೧೫. ಉತ್ತರಾಥೇರೀಗಾಥಾವಣ್ಣನಾ

ಕಾಯೇನ ಸಂವುತಾ ಆಸಿನ್ತಿ ಉತ್ತರಾಯ ಥೇರಿಯಾ ಗಾಥಾ. ತಸ್ಸಾಪಿ ವತ್ಥು ತಿಸ್ಸಾಥೇರಿಯಾ ವತ್ಥುಸದಿಸಂ. ಸಾಪಿ ಹಿ ಸಕ್ಯಕುಲಪ್ಪಸುತಾ ಬೋಧಿಸತ್ತಸ್ಸ ಓರೋಧಭೂತಾ ಮಹಾಪಜಾಪತಿಗೋತಮಿಯಾ ಸದ್ಧಿಂ ನಿಕ್ಖನ್ತಾ ಓಭಾಸಗಾಥಾಯ ಅರಹತ್ತಂ ಪತ್ವಾ ಪನ –

೧೫. ‘‘ಕಾಯೇನ ಸಂವುತಾ ಆಸಿಂ, ವಾಚಾಯ ಉದ ಚೇತಸಾ;

ಸಮೂಲಂ ತಣ್ಹಮಬ್ಬುಯ್ಹ, ಸೀತಿಭೂತಾಮ್ಹಿ ನಿಬ್ಬುತಾ’’ತಿ. –

ಉದಾನವಸೇನ ತಮೇವ ಗಾಥಂ ಅಭಾಸಿ.

ತತ್ಥ ಕಾಯೇನ ಸಂವುತಾ ಆಸಿನ್ತಿ ಕಾಯಿಕೇನ ಸಂವರೇನ ಸಂವುತಾ ಅಹೋಸಿಂ. ವಾಚಾಯಾತಿ ವಾಚಸಿಕೇನ ಸಂವರೇನ ಸಂವುತಾ ಆಸಿನ್ತಿ ಯೋಜನಾ, ಪದದ್ವಯೇನಾಪಿ ಸೀಲಸಂವರಮಾಹ. ಉದಾತಿ ಅಥ. ಚೇತಸಾತಿ ಸಮಾಧಿಚಿತ್ತೇನ, ಏತೇನ ವಿಪಸ್ಸನಾಭಾವನಮಾಹ. ಸಮೂಲಂ ತಣ್ಹಮಬ್ಬುಯ್ಹಾತಿ ಸಾನುಸಯಂ, ಸಹ ವಾ ಅವಿಜ್ಜಾಯ ತಣ್ಹಂ ಉದ್ಧರಿತ್ವಾ. ಅವಿಜ್ಜಾಯ ಹಿ ಪಟಿಚ್ಛಾದಿತಾದೀನವೇ ಭವತ್ತಯೇ ತಣ್ಹಾ ಉಪ್ಪಜ್ಜತಿ.

ಅಪರೋ ನಯೋ – ಕಾಯೇನ ಸಂವುತಾತಿ ಸಮ್ಮಾಕಮ್ಮನ್ತೇನ ಸಬ್ಬಸೋ ಮಿಚ್ಛಾಕಮ್ಮನ್ತಸ್ಸ ಪಹಾನಾ ಮಗ್ಗಸಂವರೇನೇವ ಕಾಯೇನ ಸಂವುತಾ ಆಸಿಂ. ವಾಚಾಯಾತಿ ಸಮ್ಮಾವಾಚಾಯ ಸಬ್ಬಸೋ ಮಿಚ್ಛಾವಾಚಾಯ ಪಹಾನಾ ಮಗ್ಗಸಂವರೇನೇವ ವಾಚಾಯ ಸಂವುತಾ ಆಸಿನ್ತಿ ಅತ್ಥೋ. ಚೇತಸಾತಿ ಸಮಾಧಿನಾ. ಚೇತೋಸೀಸೇನ ಹೇತ್ಥ ಸಮ್ಮಾಸಮಾಧಿ ವುತ್ತೋ, ಸಮ್ಮಾಸಮಾಧಿಗ್ಗಹಣೇನೇವ ಮಗ್ಗಲಕ್ಖಣೇನ ಏಕಲಕ್ಖಣಾ ಸಮ್ಮಾದಿಟ್ಠಿಆದಯೋ ಮಗ್ಗಧಮ್ಮಾ ಗಹಿತಾವ ಹೋನ್ತೀತಿ, ಮಗ್ಗಸಂವರೇನ ಅಭಿಜ್ಝಾದಿಕಸ್ಸ ಅಸಂವರಸ್ಸ ಅನವಸೇಸತೋ ಪಹಾನಂ ದಸ್ಸಿತಂ ಹೋತಿ. ತೇನೇವಾಹ ‘‘ಸಮೂಲಂ ತಣ್ಹಮಬ್ಬುಯ್ಹಾ’’ತಿ. ಸೀತಿಭೂತಾಮ್ಹಿ ನಿಬ್ಬುತಾತಿ ಸಬ್ಬಸೋ ಕಿಲೇಸಪರಿಳಾಹಾಭಾವೇನ ಸೀತಿಭಾವಪ್ಪತ್ತಾ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ನಿಬ್ಬುತಾ ಅಮ್ಹೀತಿ.

ಉತ್ತರಾಥೇರೀಗಾಥಾವಣ್ಣನಾ ನಿಟ್ಠಿತಾ.