೮. ವೀರತ್ಥೇರಗಾಥಾವಣ್ಣನಾ

ಯೋ ದುದ್ದಮಿಯೋತಿ ಆಯಸ್ಮತೋ ವೀರತ್ಥೇರಸ್ಸ ಗಾಥಾ. ಕಾ ಉಪ್ಪತ್ತಿ? ಅಯಂ ಕಿರ ಇತೋ ಏಕನವುತೇ ಕಪ್ಪೇ ವಿಪಸ್ಸಿಸ್ಸ ಭಗವತೋ ವಸನಆವಾಸಂ ಪಟಿಜಗ್ಗಿ. ಏಕದಿವಸಞ್ಚ ಸಿನ್ಧುವಾರಪುಪ್ಫಸದಿಸಾನಿ ನಿಗ್ಗುಣ್ಠಿಪುಪ್ಫಾನಿ ಗಹೇತ್ವಾ ಭಗವನ್ತಂ ಪೂಜೇಸಿ. ಸೋ ತೇನ ಪುಞ್ಞಕಮ್ಮೇನ ದೇವಮನುಸ್ಸೇಸು ಸಂಸರನ್ತೋ ಇತೋ ಪಞ್ಚತಿಂಸೇ ಕಪ್ಪೇ ಖತ್ತಿಯಕುಲೇ ನಿಬ್ಬತ್ತಿತ್ವಾ ಮಹಾಪತಾಪೋ ನಾಮ ರಾಜಾ ಅಹೋಸಿ ಚಕ್ಕವತ್ತೀ. ಸೋ ಧಮ್ಮೇನ ಸಮೇನ ರಜ್ಜಂ ಕಾರೇನ್ತೋ ಸತ್ತೇ ಸಗ್ಗಮಗ್ಗೇ ಪತಿಟ್ಠಾಪೇಸಿ. ಪುನ ಇಮಸ್ಮಿಂ ಕಪ್ಪೇ ಕಸ್ಸಪಸ್ಸ ಭಗವತೋ ಕಾಲೇ ಮಹಾವಿಭವೋ ಸೇಟ್ಠಿ ಹುತ್ವಾ ಕಪಣದ್ಧಿಕಾದೀನಂ ದಾನಂ ದೇನ್ತೋ ಸಙ್ಘಸ್ಸ ಖೀರಭತ್ತಂ ಅದಾಸಿ. ಏವಂ ತತ್ಥ ತತ್ಥ ದಾನಮಯಂ ಪುಞ್ಞಸಮ್ಭಾರಂ ಕರೋನ್ತೋ ಇತರಞ್ಚ ನಿಬ್ಬಾನತ್ಥಂ ಸಮ್ಭರನ್ತೋ ದೇವಮನುಸ್ಸೇಸು ಸಂಸರಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿನಗರೇ ರಞ್ಞೋ ಪಸೇನದಿಸ್ಸ ಅಮಚ್ಚಕುಲೇ ನಿಬ್ಬತ್ತಿ, ‘‘ವೀರೋ’’ತಿಸ್ಸ ನಾಮಂ ಅಕಂಸು. ಸೋ ವಯಪ್ಪತ್ತೋ ನಾಮಾನುಗತೇಹಿ ಪತ್ತಬಲಜವಾದಿಗುಣೇಹಿ ಸಮನ್ನಾಗತೋ ಸಙ್ಗಾಮಸೂರೋ ಹುತ್ವಾ ಮಾತಾಪಿತೂಹಿ ನಿಬನ್ಧವಸೇನ ಕಾರಿತೇ ದಾರಪರಿಗ್ಗಹೇ ಏಕಂಯೇವ ಪುತ್ತಂ ಲಭಿತ್ವಾ ಪುಬ್ಬಹೇತುನಾ ಚೋದಿಯಮಾನೋ ಕಾಮೇಸು ಸಂಸಾರೇ ಚ ಆದೀನವಂ ದಿಸ್ವಾ ಸಂವೇಗಜಾತೋ ಪಬ್ಬಜಿತ್ವಾ ಘಟೇನ್ತೋ ವಾಯಮನ್ತೋ ನಚಿರಸ್ಸೇವ ಛಳಭಿಞ್ಞೋ ಅಹೋಸಿ. ತೇನ ವುತ್ತಂ ಅಪದಾನೇ (ಅಪ. ಥೇರ ೧.೨೧.೨೧-೨೪) –

‘‘ವಿಪಸ್ಸಿಸ್ಸ ಭಗವತೋ, ಆಸಿಮಾರಾಮಿಕೋ ಅಹಂ;

ನಿಗ್ಗುಣ್ಠಿಪುಪ್ಫಂ ಪಗ್ಗಯ್ಹ, ಬುದ್ಧಸ್ಸ ಅಭಿರೋಪಯಿಂ.

‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

‘‘ಪಞ್ಚವೀಸೇ ಇತೋ ಕಪ್ಪೇ, ಏಕೋ ಆಸಿಂ ಜನಾಧಿಪೋ;

ಮಹಾಪತಾಪನಾಮೇನ, ಚಕ್ಕವತ್ತೀ ಮಹಬ್ಬಲೋ.

‘‘ಕಿಲೇಸಾ ಝಾಪಿತಾ ಮಯ್ಹಂ…ಪೇ… ಕತಂ ಬುದ್ಧಸ್ಸ ಸಾಸನ’’ನ್ತಿ.

ಏವಂ ಪನ ಅರಹತ್ತಂ ಪತ್ವಾ ಫಲಸಮಾಪತ್ತಿಸುಖೇನ ವೀತಿನಾಮೇನ್ತಂ ಥೇರಂ ಪುರಾಣದುತಿಯಿಕಾ ಉಪ್ಪಬ್ಬಾಜೇತುಕಾಮಾ ಅನ್ತರನ್ತರಾ ನಾನಾನಯೇಹಿ ಪಲೋಭೇತುಂ ಪರಕ್ಕಮನ್ತೀ ಏಕದಿವಸಂ ದಿವಾವಿಹಾರಟ್ಠಾನಂ ಗನ್ತ್ವಾ ಇತ್ಥಿಕುತ್ತಾದೀನಿ ದಸ್ಸೇತುಂ ಆರಭಿ. ಅಥಾಯಸ್ಮಾ ವೀರೋ ‘‘ಮಂ ಪಲೋಭೇತುಕಾಮಾ ಸಿನೇರುಂ ಮಕಸಪಕ್ಖವಾತೇನ ಚಾಲೇತುಕಾಮಾ ವಿಯ ಯಾವ ಬಾಲಾ ವತಾಯಂ ಇತ್ಥೀ’’ತಿ ತಸ್ಸಾ ಕಿರಿಯಾಯ ನಿರತ್ಥಕಭಾವಂ ದೀಪೇನ್ತೋ ‘‘ಯೋ ದುದ್ದಮಿಯೋ’’ತಿ ಗಾಥಂ ಅಭಾಸಿ.

೮. ತತ್ಥ ಯೋ ದುದ್ದಮಿಯೋತಿಆದೀನಂ ಪದಾನಂ ಅತ್ಥೋ ಹೇಟ್ಠಾ ವುತ್ತೋಯೇವ. ಇದಂ ಪನೇತ್ಥ ಯೋಜನಾಮತ್ತಂ ಯೋ ಪುಬ್ಬೇ ಅದನ್ತ ಕಿಲೇಸತಾಯ ಪಚ್ಚತ್ಥಿಕೇಹಿ ವಾ ಸಙ್ಗಮಸೀಸೇ ದಮೇತುಂ ಜೇತುಂ ಅಸಕ್ಕುಣೇಯ್ಯತಾಯದುದ್ದಮಿಯೋ, ಇದಾನಿ ಪನ ಉತ್ತಮೇನ ದಮೇನ ದನ್ತೋ ಚತುಬ್ಬಿಧಸಮ್ಮಪ್ಪಮಧಾನವೀರಿಯಸಮ್ಪತ್ತಿಯಾ ವೀರೋ, ವುತ್ತನಯೇನೇವ ಸನ್ತುಸಿತೋ ವಿತಿಣ್ಣಕಙ್ಖೋ ವಿಜಿತಾವೀ ಅಪೇತಲೋಮಹಂಸೋ ವೀರೋ ವೀರನಾಮಕೋ ಅನವಸೇಸತೋ ಕಿಲೇಸಪರಿನಿಬ್ಬಾನೇನ ಪರಿನಿಬ್ಬುತೋ, ತತೋ ಏವ ಠಿತಸಭಾವೋ, ನ ತಾದಿಸಾನಂ ಸತೇನಪಿ ಸಹಸ್ಸೇನಪಿ ಚಾಲನೀಯೋತಿ. ತಂ ಸುತ್ವಾ ಸಾ ಇತ್ಥೀ – ‘‘ಮಯ್ಹಂ ಸಾಮಿಕೇ ಏವಂ ಪಟಿಪನ್ನೇ ಕೋ ಮಯ್ಹಂ ಘರಾವಾಸೇನ ಅತ್ಥೋ’’ತಿ ಸಂವೇಗಜಾತಾ ಭಿಕ್ಖುನೀಸು ಪಬ್ಬಜಿತ್ವಾ ನಚಿರಸ್ಸೇವ ತೇವಿಜ್ಜಾ ಅಹೋಸೀತಿ.

ವೀರತ್ಥೇರಗಾಥಾವಣ್ಣನಾ ನಿಟ್ಠಿತಾ.