೧೧. ಉಪಾಲಿತ್ಥೇರಗಾಥಾವಣ್ಣನಾ

ಸದ್ಧಾಯ ಅಭಿನಿಕ್ಖಮ್ಮಾತಿ ಆಯಸ್ಮತೋ ಉಪಾಲಿತ್ಥೇರಸ್ಸ ಗಾಥಾ. ಕಾ ಉಪ್ಪತ್ತಿ? ಅಯಮ್ಪಿ ಪದುಮುತ್ತರಸ್ಸ ಭಗವತೋ ಕಾಲೇ ಹಂಸವತೀನಗರೇ ಕುಲಘರೇ ನಿಬ್ಬತ್ತೋ ಏಕದಿವಸಂ ಸತ್ಥು ಧಮ್ಮಂ ಸುಣನ್ತೋ ಸತ್ಥಾರಂ ಏಕಂ ಭಿಕ್ಖುಂ ವಿನಯಧರಾನಂ ಅಗ್ಗಟ್ಠಾನೇ ಠಪೇನ್ತಂ ದಿಸ್ವಾ ಅಧಿಕಾರಕಮ್ಮಂ ಕತ್ವಾ ತಂ ಠಾನನ್ತರಂ ಪತ್ಥೇಸಿ. ಸೋ ಯಾವಜೀವಂ ಕುಸಲಂ ಕತ್ವಾ ದೇವಮನುಸ್ಸೇಸು ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಕಪ್ಪಕಗೇಹೇ ಪಟಿಸನ್ಧಿಂ ಗಣ್ಹಿ, ಉಪಾಲೀತಿಸ್ಸ ನಾಮಂ ಅಕಂಸು. ಸೋ ವಯಪ್ಪತ್ತೋ ಅನುರುದ್ಧಾದೀನಂ ಛನ್ನಂ ಖತ್ತಿಯಾನಂ ಪಸಾದಕೋ ಹುತ್ವಾ ತಥಾಗತೇ ಅನುಪಿಯಮ್ಬವನೇ ವಿಹರನ್ತೇ ಪಬ್ಬಜನತ್ಥಾಯ ನಿಕ್ಖಮನ್ತೇಹಿ ಛಹಿ ಖತ್ತಿಯೇಹಿ ಸದ್ಧಿಂ ನಿಕ್ಖಮಿತ್ವಾ ಪಬ್ಬಜಿ. ತಸ್ಸ ಪಬ್ಬಜ್ಜಾವಿಧಾನಂ ಪಾಳಿಯಂ ಆಗತಮೇವ (ಚೂಳವ. ೩೩೦).

ಸೋ ಪಬ್ಬಜಿತ್ವಾ ಉಪಸಮ್ಪನ್ನೋ ಸತ್ಥು ಸನ್ತಿಕೇ ಕಮ್ಮಟ್ಠಾನಂ ಗಹೇತ್ವಾ ‘‘ಮಯ್ಹಂ, ಭನ್ತೇ, ಅರಞ್ಞವಾಸಂ ಅನುಜಾನಾಥಾ’’ತಿ ಆಹ. ಭಿಕ್ಖು ತವ ಅರಞ್ಞೇ ವಸನ್ತಸ್ಸ ಏಕಮೇವ ಧುರಂ ವಡ್ಢಿಸ್ಸತಿ, ಅಮ್ಹಾಕಂ ಪನ ಸನ್ತಿಕೇ ವಸನ್ತಸ್ಸ ಗನ್ಥಧುರಞ್ಚ ವಿಪಸ್ಸನಾಧುರಞ್ಚ ಪರಿಪೂರೇಸ್ಸತೀತಿ. ಥೇರೋ ಸತ್ಥು ವಚನಂ ಸಮ್ಪಟಿಚ್ಛಿತ್ವಾ ವಿಪಸ್ಸನಾಯ ಕಮ್ಮಂ ಕರೋನ್ತೋ ನಚಿರಸ್ಸೇವ ಅರಹತ್ತಂ ಪಾಪುಣಿ. ತೇನ ವುತ್ತಂ ಅಪದಾನೇ (ಅಪ. ಥೇರ ೧.೧.೪೪೧-೫೯೫) –

‘‘ನಗರೇ ಹಂಸವತಿಯಾ, ಸುಜಾತೋ ನಾಮ ಬ್ರಾಹ್ಮಣೋ;

ಅಸೀತಿಕೋಟಿನಿಚಯೋ, ಪಹೂತಧನಧಞ್ಞವಾ.

‘‘ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ;

ಲಕ್ಖಣೇ ಇತಿಹಾಸೇ ಚ, ಸಧಮ್ಮೇ ಪಾರಮಿಂ ಗತೋ.

‘‘ಪರಿಬ್ಬಾಜಾ ಏಕಸಿಖಾ, ಗೋತಮಾ ಬುದ್ಧಸಾವಕಾ;

ಚರಕಾ ತಾಪಸಾ ಚೇವ, ಚರನ್ತಿ ಮಹಿಯಾ ತದಾ.

‘‘ತೇಪಿ ಮಂ ಪರಿವಾರೇನ್ತಿ, ಬ್ರಾಹ್ಮಣೋ ವಿಸ್ಸುತೋ ಇತಿ;

ಬಹುಜ್ಜನೋ ಮಂ ಪೂಜೇತಿ, ನಾಹಂ ಪೂಜೇಮಿ ಕಿಞ್ಚನಂ.

‘‘ಪೂಜಾರಹಂ ನ ಪಸ್ಸಾಮಿ, ಮಾನತ್ಥದ್ಧೋ ಅಹಂ ತದಾ;

ಬುದ್ಧೋತಿ ವಚನಂ ನತ್ಥಿ, ತಾವ ನುಪ್ಪಜ್ಜತೇ ಜಿನೋ.

‘‘ಅಚ್ಚಯೇನ ಅಹೋರತ್ತಂ, ಪದುಮುತ್ತರನಾಮಕೋ;

ಸಬ್ಬಂ ತಮಂ ವಿನೋದೇತ್ವಾ, ಲೋಕೇ ಉಪ್ಪಜ್ಜಿ ಚಕ್ಖುಮಾ.

‘‘ವಿತ್ಥಾರಿಕೇ ಬಾಹುಜಞ್ಞೇ, ಪುಥುಭೂತೇ ಚ ಸಾಸನೇ;

ಉಪಾಗಮಿ ತದಾ ಬುದ್ಧೋ, ನಗರಂ ಹಂಸಸವ್ಹಯಂ.

‘‘ಪಿತು ಅತ್ಥಾಯ ಸೋ ಬುದ್ಧೋ, ಧಮ್ಮಂ ದೇಸೇಸಿ ಚಕ್ಖುಮಾ;

ತೇನ ಕಾಲೇನ ಪರಿಸಾ, ಸಮನ್ತಾ ಯೋಜನಂ ತದಾ.

‘‘ಸಮ್ಮತೋ ಮನುಜಾನಂ ಸೋ, ಸುನನ್ದೋ ನಾಮ ತಾಪಸೋ;

ಯಾವತಾ ಬುದ್ಧಪರಿಸಾ, ಪುಪ್ಫೇಹಚ್ಛಾದಯೀ ತದಾ.

‘‘ಚತುಸಚ್ಚಂ ಪಕಾಸೇನ್ತೇ, ಸೇಟ್ಠೇ ಚ ಪುಪ್ಫಮಣ್ಡಪೇ;

ಕೋಟಿಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು.

‘‘ಸತ್ತರತ್ತಿನ್ದಿವಂ ಬುದ್ಧೋ, ವಸ್ಸೇತ್ವಾ ಧಮ್ಮವುಟ್ಠಿಯೋ;

ಅಟ್ಠಮೇ ದಿವಸೇ ಪತ್ತೇ, ಸುನನ್ದಂ ಕಿತ್ತಯೀ ಜಿನೋ.

‘‘ದೇವಲೋಕೇ ಮನುಸ್ಸೇ ವಾ, ಸಂಸರನ್ತೋ ಅಯಂ ಭವೇ;

ಸಬ್ಬೇಸಂ ಪವರೋ ಹುತ್ವಾ, ಭವೇಸು ಸಂಸರಿಸ್ಸತಿ.

‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಮನ್ತಾಣಿಪುತ್ತೋ ಪುಣ್ಣೋತಿ, ಹೇಸ್ಸತಿ ಸತ್ಥು ಸಾವಕೋ.

‘‘ಏವಂ ಕಿತ್ತಯಿ ಸಮ್ಬುದ್ಧೋ, ಸುನನ್ದಂ ತಾಪಸಂ ತದಾ;

ಹಾಸಯನ್ತೋ ಜನಂ ಸಬ್ಬಂ, ದಸ್ಸಯನ್ತೋ ಸಕಂ ಬಲಂ.

‘‘ಕತಞ್ಜಲೀ ನಮಸ್ಸನ್ತಿ, ಸುನನ್ದಂ ತಾಪಸಂ ಜನಾ;

ಬುದ್ಧೇ ಕಾರಂ ಕರಿತ್ವಾನ, ಸೋಧೇಸಿ ಗತಿಮತ್ತನೋ.

‘‘ತತ್ಥ ಮೇ ಅಹು ಸಙ್ಕಪ್ಪೋ, ಸುತ್ವಾನ ಮುನಿನೋ ವಚಂ;

ಅಹಮ್ಪಿ ಕಾರಂ ಕಸ್ಸಾಮಿ, ಯಥಾ ಪಸ್ಸಾಮಿ ಗೋತಮಂ.

‘‘ಏವಾಹಂ ಚಿನ್ತಯಿತ್ವಾನ, ಕಿರಿಯಂ ಚಿನ್ತಯಿಂ ಮಮ;

ಕ್ಯಾಹಂ ಕಮ್ಮಂ ಆಚರಾಮಿ, ಪುಞ್ಞಕ್ಖೇತ್ತೇ ಅನುತ್ತರೇ.

‘‘ಅಯಞ್ಚ ಪಾಠಿಕೋ ಭಿಕ್ಖು, ಸಬ್ಬಪಾಠಿಸ್ಸ ಸಾಸನೇ;

ವಿನಯೇ ಅಗ್ಗನಿಕ್ಖಿತ್ತೋ, ತಂ ಠಾನಂ ಪತ್ಥಯೇ ಅಹಂ.

‘‘ಇದಂ ಮೇ ಅಮಿತಂ ಭೋಗಂ, ಅಕ್ಖೋಭಂ ಸಾಗರೂಪಮಂ;

ತೇನ ಭೋಗೇನ ಬುದ್ಧಸ್ಸ, ಆರಾಮಂ ಮಾಪಯೇ ಅಹಂ.

‘‘ಸೋಭನಂ ನಾಮ ಆರಾಮಂ, ನಗರಸ್ಸ ಪುರತ್ಥತೋ;

ಕಿಣಿತ್ವಾ ಸತಸಹಸ್ಸೇನ, ಸಙ್ಘಾರಾಮಂ ಅಮಾಪಯಿಂ.

‘‘ಕೂಟಾಗಾರೇ ಚ ಪಾಸಾದೇ, ಮಣ್ಡಪೇ ಹಮ್ಮಿಯೇ ಗುಹಾ;

ಚಙ್ಕಮೇ ಸುಕತೇ ಕತ್ವಾ, ಸಙ್ಘಾರಾಮಂ ಅಮಾಪಯಿಂ.

‘‘ಜನ್ತಾಘರಂ ಅಗ್ಗಿಸಾಲಂ, ಅಥೋ ಉದಕಮಾಳಕಂ;

ನ್ಹಾನಘರಂ ಮಾಪಯಿತ್ವಾ, ಭಿಕ್ಖುಸಙ್ಘಸ್ಸದಾಸಹಂ.

‘‘ಆಸನ್ದಿಯೋ ಪೀಠಕೇ ಚ, ಪರಿಭೋಗೇ ಚ ಭಾಜನೇ;

ಆರಾಮಿಕಞ್ಚ ಭೇಸಜ್ಜಂ, ಸಬ್ಬಮೇತಂ ಅದಾಸಹಂ.

‘‘ಆರಕ್ಖಂ ಪಟ್ಠಪೇತ್ವಾನ, ಪಾಕಾರಂ ಕಾರಯಿಂ ದಳ್ಹಂ;

ಮಾ ನಂ ಕೋಚಿ ವಿಹೇಠೇಸಿ, ಸನ್ತಚಿತ್ತಾನ ತಾದಿನಂ.

‘‘ಸತಸಹಸ್ಸೇನಾವಾಸಂ, ಸಙ್ಘಾರಾಮೇ ಅಮಾಪಯಿಂ;

ವೇಪುಲ್ಲಂ ತಂ ಮಾಪಯಿತ್ವಾ, ಸಮ್ಬುದ್ಧಂ ಉಪನಾಮಯಿಂ.

‘‘ನಿಟ್ಠಾಪಿತೋ ಮಯಾರಾಮೋ, ಸಮ್ಪಟಿಚ್ಛ ತುವಂ ಮುನಿ;

ನಿಯ್ಯಾದೇಸ್ಸಾಮಿ ತಂ ವೀರ, ಅಧಿವಾಸೇಹಿ ಚಕ್ಖುಮ.

‘‘ಪದುಮುತ್ತರೋ ಲೋಕವಿದೂ, ಆಹುತೀನಂ ಪಟಿಗ್ಗಹೋ;

ಮಮ ಸಙ್ಕಪ್ಪಮಞ್ಞಾಯ, ಅಧಿವಾಸೇಸಿ ನಾಯಕೋ.

‘‘ಅಧಿವಾಸನಮಞ್ಞಾಯ, ಸಬ್ಬಞ್ಞುಸ್ಸ ಮಹೇಸಿನೋ;

ಭೋಜನಂ ಪಟಿಯಾದೇತ್ವಾ, ಕಾಲಮಾರೋಚಯಿಂ ಅಹಂ.

‘‘ಆರೋಚಿತಮ್ಹಿ ಕಾಲಮ್ಹಿ, ಪದುಮುತ್ತರನಾಯಕೋ;

ಖೀಣಾಸವಸಹಸ್ಸೇಹಿ, ಆರಾಮಂ ಮೇ ಉಪಾಗಮಿ.

‘‘ನಿಸಿನ್ನಂ ಕಾಲಮಞ್ಞಾಯ, ಅನ್ನಪಾನೇನ ತಪ್ಪಯಿಂ;

ಭುತ್ತಾವಿಂ ಕಾಲಮಞ್ಞಾಯ, ಇದಂ ವಚನಮಬ್ರವಿಂ.

‘‘ಕೀತೋ ಸತಸಹಸ್ಸೇನ, ತತ್ತಕೇನೇವ ಕಾರಿತೋ;

ಸೋಭನೋ ನಾಮ ಆರಾಮೋ, ಸಮ್ಪಟಿಚ್ಛ ತುವಂ ಮುನಿ.

‘‘ಇಮಿನಾರಾಮದಾನೇನ, ಚೇತನಾಪಣಿಧೀಹಿ ಚ;

ಭವೇ ನಿಬ್ಬತ್ತಮಾನೋಹಂ, ಲಭಾಮಿ ಮಮ ಪತ್ಥಿತಂ.

‘‘ಪಟಿಗ್ಗಹೇತ್ವಾ ಸಮ್ಬುದ್ಧೋ, ಸಙ್ಘಾರಾಮಂ ಸುಮಾಪಿತಂ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಇದಂ ವಚನಮಬ್ರವಿ.

‘‘ಯೋ ಸೋ ಬುದ್ಧಸ್ಸ ಪಾದಾಸಿ, ಸಙ್ಘಾರಾಮಂ ಸುಮಾಪಿತಂ;

ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

‘‘ಹತ್ಥೀ ಅಸ್ಸಾ ರಥಾ ಪತ್ತೀ, ಸೇನಾ ಚ ಚತುರಙ್ಗಿನೀ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.

‘‘ಸಟ್ಠಿ ತೂರಸಹಸ್ಸಾನಿ, ಭೇರಿಯೋ ಸಮಲಙ್ಕತಾ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.

‘‘ಛಳಸೀತಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ;

ವಿಚಿತ್ತವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ.

‘‘ಅಳಾರಪಮ್ಹಾ ಹಸುಲಾ, ಸುಸಞ್ಞಾ ತನುಮಜ್ಝಿಮಾ;

ಪರಿವಾರೇಸ್ಸನ್ತಿಮಂ ನಿಚ್ಚಂ, ಸಙ್ಘಾರಾಮಸ್ಸಿದಂ ಫಲಂ.

‘‘ತಿಂಸಕಪ್ಪಸಹಸ್ಸಾನಿ, ದೇವಲೋಕೇ ರಮಿಸ್ಸತಿ;

ಸಹಸ್ಸಕ್ಖತ್ತುಂ ದೇವಿನ್ದೋ, ದೇವರಜ್ಜಂ ಕರಿಸ್ಸತಿ.

‘‘ದೇವರಾಜೇನ ಪತ್ತಬ್ಬಂ, ಸಬ್ಬಂ ಪಟಿಲಭಿಸ್ಸತಿ;

ಅನೂನಭೋಗೋ ಹುತ್ವಾನ, ದೇವರಜ್ಜಂ ಕರಿಸ್ಸತಿ.

‘‘ಸಹಸ್ಸಕ್ಖತ್ತುಂ ಚಕ್ಕವತ್ತೀ, ರಾಜಾ ರಟ್ಠೇ ಭವಿಸ್ಸತಿ.

ಪಥಬ್ಯಾ ರಜ್ಜಂ ವಿಪುಲಂ, ಗಣನಾತೋ ಅಸಙ್ಖಿಯಂ.

‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

‘‘ತಸ್ಸ ಧಮ್ಮೇಸು ದಾಯಾದೋ, ಓರಸೋ ಧಮ್ಮನಿಮ್ಮಿತೋ;

ಉಪಾಲಿ ನಾಮ ನಾಮೇನ, ಹೇಸ್ಸತಿ ಸತ್ಥು ಸಾವಕೋ.

‘‘ವಿನಯೇ ಪಾರಮಿಂ ಪತ್ವಾ, ಠಾನಾಠಾನೇ ಚ ಕೋವಿದೋ;

ಜಿನಸಾಸನಂ ಧಾರೇನ್ತೋ, ವಿಹರಿಸ್ಸತಿನಾಸವೋ.

‘‘ಸಬ್ಬಮೇತಂ ಅಭಿಞ್ಞಾಯ, ಗೋತಮೋ ಸಕ್ಯಪುಙ್ಗವೋ;

ಭಿಕ್ಖುಸಙ್ಘೇ ನಿಸೀದಿತ್ವಾ, ಏತದಗ್ಗೇ ಠಪೇಸ್ಸತಿ.

‘‘ಅಪರಿಮೇಯ್ಯುಪಾದಾಯ, ಪತ್ಥೇಮಿ ತವ ಸಾಸನಂ;

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ.

‘‘ಯಥಾ ಸೂಲಾವುತೋ ಪೋಸೋ, ರಾಜದಣ್ಡೇನ ತಜ್ಜಿತೋ;

ಸೂಲೇ ಸಾತಂ ಅವಿನ್ದನ್ತೋ, ಪರಿಮುತ್ತಿಂವ ಇಚ್ಛತಿ.

‘‘ತಥೇವಾಹಂ ಮಹಾವೀರ, ಭವದಣ್ಡೇನ ತಜ್ಜಿತೋ;

ಕಮ್ಮಸೂಲಾವುತೋ ಸನ್ತೋ, ಪಿಪಾಸಾವೇದನಟ್ಟಿತೋ.

‘‘ಭವೇ ಸಾತಂ ನ ವಿನ್ದಾಮಿ, ಡಯ್ಹನ್ತೋ ತೀಹಿ ಅಗ್ಗಿಭಿ;

ಪರಿಮುತ್ತಿಂ ಗವೇಸಾಮಿ, ಯಥಾಪಿ ರಾಜದಣ್ಡಿತೋ.

‘‘ಯಥಾ ವಿಸಾದೋ ಪುರಿಸೋ, ವಿಸೇನ ಪರಿಪೀಳಿತೋ;

ಅಗದಂ ಸೋ ಗವೇಸೇಯ್ಯ, ವಿಸಘಾತಾಯುಪಾಲನಂ.

‘‘ಗವೇಸಮಾನೋ ಪಸ್ಸೇಯ್ಯ, ಅಗದಂ ವಿಸಘಾತಕಂ;

ತಂ ಪಿವಿತ್ವಾ ಸುಖೀ ಅಸ್ಸ, ವಿಸಮ್ಹಾ ಪರಿಮುತ್ತಿಯಾ.

‘‘ತಥೇವಾಹಂ ಮಹಾವೀರ, ಯಥಾ ವಿಸಹತೋ ನರೋ;

ಸಮ್ಪೀಳಿತೋ ಅವಿಜ್ಜಾಯ, ಸದ್ಧಮ್ಮಾಗದಮೇಸಹಂ.

‘‘ಧಮ್ಮಾಗದಂ ಗವೇಸನ್ತೋ, ಅದ್ದಕ್ಖಿಂ ಸಕ್ಯಸಾಸನಂ;

ಅಗ್ಗಂ ಸಬ್ಬೋಸಧಾನಂ ತಂ, ಸಬ್ಬಸಲ್ಲವಿನೋದನಂ.

‘‘ಧಮ್ಮೋಸಧಂ ಪಿವಿತ್ವಾನ, ವಿಸಂ ಸಬ್ಬಂ ಸಮೂಹನಿಂ;

ಅಜರಾಮರಂ ಸೀತಿಭಾವಂ, ನಿಬ್ಬಾನಂ ಫಸ್ಸಯಿಂ ಅಹಂ.

‘‘ಯಥಾ ಭೂತಟ್ಟಿತೋ ಪೋಸೋ, ಭೂತಗ್ಗಾಹೇನ ಪೀಳಿತೋ;

ಭೂತವೇಜ್ಜಂ ಗವೇಸೇಯ್ಯ, ಭೂತಸ್ಮಾ ಪರಿಮುತ್ತಿಯಾ.

‘‘ಗವೇಸಮಾನೋ ಪಸ್ಸೇಯ್ಯ, ಭೂತವಿಜ್ಜಾಸು ಕೋವಿದಂ;

ತಸ್ಸ ಸೋ ವಿಹನೇ ಭೂತಂ, ಸಮೂಲಞ್ಚ ವಿನಾಸಯೇ.

‘‘ತಥೇವಾಹಂ ಮಹಾವೀರ, ತಮಗ್ಗಾಹೇನ ಪೀಳಿತೋ;

ಞಾಣಾಲೋಕಂ ಗವೇಸಾಮಿ, ತಮತೋ ಪರಿಮುತ್ತಿಯಾ.

‘‘ಅಥದ್ದಸಂ ಸಕ್ಯಮುನಿಂ, ಕಿಲೇಸತಮಸೋಧನಂ;

ಸೋ ಮೇ ತಮಂ ವಿನೋದೇಸಿ, ಭೂತವೇಜ್ಜೋವ ಭೂತಕಂ.

‘‘ಸಂಸಾರಸೋತಂ ಸಞ್ಛಿನ್ದಿಂ, ತಣ್ಹಾಸೋತಂ ನಿವಾರಯಿಂ;

ಭವಂ ಉಗ್ಘಾಟಯಿಂ ಸಬ್ಬಂ, ಭೂತವೇಜ್ಜೋವ ಮೂಲತೋ.

‘‘ಗರುಳೋ ಯಥಾ ಓಪತತಿ, ಪನ್ನಗಂ ಭಕ್ಖಮತ್ತನೋ;

ಸಮನ್ತಾ ಯೋಜನಸತಂ, ವಿಕ್ಖೋಭೇತಿ ಮಹಾಸರಂ.

‘‘ಪನ್ನಗಂ ಸೋ ಗಹೇತ್ವಾನ, ಅಧೋಸೀಸಂ ವಿಹೇಠಯಂ;

ಆದಾಯ ಸೋ ಪಕ್ಕಮತಿ, ಯೇನಕಾಮಂ ವಿಹಙ್ಗಮೋ.

‘‘ತಥೇವಾಹಂ ಮಹಾವೀರ, ಯಥಾಪಿ ಗರುಳೋ ಬಲೀ;

ಅಸಙ್ಖತಂ ಗವೇಸನ್ತೋ, ದೋಸೇ ವಿಕ್ಖಾಲಯಿಂ ಅಹಂ.

‘‘ದಿಟ್ಠೋ ಅಹಂ ಧಮ್ಮವರಂ, ಸನ್ತಿಪದಮನುತ್ತರಂ;

ಆದಾಯ ವಿಹರಾಮೇತಂ, ಗರುಳೋ ಪನ್ನಗಂ ಯಥಾ.

‘‘ಆಸಾವತೀ ನಾಮ ಲತಾ, ಜಾತಾ ಚಿತ್ತಲತಾವನೇ;

ತಸ್ಸಾ ವಸ್ಸಸಹಸ್ಸೇನ, ಏಕಂ ನಿಬ್ಬತ್ತತೇ ಫಲಂ.

‘‘ತಂ ದೇವಾ ಪಯಿರುಪಾಸನ್ತಿ, ತಾವದೂರಫಲೇ ಸತಿ;

ದೇವಾನಂ ಸಾ ಪಿಯಾ ಏವಂ, ಆಸಾವತೀ ಲತುತ್ತಮಾ.

‘‘ಸತಸಹಸ್ಸುಪಾದಾಯ, ತಾಹಂ ಪರಿಚರೇ ಮುನಿ;

ಸಾಯಂ ಪಾತಂ ನಮಸ್ಸಾಮಿ, ದೇವಾ ಆಸಾವತಿಂ ಯಥಾ.

‘‘ಅವಞ್ಝಾ ಪಾರಿಚರಿಯಾ, ಅಮೋಘಾ ಚ ನಮಸ್ಸನಾ;

ದೂರಾಗತಮ್ಪಿ ಮಂ ಸನ್ತಂ, ಖಣೋಯಂ ನ ವಿರಾಧಯಿ.

‘‘ಪಟಿಸನ್ಧಿಂ ನ ಪಸ್ಸಾಮಿ, ವಿಚಿನನ್ತೋ ಭವೇ ಅಹಂ;

ನಿರೂಪಧಿ ವಿಪ್ಪಮುತ್ತೋ, ಉಪಸನ್ತೋ ಚರಾಮಹಂ.

‘‘ಯಥಾಪಿ ಪದುಮಂ ನಾಮ, ಸೂರಿಯರಂಸೇನ ಪುಪ್ಫತಿ;

ತಥೇವಾಹಂ ಮಹಾವೀರ, ಬುದ್ಧರಂಸೇನ ಪುಪ್ಫಿತೋ.

‘‘ಯಥಾ ಬಲಾಕಯೋನಿಮ್ಹಿ, ನ ವಿಜ್ಜತಿ ಪುಮೋ ಸದಾ;

ಮೇಘೇಸು ಗಜ್ಜಮಾನೇಸು, ಗಬ್ಭಂ ಗಣ್ಹನ್ತಿ ತಾ ಸದಾ.

‘‘ಚಿರಮ್ಪಿ ಗಬ್ಭಂ ಧಾರೇನ್ತಿ, ಯಾವ ಮೇಘೋ ನ ಗಜ್ಜತಿ;

ಭಾರತೋ ಪರಿಮುಚ್ಚನ್ತಿ, ಯದಾ ಮೇಘೋ ಪವಸ್ಸತಿ.

‘‘ಪದುಮುತ್ತರಬುದ್ಧಸ್ಸ, ಧಮ್ಮಮೇಘೇನ ಗಜ್ಜತೋ;

ಸದ್ದೇನ ಧಮ್ಮಮೇಘಸ್ಸ, ಧಮ್ಮಗಬ್ಭಂ ಅಗಣ್ಹಹಂ.

‘‘ಸತಸಹಸ್ಸುಪಾದಾಯ, ಪುಞ್ಞಗಬ್ಭಂ ಧರೇಮಹಂ;