೧೬. ವುಡ್ಢಪಬ್ಬಜಿತಸುಮನಾಥೇರೀಗಾಥಾವಣ್ಣನಾ

ಸುಖಂ ತ್ವಂ ವುಡ್ಢಿಕೇ ಸೇಹೀತಿ ಸುಮನಾಯ ವುಡ್ಢಪಬ್ಬಜಿತಾಯ ಗಾಥಾ. ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ಕುಸಲಂ ಉಪಚಿನಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಮಹಾಕೋಸಲರಞ್ಞೋ ಭಗಿನೀ ಹುತ್ವಾ ನಿಬ್ಬತ್ತಿ. ಸಾ ಸತ್ಥಾರಾ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ‘‘ಚತ್ತಾರೋ ಖೋ ಮೇ, ಮಹಾರಾಜ, ದಹರಾತಿ ನ ಉಞ್ಞಾತಬ್ಬಾ’’ತಿಆದಿನಾ (ಸಂ. ನಿ. ೧.೧೧೨) ದೇಸಿತಂ ಧಮ್ಮಂ ಸುತ್ವಾ ಲದ್ಧಪ್ಪಸಾದಾ ಸರಣೇಸು ಚ ಸೀಲೇಸು ಚ ಪತಿಟ್ಠಾಯ ಪಬ್ಬಜಿತುಕಾಮಾಪಿ ‘‘ಅಯ್ಯಿಕಂ ಪಟಿಜಗ್ಗಿಸ್ಸಾಮೀ’’ತಿ ಚಿರಕಾಲಂ ವೀತಿನಾಮೇತ್ವಾ ಅಪರಭಾಗೇ ಅಯ್ಯಿಕಾಯ ಕಾಲಙ್ಕತಾಯ ರಞ್ಞಾ ಸದ್ಧಿಂ ಮಹಗ್ಘಾನಿ ಅತ್ಥರಣಪಾವುರಣಾನಿ ಗಾಹಾಪೇತ್ವಾ ವಿಹಾರಂ ಗನ್ತ್ವಾ ಸಙ್ಘಸ್ಸ ದಾಪೇತ್ವಾ ಸತ್ಥು ಸನ್ತಿಕೇ ಧಮ್ಮಂ ಸುತ್ವಾ ಅನಾಗಾಮಿಫಲೇ ಪತಿಟ್ಠಿತಾ ಪಬ್ಬಜ್ಜಂ ಯಾಚಿ. ಸತ್ಥಾ ತಸ್ಸಾ ಞಾಣಪರಿಪಾಕಂ ದಿಸ್ವಾ –

೧೬. ‘‘ಸುಖಂ ತ್ವಂ ವುಡ್ಢಿಕೇ ಸೇಹಿ, ಕತ್ವಾ ಚೋಳೇನ ಪಾರುತಾ;

ಉಪಸನ್ತೋ ಹಿ ತೇ ರಾಗೋ, ಸೀತಿಭೂತಾಸಿ ನಿಬ್ಬುತಾ’’ತಿ. –

ಇಮಂ ಗಾಥಂ ಅಭಾಸಿ. ಸಾ ಗಾಥಾಪರಿಯೋಸಾನೇ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪತ್ವಾ ಉದಾನವಸೇನ ತಮೇವ ಗಾಥಂ ಅಭಾಸಿ. ಇದಮೇವ ಚಸ್ಸಾ ಅಞ್ಞಾಬ್ಯಾಕರಣಂ ಅಹೋಸಿ, ಸಾ ತಾವದೇವ ಪಬ್ಬಜಿ. ಗಾಥಾಯ ಪನ ವುಡ್ಢಿಕೇತಿ ವುಡ್ಢೇ, ವಯೋವುಡ್ಢೇತಿ ಅತ್ಥೋ. ಅಯಂ ಪನ ಸೀಲಾದಿಗುಣೇಹಿಪಿ ವುಡ್ಢಾ, ಥೇರಿಯಾ ವುತ್ತಗಾಥಾಯ ಚತುತ್ಥಪಾದೇ ಸೀತಿಭೂತಾಸಿ ನಿಬ್ಬುತಾತಿ ಯೋಜೇತಬ್ಬಂ. ಸೇಸಂ ವುತ್ತನಯಮೇವ.

ವುಡ್ಢಪಬ್ಬಜಿತಸುಮನಾಥೇರೀಗಾಥಾವಣ್ಣನಾ ನಿಟ್ಠಿತಾ.