ಚಾಸೀಸನ್ತಾ ಪಚ್ಚುಪ್ಪನ್ನೇನ ಯಾಪೇನ್ತಿ ಅತ್ತಭಾವಂ ಪವತ್ತೇನ್ತಿ.

ಅಞ್ಞಮಞ್ಞಂ ಪಿಹಯನ್ತೀತಿ ಅಞ್ಞಮಞ್ಞಸ್ಮಿಂ ಮೇತ್ತಿಂ ಕರೋನ್ತಿ. ‘‘ಪಿಹಾಯನ್ತಿ’’ಪಿ ಪಾಠೋ, ಸೋ ಏವ ಅತ್ಥೋ.

ಏವಂ ಸೋ ಬ್ರಾಹ್ಮಣೋ ಧೀತುಯಾ ಸನ್ತಿಕೇ ಭಿಕ್ಖೂನಂ ಗುಣೇ ಸುತ್ವಾ ಪಸನ್ನಮಾನಸೋ ಧೀತರಂ ಪಸಂಸನ್ತೋ ‘‘ಅತ್ಥಾಯ ವತಾ’’ತಿಆದಿಮಾಹ.

ಅಮ್ಹಮ್ಪೀತಿ ಅಮ್ಹಾಕಮ್ಪಿ. ದಕ್ಖಿಣನ್ತಿ ದೇಯ್ಯಧಮ್ಮಂ.

ಏತ್ಥಾತಿ ಏತೇಸು ಸಮಣೇಸು. ಯಞ್ಞೋತಿ ದಾನಧಮ್ಮೋ. ವಿಪುಲೋತಿ ವಿಪುಲಫಲೋ. ಸೇಸಂ ವುತ್ತನಯಮೇವ.

ಏವಂ ಬ್ರಾಹ್ಮಣೋ ಸರಣೇಸು ಸೀಲೇಸು ಚ ಪತಿಟ್ಠಿತೋ ಅಪರಭಾಗೇ ಸಞ್ಜಾತಸಂವೇಗೋ ಪಬ್ಬಜಿತ್ವಾ ವಿಪಸ್ಸನಂ ವಡ್ಢೇತ್ವಾ ಅರಹತ್ತೇ ಪತಿಟ್ಠಾಯ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಉದಾನೇನ್ತೋ ‘‘ಬ್ರಹ್ಮಬನ್ಧೂ’’ತಿ ಗಾಥಮಾಹ. ತಸ್ಸತ್ಥೋ ಹೇಟ್ಠಾ ವುತ್ತೋಯೇವ.

ರೋಹಿನೀಥೇರೀಗಾಥಾವಣ್ಣನಾ ನಿಟ್ಠಿತಾ.