೩. ನನ್ದಕಪೇತವತ್ಥುವಣ್ಣನಾ

ರಾಜಾ ಪಿಙ್ಗಲಕೋ ನಾಮಾತಿ ಇದಂ ನನ್ದಕಪೇತವತ್ಥು. ತಸ್ಸ ಕಾ ಉಪ್ಪತ್ತಿ? ಸತ್ಥು ಪರಿನಿಬ್ಬಾನತೋ ವಸ್ಸಸತದ್ವಯಸ್ಸ ಅಚ್ಚಯೇನ ಸುರಟ್ಠವಿಸಯೇ ಪಿಙ್ಗಲೋ ನಾಮ ರಾಜಾ ಅಹೋಸಿ. ತಸ್ಸ ಸೇನಾಪತಿ ನನ್ದಕೋ ನಾಮ ಮಿಚ್ಛಾದಿಟ್ಠೀ ವಿಪರೀತದಸ್ಸನೋ ‘‘ನತ್ಥಿ ದಿನ್ನ’’ನ್ತಿಆದಿನಾ ಮಿಚ್ಛಾಗಾಹಂ ಪಗ್ಗಯ್ಹ ವಿಚರಿ. ತಸ್ಸ ಧೀತಾ ಉತ್ತರಾ ನಾಮ ಉಪಾಸಿಕಾ ಪತಿರೂಪೇ ಕುಲೇ ದಿನ್ನಾ ಅಹೋಸಿ. ನನ್ದಕೋ ಪನ ಕಾಲಂ ಕತ್ವಾ ವಿಞ್ಝಾಟವಿಯಂ ಮಹತಿ ನಿಗ್ರೋಧರುಕ್ಖೇ ವೇಮಾನಿಕಪೇತೋ ಹುತ್ವಾ ನಿಬ್ಬತ್ತಿ. ತಸ್ಮಿಂ ಕಾಲಕತೇ ಉತ್ತರಾ ಸುಚಿಸೀತಲಗನ್ಧೋದಕಪೂರಿತಂ ಪಾನೀಯಘಟಂ ಕುಮ್ಮಾಸಾಭಿಸಙ್ಖತೇಹಿ ವಣ್ಣಗನ್ಧರಸಸಮ್ಪನ್ನೇಹಿ ಪೂವೇಹಿ ಪರಿಪುಣ್ಣಸರಾವಕಞ್ಚ ಅಞ್ಞತರಸ್ಸ ಖೀಣಾಸವತ್ಥೇರಸ್ಸ ದತ್ವಾ ‘‘ಅಯಂ ದಕ್ಖಿಣಾ ಮಯ್ಹಂ ಪಿತು ಉಪಕಪ್ಪತೂ’’ತಿ ಉದ್ದಿಸಿ, ತಸ್ಸ ತೇನ ದಾನೇನ ದಿಬ್ಬಪಾನೀಯಂ ಅಪರಿಮಿತಾ ಚ ಪೂವಾ ಪಾತುಭವಿಂಸು. ತಂ ದಿಸ್ವಾ ಸೋ ಏವಂ ಚಿನ್ತೇಸಿ – ‘‘ಪಾಪಕಂ ವತ ಮಯಾ ಕತಂ, ಯಂ ಮಹಾಜನೋ ‘ನತ್ಥಿ ದಿನ್ನ’ನ್ತಿಆದಿನಾ ಮಿಚ್ಛಾಗಾಹಂ ಗಾಹಿತೋ. ಇದಾನಿ ಪನ ಪಿಙ್ಗಲೋ ರಾಜಾ ಧಮ್ಮಾಸೋಕಸ್ಸ ರಞ್ಞೋ ಓವಾದಂ ದಾತುಂ ಗತೋ, ಸೋ ತಂ ತಸ್ಸ ದತ್ವಾ ಆಗಮಿಸ್ಸತಿ, ಹನ್ದಾಹಂ ನತ್ಥಿಕದಿಟ್ಠಿಂ ವಿನೋದೇಸ್ಸಾಮೀ’’ತಿ. ನ ಚಿರೇನೇವ ಚ ಪಿಙ್ಗಲೋ ರಾಜಾ ಧಮ್ಮಾಸೋಕಸ್ಸ ರಞ್ಞೋ ಓವಾದಂ ದತ್ವಾ ಪಟಿನಿವತ್ತನ್ತೋ ಮಗ್ಗಂ ಪಟಿಪಜ್ಜಿ.

ಅಥ ಸೋ ಪೇತೋ ಅತ್ತನೋ ವಸನಟ್ಠಾನಾಭಿಮುಖಂ ತಂ ಮಗ್ಗಂ ನಿಮ್ಮಿನಿ. ರಾಜಾ ಠಿತಮಜ್ಝನ್ಹಿಕೇ ಸಮಯೇ ತೇನ ಮಗ್ಗೇನ ಗಚ್ಛತಿ. ತಸ್ಸ ಗಛನ್ತಸ್ಸ ಪುರತೋ ಮಗ್ಗೋ ದಿಸ್ಸತಿ, ಪಿಟ್ಠಿತೋ ಪನಸ್ಸ ಅನ್ತರಧಾಯತಿ. ಸಬ್ಬಪಚ್ಛತೋ ಗಚ್ಛನ್ತೋ ಪುರಿಸೋ ಮಗ್ಗಂ ಅನ್ತರಹಿತಂ ದಿಸ್ವಾ ಭೀತೋ ವಿಸ್ಸರಂ ವಿರವನ್ತೋ ಧಾವಿತ್ವಾ ರಞ್ಞೋ ಆರೋಚೇಸಿ, ತಂ ಸುತ್ವಾ ರಾಜಾ ಭೀತೋ ಸಂವಿಗ್ಗಮಾನಸೋ ಹತ್ಥಿಕ್ಖನ್ಧೇ ಠತ್ವಾ ಚತಸ್ಸೋ ದಿಸಾ ಓಲೋಕೇನ್ತೋ ಪೇತಸ್ಸ ವಸನನಿಗ್ರೋಧರುಕ್ಖಂ ದಿಸ್ವಾ ತದಭಿಮುಖೋ ಅಗಮಾಸಿ ಸದ್ಧಿಂ ಚತುರಙ್ಗಿನಿಯಾ ಸೇನಾಯ. ಅಥಾನುಕ್ಕಮೇನ ರಞ್ಞೇ ತಂ ಠಾನಂ ಪತ್ತೇ ಪೇತೋ ಸಬ್ಬಾಭರಣವಿಭೂಸಿತೋ ರಾಜಾನಂ ಉಪಸಙ್ಕಮಿತ್ವಾ ಪಟಿಸನ್ಥಾರಂ ಕತ್ವಾ ಪೂವೇ ಚ ಪಾನೀಯಞ್ಚ ದಾಪೇಸಿ. ರಾಜಾ ಸಪರಿಜನೋ ನ್ಹತ್ವಾ ಪೂವೇ ಖಾದಿತ್ವಾ ಪಾನೀಯಂ ಪಿವಿತ್ವಾ ಪಟಿಪ್ಪಸ್ಸದ್ಧಮಗ್ಗಕಿಲಮಥೋ ‘‘ದೇವತಾ ನುಸಿ ಗನ್ಧಬ್ಬೋ’’ತಿಆದಿನಾ ಪೇತಂ ಪುಚ್ಛಿ. ಪೇತೋ ಆದಿತೋ ಪಟ್ಠಾಯ ಅತ್ತನೋ ಪವತ್ತಿಂ ಆಚಿಕ್ಖಿತ್ವಾ ರಾಜಾನಂ ಮಿಚ್ಛಾದಸ್ಸನತೋ ವಿಮೋಚೇತ್ವಾ ಸರಣೇಸು ಸೀಲೇಸು ಚ ಪತಿಟ್ಠಾಪೇಸಿ. ತಮತ್ಥಂ ದಸ್ಸೇತುಂ ಸಙ್ಗೀತಿಕಾರಾ –

೬೫೮. ‘‘ರಾಜಾ ಪಿಙ್ಗಲಕೋ ನಾಮ, ಸುರಟ್ಠಾನಂ ಅಧಿಪತಿ ಅಹು;

ಮೋರಿಯಾನಂ ಉಪಟ್ಠಾನಂ ಗನ್ತ್ವಾ, ಸುರಟ್ಠಂ ಪುನರಾಗಮಾ.

೬೫೯. ‘‘ಉಣ್ಹೇ ಮಜ್ಝನ್ಹಿಕೇ ಕಾಲೇ, ರಾಜಾ ಪಙ್ಕಂ ಉಪಾಗಮಿ;

ಅದ್ದಸ ಮಗ್ಗಂ ರಮಣೀಯಂ, ಪೇತಾನಂ ತಂ ವಣ್ಣುಪಥಂ.

೬೬೦. ಸಾರಥಿಂ ಆಮನ್ತಯೀ ರಾಜಾ –

‘‘‘ಅಯಂ ಮಗ್ಗೋ ರಮಣೀಯೋ, ಖೇಮೋ ಸೋವತ್ಥಿಕೋ ಸಿವೋ;

ಇಮಿನಾ ಸಾರಥಿ ಯಾಮ, ಸುರಟ್ಠಾನಂ ಸನ್ತಿಕೇ ಇತೋ’.

೬೬೧. ‘‘ತೇನ ಪಾಯಾಸಿ ಸೋರಟ್ಠೋ, ಸೇನಾಯ ಚತುರಙ್ಗಿನಿಯಾ;

ಉಬ್ಬಿಗ್ಗರೂಪೋ ಪುರಿಸೋ, ಸೋರಟ್ಠಂ ಏತದಬ್ರವಿ.

೬೬೨. ‘‘‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಭಿಂಸನಂ ಲೋಮಹಂಸನಂ;

ಪುರತೋ ದಿಸ್ಸತಿ ಮಗ್ಗೋ, ಪಚ್ಛತೋ ಚ ನ ದಿಸ್ಸತಿ.

೬೬೩. ‘‘‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಯಮಪುರಿಸಾನ ಸನ್ತಿಕೇ;

ಅಮಾನುಸೋ ವಾಯತಿ ಗನ್ಧೋ, ಘೋಸೋ ಸುಯ್ಯತಿ ದಾರುಣೋ’.

೬೬೪. ‘‘ಸಂವಿಗ್ಗೋ ರಾಜಾ ಸೋರಟ್ಠೋ, ಸಾರಥಿಂ ಏತದಬ್ರವಿ;

‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಭಿಂಸನಂ ಲೋಮಹಂಸನಂ;

ಪುರತೋ ದಿಸ್ಸತಿ ಮಗ್ಗೋ, ಪಚ್ಛತೋ ಚ ನ ದಿಸ್ಸತಿ.

೬೬೫. ‘‘‘ಕುಮ್ಮಗ್ಗಂ ಪಟಿಪನ್ನಮ್ಹಾ, ಯಮಪುರಿಸಾನ ಸನ್ತಿಕೇ;

ಅಮಾನುಸೋ ವಾಯತಿ ಗನ್ಧೋ, ಘೋಸೋ ಸುಯ್ಯತಿ ದಾರುಣೋ’.

೬೬೬. ‘‘ಹತ್ಥಿಕ್ಖನ್ಧಂ ಸಮಾರುಯ್ಹ, ಓಲೋಕೇನ್ತೋ ಚತುದ್ದಿಸಾ;

ಅದ್ದಸ ನಿಗ್ರೋಧಂ ರಮಣೀಯಂ, ಪಾದಪಂ ಛಾಯಾಸಮ್ಪನ್ನಂ;

ನೀಲಬ್ಭವಣ್ಣಸದಿಸಂ, ಮೇಘವಣ್ಣಸಿರೀನಿಭಂ.

೬೬೭. ‘‘ಸಾರಥಿಂ ಆಮನ್ತಯೀ ರಾಜಾ, ‘ಕಿಂ ಏಸೋ ದಿಸ್ಸತಿ ಬ್ರಹಾ;

ನೀಲಬ್ಭವಣ್ಣಸದಿಸೋ, ಮೇಘವಣ್ಣಸಿರೀನಿಭೋ’.

೬೬೮. ‘‘ನಿಗ್ರೋಧೋ ಸೋ ಮಹಾರಾಜ, ಪಾದಪೋ ಛಾಯಾಸಮ್ಪನ್ನೋ;

ನೀಲಬ್ಭವಣ್ಣಸದಿಸೋ, ಮೇಘವಣ್ಣಸಿರೀನಿಭೋ.

೬೬೯. ‘‘ತೇನ ಪಾಯಾಸಿ ಸೋರಟ್ಠೋ, ಯೇನ ಸೋ ದಿಸ್ಸತೇ ಬ್ರಹಾ;

ನೀಲಬ್ಭವಣ್ಣಸದಿಸೋ, ಮೇಘವಣ್ಣಸಿರೀನಿಭೋ.

೬೭೦. ‘‘ಹತ್ಥಿಕ್ಖನ್ಧತೋ ಓರುಯ್ಹ, ರಾಜಾ ರುಕ್ಖಂ ಉಪಾಗಮಿ;

ನಿಸೀದಿ ರುಕ್ಖಮೂಲಸ್ಮಿಂ, ಸಾಮಚ್ಚೋ ಸಪರಿಜ್ಜನೋ;

ಪೂರಂ ಪಾನೀಯಸರಕಂ, ಪೂವೇ ವಿತ್ತೇ ಚ ಅದ್ದಸ.

೬೭೧. ‘‘ಪುರಿಸೋ ಚ ದೇವವಣ್ಣೀ, ಸಬ್ಬಾಭರಣಭೂಸಿತೋ;

ಉಪಸಙ್ಕಮಿತ್ವಾ ರಾಜಾನಂ, ಸೋರಟ್ಠಂ ಏತದಬ್ರವಿ.

೬೭೨. ‘‘‘ಸ್ವಾಗತಂ ತೇ ಮಹಾರಾಜ, ಅಥೋ ತೇ ಅದುರಾಗತಂ;

ಪಿವತು ದೇವೋ ಪಾನೀಯಂ, ಪೂವೇ ಖಾದ ಅರಿನ್ದಮ’.

೬೭೩. ‘‘ಪಿವಿತ್ವಾ ರಾಜಾ ಪಾನೀಯಂ, ಸಾಮಚ್ಚೋ ಸಪರಿಜ್ಜನೋ;

ಪೂವೇ ಖಾದಿತ್ವಾ ಪಿತ್ವಾ ಚ, ಸೋರಟ್ಠೋ ಏತದಬ್ರವಿ.

೬೭೪. ‘‘ದೇವತಾ ನುಸಿ ಗನ್ಧಬ್ಬೋ, ಅದು ಸಕ್ಕೋ ಪುರಿನ್ದದೋ;

ಅಜಾನನ್ತಾ ತಂ ಪುಚ್ಛಾಮ, ಕಥಂ ಜಾನೇಮು ತಂ ಮಯನ್ತಿ.

೬೭೫. ‘‘ನಾಮ್ಹಿ ದೇವೋ ನ ಗನ್ಧಬ್ಬೋ, ನಾಪಿ ಸಕ್ಕೋ ಪುರಿನ್ದದೋ;

ಪೇತೋ ಅಹಂ ಮಹಾರಾಜ, ಸುರಟ್ಠಾ ಇಧ ಮಾಗತೋತಿ.

೬೭೬. ‘‘ಕಿಂಸೀಲೋ ಕಿಂಸಮಾಚಾರೋ, ಸುರಟ್ಠಸ್ಮಿಂ ಪುರೇ ತುವಂ;

ಕೇನ ತೇ ಬ್ರಹ್ಮಚರಿಯೇನ, ಆನುಭಾವೋ ಅಯಂ ತವಾತಿ.

೬೭೭. ‘‘ತಂ ಸುಣೋಹಿ ಮಹಾರಾಜ, ಅರಿನ್ದಮ ರಟ್ಠವಡ್ಢನ;

ಅಮಚ್ಚಾ ಪಾರಿಸಜ್ಜಾ ಚ, ಬ್ರಾಹ್ಮಣೋ ಚ ಪುರೋಹಿತೋ.

೬೭೮. ‘‘ಸುರಟ್ಠಸ್ಮಿಂ ಅಹಂ ದೇವ, ಪುರಿಸೋ ಪಾಪಚೇತಸೋ;

ಮಿಚ್ಛಾದಿಟ್ಠಿ ಚ ದುಸ್ಸೀಲೋ, ಕದರಿಯೋ ಪರಿಭಾಸಕೋ.

೬೭೯. ‘‘ದದನ್ತಾನಂ ಕರೋನ್ತಾನಂ, ವಾರಯಿಸ್ಸಂ ಬಹುಜ್ಜನಂ;

ಅಞ್ಞೇಸಂ ದದಮಾನಾನಂ, ಅನ್ತರಾಯಕರೋ ಅಹಂ.

೬೮೦. ‘‘ವಿಪಾಕೋ ನತ್ಥಿ ದಾನಸ್ಸ, ಸಂಯಮಸ್ಸ ಕುತೋ ಫಲಂ;

ನತ್ಥಿ ಆಚರಿಯೋ ನಾಮ, ಅದನ್ತಂ ಕೋ ದಮೇಸ್ಸತಿ.

೬೮೧. ‘‘ಸಮತುಲ್ಯಾನಿ ಭೂತಾನಿ, ಕುತೋ ಜೇಟ್ಠಾಪಚಾಯಿಕೋ;

ನತ್ಥಿ ಬಲಂ ವೀರಿಯಂ ವಾ, ಕುತೋ ಉಟ್ಠಾನಪೋರಿಸಂ.

೬೮೨. ‘‘ನತ್ಥಿ ದಾನಫಲಂ ನಾಮ, ನ ವಿಸೋಧೇತಿ ವೇರಿನಂ;

ಲದ್ಧೇಯ್ಯಂ ಲಭತೇ ಮಚ್ಚೋ, ನಿಯತಿಪರಿಣಾಮಜಂ.

೬೮೩. ‘‘ನತ್ಥಿ ಮಾತಾ ಪಿತಾ ಭಾತಾ, ಲೋಕೋ ನತ್ಥಿ ಇತೋ ಪರಂ;

ನತ್ಥಿ ದಿನ್ನಂ ನತ್ಥಿ ಹುತಂ, ಸುನಿಹಿತಂ ನ ವಿಜ್ಜತಿ.

೬೮೪. ‘‘ಯೋಪಿ ಹನೇಯ್ಯ ಪುರಿಸಂ, ಪರಸ್ಸ ಛಿನ್ದತೇ ಸಿರಂ;

ನ ಕೋಚಿ ಕಞ್ಚಿ ಹನತಿ, ಸತ್ತನ್ನಂ ವಿವರಮನ್ತರೇ.

೬೮೫. ‘‘ಅಚ್ಛೇಜ್ಜಾಭೇಜ್ಜೋ ಹಿ ಜೀವೋ, ಅಟ್ಠಂಸೋ ಗುಳಪರಿಮಣ್ಡಲೋ;

ಯೋಜನಾನಂ ಸತಂ ಪಞ್ಚ, ಕೋ ಜೀವಂ ಛೇತ್ತುಮರಹತಿ.

೬೮೬. ‘‘ಯಥಾ ಸುತ್ತಗುಳೇ ಖಿತ್ತೇ, ನಿಬ್ಬೇಠೇನ್ತಂ ಪಲಾಯತಿ;

ಏವಮೇವ ಚ ಸೋ ಜೀವೋ, ನಿಬ್ಬೇಠೇನ್ತೋ ಪಲಾಯತಿ.

೬೮೭. ‘‘ಯಥಾ ಗಾಮತೋ ನಿಕ್ಖಮ್ಮ, ಅಞ್ಞಂ ಗಾಮಂ ಪವಿಸತಿ;

ಏವಮೇವ ಚ ಸೋ ಜೀವೋ, ಅಞ್ಞಂ ಬೋನ್ದಿಂ ಪವಿಸತಿ.

೬೮೮. ‘‘ಯಥಾ ಗೇಹತೋ ನಿಕ್ಖಮ್ಮ, ಅಞ್ಞಂ ಗೇಹಂ ಪವಿಸತಿ;

ಏವಮೇವ ಚ ಸೋ ಜೀವೋ, ಅಞ್ಞಂ ಬೋನ್ದಿಂ ಪವಿಸತಿ.

೬೮೯. ‘‘ಚುಲ್ಲಾಸೀತಿ ಮಹಾಕಪ್ಪಿನೋ, ಸತಸಹಸ್ಸಾನಿ ಹಿ;

ಯೇ ಬಾಲಾ ಯೇ ಚ ಪಣ್ಡಿತಾ, ಸಂಸಾರಂ ಖೇಪಯಿತ್ವಾನ;

ದುಕ್ಖಸ್ಸನ್ತಂ ಕರಿಸ್ಸರೇ.

೬೯೦. ‘‘ಮಿತಾನಿ ಸುಖದುಕ್ಖಾನಿ, ದೋಣೇಹಿ ಪಿಟಕೇಹಿ ಚ;

ಜಿನೋ ಸಬ್ಬಂ ಪಜಾನಾತಿ, ಸಮ್ಮೂಳ್ಹಾ ಇತರಾ ಪಜಾ.

೬೯೧. ‘‘ಏವಂದಿಟ್ಠಿ ಪುರೇ ಆಸಿಂ, ಸಮ್ಮೂಳ್ಹೋ ಮೋಹಪಾರುತೋ;

ಮಿಚ್ಛಾದಿಟ್ಠಿ ಚ ದುಸ್ಸೀಲೋ, ಕದರಿಯೋ ಪರಿಭಾಸಕೋ.

೬೯೨. ‘‘ಓರಂ ಮೇ ಛಹಿ ಮಾಸೇಹಿ, ಕಾಲಕಿರಿಯಾ ಭವಿಸ್ಸತಿ;

ಏಕನ್ತಕಟುಕಂ ಘೋರಂ, ನಿರಯಂ ಪಪತಿಸ್ಸಹಂ.

೬೯೩. ‘‘ಚತುಕ್ಕಣ್ಣಂ ಚತುದ್ವಾರಂ, ವಿಭತ್ತಂ ಭಾಗಸೋ ಮಿತಂ;

ಅಯೋಪಾಕಾರಪರಿಯನ್ತಂ, ಅಯಸಾ ಪಟಿಕುಜ್ಜಿತಂ.

೬೯೪. ‘‘ತಸ್ಸ ಅಯೋಮಯಾ ಭೂಮಿ, ಜಲಿತಾ ತೇಜಸಾ ಯುತಾ;

ಸಮನ್ತಾ ಯೋಜನಸತಂ, ಫರಿತ್ವಾ ತಿಟ್ಠತಿ ಸಬ್ಬದಾ.

೬೯೫. ‘‘ವಸ್ಸಾನಿ ಸತಸಹಸ್ಸಾನಿ, ಘೋಸೋ ಸುಯ್ಯತಿ ತಾವದೇ;

ಲಕ್ಖೋ ಏಸೋ ಮಹಾರಾಜ, ಸತಭಾಗವಸ್ಸಕೋಟಿಯೋ.

೬೯೬. ‘‘ಕೋಟಿಸತಸಹಸ್ಸಾನಿ, ನಿರಯೇ ಪಚ್ಚರೇ ಜನಾ;

ಮಿಚ್ಛಾದಿಟ್ಠೀ ಚ ದುಸ್ಸೀಲಾ, ಯೇ ಚ ಅರಿಯೂಪವಾದಿನೋ.

೬೯೭. ‘‘ತತ್ಥಾಹಂ ದೀಘಮದ್ಧಾನಂ, ದುಕ್ಖಂ ವೇದಿಸ್ಸ ವೇದನಂ;

ಫಲಂ ಪಾಪಸ್ಸ ಕಮ್ಮಸ್ಸ, ತಸ್ಮಾ ಸೋಚಾಮಹಂ ಭುಸಂ.

೬೯೮. ‘‘ತಂ ಸುಣೋಹಿ ಮಹಾರಾಜ, ಅರಿನ್ದಮ ರಟ್ಠವಡ್ಢನ;

ಧೀತಾ ಮಯ್ಹಂ ಮಹಾರಾಜ, ಉತ್ತರಾ ಭದ್ದಮತ್ಥು ತೇ.

೬೯೯. ‘‘ಕರೋತಿ ಭದ್ದಕಂ ಕಮ್ಮಂ, ಸೀಲೇಸುಪೋಸಥೇ ರತಾ;

ಸಞ್ಞತಾ ಸಂವಿಭಾಗೀ ಚ, ವದಞ್ಞೂ ವೀತಮಚ್ಛರಾ.

೭೦೦. ‘‘ಅಖಣ್ಡಕಾರೀ ಸಿಕ್ಖಾಯ, ಸುಣ್ಹಾ ಪರಕುಲೇಸು ಚ;

ಉಪಾಸಿಕಾ ಸಕ್ಯಮುನಿನೋ, ಸಮ್ಬುದ್ಧಸ್ಸ ಸಿರೀಮತೋ.

೭೦೧. ‘‘ಭಿಕ್ಖು ಚ ಸೀಲಸಮ್ಪನ್ನೋ, ಗಾಮಂ ಪಿಣ್ಡಾಯ ಪಾವಿಸಿ;

ಓಕ್ಖಿತ್ತಚಕ್ಖು ಸತಿಮಾ, ಗುತ್ತದ್ವಾರೋ ಸುಸಂವುತೋ.

೭೦೨. ‘‘ಸಪದಾನಂ ಚರಮಾನೋ, ಅಗಮಾ ತಂ ನಿವೇಸನಂ;

ತಮದ್ದಸ ಮಹಾರಾಜ, ಉತ್ತರಾ ಭದ್ದಮತ್ಥು ತೇ.

೭೦೩. ‘‘ಪೂರಂ ಪಾನೀಯಸರಕಂ, ಪೂವೇ ವಿತ್ತೇ ಚ ಸಾ ಅದಾ;

ಪಿತಾ ಮೇ ಕಾಲಕತೋ ಭನ್ತೇ, ತಸ್ಸೇತಂ ಉಪಕಪ್ಪತು.

೭೦೪. ‘‘ಸಮನನ್ತರಾನುದ್ದಿಟ್ಠೇ, ವಿಪಾಕೋ ಉದಪಜ್ಜಥ;

ಭುಞ್ಜಾಮಿ ಕಾಮಕಾಮೀಹಂ, ರಾಜಾ ವೇಸ್ಸವಣೋ ಯಥಾ.

೭೦೫. ‘‘ತಂ ಸುಣೋಹಿ ಮಹಾರಾಜ, ಅರಿನ್ದಮ ರಟ್ಠವಡ್ಢನ;

ಸದೇವಕಸ್ಸ ಲೋಕಸ್ಸ, ಬುದ್ಧೋ ಅಗ್ಗೋ ಪವುಚ್ಚತಿ;

ತಂ ಬುದ್ಧಂ ಸರಣಂ ಗಚ್ಛ, ಸಪುತ್ತದಾರೋ ಅರಿನ್ದಮ.

೭೦೬. ‘‘ಅಟ್ಠಙ್ಗಿಕೇನ ಮಗ್ಗೇನ, ಫುಸನ್ತಿ ಅಮತಂ ಪದಂ;

ತಂ ಧಮ್ಮಂ ಸರಣಂ ಗಚ್ಛ, ಸಪುತ್ತದಾರೋ ಅರಿನ್ದಮ.

೭೦೭. ‘‘ಚತ್ತಾರೋ ಚ ಪಟಿಪನ್ನಾ, ಚತ್ತಾರೋ ಚ ಫಲೇ ಠಿತಾ;

ಏಸ ಸಙ್ಘೋ ಉಜುಭೂತೋ, ಪಞ್ಞಾಸೀಲಸಮಾಹಿತೋ;

ತಂ ಸಙ್ಘಂ ಸರಣಂ ಗಚ್ಛ, ಸಪುತ್ತದಾರೋ ಅರಿನ್ದಮ.

೭೦೮. ‘‘ಪಾಣಾತಿಪಾತಾ ವಿರಮಸ್ಸು ಖಿಪ್ಪಂ, ಲೋಕೇ ಅದಿನ್ನಂ ಪರಿವಜ್ಜಯಸ್ಸು;

ಅಮಜ್ಜಪೋ ಮಾ ಚ ಮುಸಾ ಅಭಾಣಿ, ಸಕೇನ ದಾರೇನ ಚ ಹೋಹಿ ತುಟ್ಠೋತಿ.

೭೦೯. ‘‘ಅತ್ಥಕಾಮೋಸಿ ಮೇ ಯಕ್ಖ, ಹಿತಕಾಮೋಸಿ ದೇವತೇ;

ಕರೋಮಿ ತುಯ್ಹಂ ವಚನಂ, ತ್ವಂಸಿ ಆಚರಿಯೋ ಮಮ.

೭೧೦. ‘‘ಉಪೇಮಿ ಸರಣಂ ಬುದ್ಧಂ, ಧಮ್ಮಞ್ಚಾಪಿ ಅನುತ್ತರಂ;

ಸಙ್ಘಞ್ಚ ನರದೇವಸ್ಸ, ಗಚ್ಛಾಮಿ ಸರಣಂ ಅಹಂ.

೭೧೧. ‘‘ಪಾಣಾತಿಪಾತಾ ವಿರಮಾಮಿ ಖಿಪ್ಪಂ, ಲೋಕೇ ಅದಿನ್ನಂ ಪರಿವಜ್ಜಯಾಮಿ;

ಅಮಜ್ಜಪೋ ನೋ ಚ ಮುಸಾ ಭಣಾಮಿ, ಸಕೇನ ದಾರೇನ ಚ ಹೋಮಿ ತುಟ್ಠೋ.

೭೧೨. ‘‘ಓಫುಣಾಮಿ ಮಹಾವಾತೇ, ನದಿಯಾ ಸೀಘಗಾಮಿಯಾ;

ವಮಾಮಿ ಪಾಪಿಕಂ ದಿಟ್ಠಿಂ, ಬುದ್ಧಾನಂ ಸಾಸನೇ ರತೋ.

೭೧೩. ‘‘ಇದಂ ವತ್ವಾನ ಸೋರಟ್ಠೋ, ವಿರಮಿತ್ವಾ ಪಾಪದಸ್ಸನಾ;

ನಮೋ ಭಗವತೋ ಕತ್ವಾ, ಪಾಮೋಕ್ಖೋ ರಥಮಾರುಹೀ’’ತಿ. – ಗಾಥಾಯೋ ಅವೋಚುಂ;

೬೫೮-೯. ತತ್ಥ ರಾಜಾ ಪಿಙ್ಗಲಕೋ ನಾಮ, ಸುರಟ್ಠಾನಂ ಅಧಿಪತಿ ಅಹೂತಿ ಪಿಙ್ಗಲಚಕ್ಖುತಾಯ ‘‘ಪಿಙ್ಗಲೋ’’ತಿ ಪಾಕಟನಾಮೋ ಸುರಟ್ಠದೇಸಸ್ಸ ಇಸ್ಸರೋ ರಾಜಾ ಅಹೋಸಿ. ಮೋರಿಯಾನನ್ತಿ ಮೋರಿಯರಾಜೂನಂ, ಧಮ್ಮಾಸೋಕಂ ಸನ್ಧಾಯ ವದತಿ. ಸುರಟ್ಠಂ ಪುನರಾಗಮಾತಿ ಸುರಟ್ಠಸ್ಸ ವಿಸಯಂ ಉದ್ದಿಸ್ಸ ಸುರಟ್ಠಗಾಮಿಮಗ್ಗಂ ಪಚ್ಚಾಗಞ್ಛಿ. ಪಙ್ಕನ್ತಿ ಮುದುಭೂಮಿಂ. ವಣ್ಣುಪಥನ್ತಿ ಪೇತೇನ ನಿಮ್ಮಿತಂ ಮರೂಭೂಮಿಮಗ್ಗಂ.

೬೬೦. ಖೇಮೋತಿ ನಿಬ್ಭಯೋ. ಸೋವತ್ಥಿಕೋತಿ ಸೋತ್ಥಿಭಾವಾವಹೋ. ಸಿವೋತಿ ಅನುಪದ್ದವೋ. ಸುರಟ್ಠಾನಂ ಸನ್ತಿಕೇ ಇತೋತಿ ಇಮಿನಾ ಮಗ್ಗೇನ ಗಚ್ಛನ್ತಾ ಮಯಂ ಸುರಟ್ಠವಿಸಯಸ್ಸ ಸಮೀಪೇಯೇವ.

೬೬೧-೨. ಸೋರಟ್ಠೋತಿ ಸುರಟ್ಠಾಧಿಪತಿ. ಉಬ್ಬಿಗ್ಗರೂಪೋತಿ ಉತ್ರಸ್ತಸಭಾವೋ. ಭಿಂಸನನ್ತಿ ಭಯಜನನಂ. ಲೋಮಹಂಸನನ್ತಿ ಭಿಂಸನಕಭಾವೇನ ಲೋಮಾನಂ ಹಂಸಾಪನಂ.

೬೬೩. ಯಮಪುರಿಸಾನ ಸನ್ತಿಕೇತಿ ಪೇತಾನಂ ಸಮೀಪೇ ವತ್ತಾಮ. ಅಮಾನುಸೋ ವಾಯತಿ ಗನ್ಧೋತಿ ಪೇತಾನಂ ಸರೀರಗನ್ಧೋ ವಾಯತಿ. ಘೋಸೋ ಸುಯ್ಯತಿ ದಾರುಣೋತಿ ಪಚ್ಚೇಕನಿರಯೇಸು ಕಾರಣಂ ಕಾರಿಯಮಾನಾನಂ ಸತ್ತಾನಂ ಘೋರತರೋ ಸದ್ದೋ ಸುಯ್ಯತಿ.

೬೬೬. ಪಾದಪನ್ತಿ ಪಾದಸದಿಸೇಹಿ ಮೂಲಾವಯವೇಹಿ ಉದಕಸ್ಸ ಪಿವನತೋ ‘‘ಪಾದಪೋ’’ತಿ ಲದ್ಧನಾಮಂ ತರುಂ. ಛಾಯಾಸಮ್ಪನ್ನನ್ತಿ ಸಮ್ಪನ್ನಚ್ಛಾಯಂ. ನೀಲಬ್ಭವಣ್ಣಸದಿಸನ್ತಿ ವಣ್ಣೇನ ನೀಲಮೇಘಸದಿಸಂ. ಮೇಘವಣ್ಣಸಿರೀನಿಭನ್ತಿ ಮೇಘವಣ್ಣಸಣ್ಠಾನಂ ಹುತ್ವಾ ಖಾಯಮಾನಂ.

೬೭೦. ಪೂರಂ ಪಾನೀಯಸರಕನ್ತಿ ಪಾನೀಯೇನ ಪುಣ್ಣಂ ಪಾನೀಯಭಾಜನಂ. ಪೂವೇತಿ ಖಜ್ಜಕೇ. ವಿತ್ತೇತಿ ವಿತ್ತಿಜನನೇ ಮಧುರೇ ಮನುಞ್ಞೇ ತಹಿಂ ತಹಿಂ ಸರಾವೇ ಪೂರೇತ್ವಾ ಠಪಿತಪೂವೇ ಅದ್ದಸ.

೬೭೨. ಅಥೋ ತೇ ಅದುರಾಗತನ್ತಿ ಏತ್ಥ ಅಥೋತಿ ನಿಪಾತಮತ್ತಂ, ಅವಧಾರಣತ್ಥೇ ವಾ, ಮಹಾರಾಜ, ತೇ ಆಗತಂ ದುರಾಗತಂ ನ ಹೋತಿ, ಅಥ ಖೋ ಸ್ವಾಗತಮೇವಾತಿ ಮಯಂ ಸಮ್ಪಟಿಚ್ಛಾಮಾತಿ ಅತ್ಥೋ. ಅರಿನ್ದಮಾತಿ ಅರೀನಂ ದಮನಸೀಲ.

೬೭೭. ಅಮಚ್ಚಾ ಪಾರಿಸಜ್ಜಾತಿ ಅಮಚ್ಚಾ ಪಾರಿಸಜ್ಜಾ ಚ ವಚನಂ ಸುಣನ್ತು, ಬ್ರಾಹ್ಮಣೋ ಚ ತುಯ್ಹಂ ಪುರೋಹಿತೋ ತಂ ಸುಣಾತೂತಿ ಯೋಜನಾ.

೬೭೮. ಸುರಟ್ಠಸ್ಮಿಂ ಅಹನ್ತಿ ಸುರಟ್ಠದೇಸೇ ಅಹಂ. ದೇವಾತಿ ರಾಜಾನಂ ಆಲಪತಿ. ಮಿಚ್ಛಾದಿಟ್ಠೀತಿ ನತ್ಥಿಕದಿಟ್ಠಿಯಾ ವಿಪರೀತದಸ್ಸನೋ. ದುಸ್ಸೀಲೋತಿ ನಿಸ್ಸೀಲೋ. ಕದರಿಯೋತಿ ಥದ್ಧಮಚ್ಛರೀ. ಪರಿಭಾಸಕೋತಿ ಸಮಣಬ್ರಾಹ್ಮಣಾನಂ ಅಕ್ಕೋಸಕೋ.

೬೭೯. ವಾರಯಿಸ್ಸನ್ತಿ ವಾರೇಸಿಂ. ಅನ್ತರಾಯಕರೋ ಅಹನ್ತಿ ದಾನಂ ದದನ್ತಾನಂ ಉಪಕಾರಂ ಕರೋನ್ತಾನಂ ಅನ್ತರಾಯಕರೋ ಹುತ್ವಾ ಅಞ್ಞೇಸಞ್ಚ ಪರೇಸಂ ದಾನಂ ದದಮಾನಾನಂ ದಾನಮಯಪುಞ್ಞತೋ ಅಹಂ ಬಹುಜನಂ ವಾರಯಿಸ್ಸಂ ವಾರೇಸಿನ್ತಿ ಯೋಜನಾ.

೬೮೦. ವಿಪಾಕೋ ನತ್ಥಿ ದಾನಸ್ಸಾತಿಆದಿ ವಾರಿತಾಕಾರದಸ್ಸನಂ. ತತ್ಥ ವಿಪಾಕೋ ನತ್ಥಿ ದಾನಸ್ಸಾತಿ ದಾನಂ ದದತೋ ತಸ್ಸ ವಿಪಾಕೋ ಆಯತಿಂ ಪತ್ತಬ್ಬಫಲಂ ನತ್ಥೀತಿ ವಿಪಾಕಂ ಪಟಿಬಾಹತಿ. ಸಂಯಮಸ್ಸ ಕುತೋ ಫಲನ್ತಿ ಸೀಲಸ್ಸ ಪನ ಕುತೋ ನಾಮ ಫಲಂ, ಸಬ್ಬೇನ ಸಬ್ಬಂ ತಂ ನತ್ಥೀತಿ ಅಧಿಪ್ಪಾಯೋ. ನತ್ಥಿ ಆಚರಿಯೋ ನಾಮಾತಿ ಆಚಾರಸಮಾಚಾರಸಿಕ್ಖಾಪಕೋ ಆಚರಿಯೋ ನಾಮ ಕೋಚಿ ನತ್ಥಿ. ಸಭಾವತೋ ಏವ ಹಿ ಸತ್ತಾ ದನ್ತಾ ವಾ ಅದನ್ತಾ ವಾ ಹೋನ್ತೀತಿ ಅಧಿಪ್ಪಾಯೋ. ತೇನಾಹ ‘‘ಅದನ್ತಂ ಕೋ ದಮೇಸ್ಸತೀ’’ತಿ.

೬೮೧. ಸಮತುಲ್ಯಾನಿ ಭೂತಾನೀತಿ ಇಮೇ ಸತ್ತಾ ಸಬ್ಬೇಪಿ ಅಞ್ಞಮಞ್ಞಂ ಸಮಸಮಾ, ತಸ್ಮಾ ಜೇಟ್ಠೋ ಏವ ನತ್ಥಿ, ಕುತೋ ಜೇಟ್ಠಾಪಚಾಯಿಕೋ, ಜೇಟ್ಠಾಪಚಾಯನಪುಞ್ಞಂ ನಾಮ ನತ್ಥೀತಿ ಅತ್ಥೋ. ನತ್ಥಿ ಬಲನ್ತಿ ಯಮ್ಹಿ ಅತ್ತನೋ ಬಲೇ ಪತಿಟ್ಠಿತಾ ಸತ್ತಾ ವೀರಿಯಂ ಕತ್ವಾ ಮನುಸ್ಸಸೋಭಗ್ಯತಂ ಆದಿಂ ಕತ್ವಾ ಯಾವಅರಹತ್ತಂ ಸಮ್ಪತ್ತಿಯೋ ಪಾಪುಣನ್ತಿ, ತಂ ವೀರಿಯಬಲಂ ಪಟಿಕ್ಖಿಪತಿ. ವೀರಿಯಂ ವಾ ನತ್ಥಿ ಕುತೋ ಉಟ್ಠಾನಪೋರಿಸನ್ತಿ ಇದಂ ನೋ ಪುರಿಸವೀರಿಯೇನ ಪುರಿಸಕಾರೇನ ಪವತ್ತನ್ತಿ ಏವಂ ಪವತ್ತವಾದಪಟಿಕ್ಖೇಪವಸೇನ ವುತ್ತಂ.

೬೮೨. ನತ್ಥಿ ದಾನಫಲಂ ನಾಮಾತಿ ದಾನಸ್ಸ ಫಲಂ ನಾಮ ಕಿಞ್ಚಿ ನತ್ಥಿ, ದೇಯ್ಯಧಮ್ಮಪರಿಚ್ಚಾಗೋ ಭಸ್ಮನಿಹಿತಂ ವಿಯ ನಿಪ್ಫಲೋ ಏವಾತಿ ಅತ್ಥೋ. ನ ವಿಸೋಧೇತಿ ವೇರಿನನ್ತಿ ಏತ್ಥ ವೇರಿನನ್ತಿ ವೇರವನ್ತಂ ವೇರಾನಂ ವಸೇನ ಪಾಣಾತಿಪಾತಾದೀನಂ ವಸೇನ ಚ ಕತಪಾಪಂ ಪುಗ್ಗಲಂ ದಾನಸೀಲಾದಿವತತೋ ನ ವಿಸೋಧೇತಿ, ಕದಾಚಿಪಿ ಸುದ್ಧಂ ನ ಕರೋತಿ. ಪುಬ್ಬೇ ‘‘ವಿಪಾಕೋ ನತ್ಥಿ ದಾನಸ್ಸಾ’’ತಿಆದಿ ದಾನಾದಿತೋ ಅತ್ತನೋ ಪರೇಸಂ ನಿವಾರಿತಾಕಾರದಸ್ಸನಂ, ‘‘ನತ್ಥಿ ದಾನಫಲಂ ನಾಮಾ’’ತಿಆದಿ ಪನ ಅತ್ಥನೋ ಮಿಚ್ಛಾಭಿನಿವೇಸದಸ್ಸನನ್ತಿ ದಟ್ಠಬ್ಬಂ. ಲದ್ಧೇಯ್ಯನ್ತಿ ಲದ್ಧಬ್ಬಂ. ಕಥಂ ಪನ ಲದ್ಧಬ್ಬನ್ತಿ ಆಹ ‘‘ನಿಯತಿಪರಿಣಾಮಜ’’ನ್ತಿ. ಅಯಂ ಸತ್ತೋ ಸುಖಂ ವಾ ದುಕ್ಖಂ ವಾ ಲಭನ್ತೋ ನಿಯತಿವಿಪರಿಣಾಮವಸೇನೇವ ಲಭತಿ, ನ ಕಮ್ಮಸ್ಸ ಕತತ್ತಾ, ನ ಇಸ್ಸರಾದಿನಾ ಚಾತಿ ಅಧಿಪ್ಪಾಯೋ.

೬೮೩. ನತ್ಥಿ ಮಾತಾ ಪಿತಾ ಭಾತಾತಿ ಮಾತಾದೀಸು ಸಮ್ಮಾಪಟಿಪತ್ತಿಮಿಚ್ಛಾಪಟಿಪತ್ತೀನಂ ಫಲಾಭಾವಂ ಸನ್ಧಾಯ ವದತಿ. ಲೋಕೋ ನತ್ಥಿ ಇತೋ ಪರನ್ತಿ ಇತೋ ಇಧಲೋಕತೋ ಪರಲೋಕೋ ನಾಮ ಕೋಚಿ ನತ್ಥಿ, ತತ್ಥ ತತ್ಥೇವ ಸತ್ತಾ ಉಚ್ಛಿಜ್ಜನ್ತೀತಿ ಅಧಿಪ್ಪಾಯೋ. ದಿನ್ನನ್ತಿ ಮಹಾದಾನಂ. ಹುತನ್ತಿ ಪಹೇನಕಸಕ್ಕಾರೋ, ತದುಭಯಮ್ಪಿ ಫಲಾಭಾವಂ ಸನ್ಧಾಯ ‘‘ನತ್ಥೀ’’ತಿ ಪಟಿಕ್ಖಿಪತಿ. ಸುನಿಹಿತನ್ತಿ ಸುಟ್ಠು ನಿಹಿತಂ. ನ ವಿಜ್ಜತೀತಿ ಯಂ ಸಮಣಬ್ರಾಹ್ಮಣಾನಂ ದಾನಂ ನಾಮ ‘‘ಅನುಗಾಮಿಕನಿಧೀ’’ತಿ ವದನ್ತಿ, ತಂ ನ ವಿಜ್ಜತಿ. ತೇಸಂ ತಂ ವಾಚಾವತ್ಥುಮತ್ತಮೇವಾತಿ ಅಧಿಪ್ಪಾಯೋ.

೬೮೪. ನ ಕೋಚಿ ಕಞ್ಚಿ ಹನತೀತಿ ಯೋ ಪುರಿಸೋ ಪರಂ ಪುರಿಸಂ ಹನೇಯ್ಯ, ಪರಸ್ಸ ಪುರಿಸಸ್ಸ ಸೀಸಂ ಛಿನ್ದೇಯ್ಯ, ತತ್ಥ ಪರಮತ್ಥತೋ ನ ಕೋಚಿ ಕಞ್ಚಿ ಹನತಿ, ಸತ್ತನ್ನಂ ಕಾಯಾನಂ ಛಿದ್ದಭಾವತೋ ಹನನ್ತೋ ವಿಯ ಹೋತಿ. ಕಥಂ ಸತ್ಥಪಹಾರೋತಿ ಆಹ ‘‘ಸತ್ತನ್ನಂ ವಿವರಮನ್ತರೇ’’ತಿ. ಪಥವೀಆದೀನಂ ಸತ್ತನ್ನಂ ಕಾಯಾನಂ ವಿವರಭೂತೇ ಅನ್ತರೇ ಛಿದ್ದೇ ಸತ್ಥಂ ಪವಿಸತಿ, ತೇನ ಸತ್ತಾ ಅಸಿಆದೀಹಿ ಪಹತಾ ವಿಯ ಹೋನ್ತಿ, ಜೀವೋ ವಿಯ ಪನ ಸೇಸಕಾಯಾಪಿ ನಿಚ್ಚಸಭಾವತ್ತಾ ನ ಛಿಜ್ಜನ್ತೀತಿ ಅಧಿಪ್ಪಾಯೋ.

೬೮೫. ಅಚ್ಛೇಜ್ಜಾಭೇಜ್ಜೋ ಹಿ ಜೀವೋತಿ ಅಯಂ ಸತ್ತಾನಂ ಜೀವೋ ಸತ್ಥಾದೀಹಿ ನ ಛಿನ್ದಿತಬ್ಬೋ ನ ಭಿನ್ದಿತಬ್ಬೋ ನಿಚ್ಚಸಭಾವತ್ತಾ. ಅಟ್ಠಂಸೋ ಗುಳಪರಿಮಣ್ಡಲೋತಿ ಸೋ ಪನ ಜೀವೋ ಕದಾಚಿ ಅಟ್ಠಂಸೋ ಹೋತಿ ಕದಾಚಿ ಗುಳಪರಿಮಣ್ಡಲೋ. ಯೋಜನಾನಂ ಸತಂ ಪಞ್ಚಾತಿ ಕೇವಲೀಭಾವಂ ಪತ್ತೋ ಪಞ್ಚಯೋಜನಸತುಬ್ಬೇಧೋ ಹೋತಿ. ಕೋ ಜೀವಂ ಛೇತ್ತುಮರಹತೀತಿ ನಿಚ್ಚಂ ನಿಬ್ಬಿಕಾರಂ ಜೀವಂ ಕೋ ನಾಮ ಸತ್ಥಾದೀಹಿ ಛಿನ್ದಿತುಂ ಅರಹತಿ, ನ ಸೋ ಕೇನಚಿ ವಿಕೋಪನೇಯ್ಯೋತಿ ವದತಿ.

೬೮೬. ಸುತ್ತಗುಳೇತಿ ವೇಠೇತ್ವಾ ಕತಸುತ್ತಗುಳೇ. ಖಿತ್ತೇತಿ ನಿಬ್ಬೇಠನವಸೇನ ಖಿತ್ತೇ. ನಿಬ್ಬೇಠೇನ್ತಂ ಪಲಾಯತೀತಿ ಪಬ್ಬತೇ ವಾ ರುಕ್ಖಗ್ಗೇ ವಾ ಠತ್ವಾ ನಿಬ್ಬೇಠಿಯಮಾನಂ ಖಿತ್ತಂ ಸುತ್ತಗುಳಂ ನಿಬ್ಬೇಠೇನ್ತಮೇವ ಗಚ್ಛತಿ, ಸುತ್ತೇ ಖೀಣೇ ನ ಗಚ್ಛತಿ. ಏವಮೇವನ್ತಿ ಯಥಾ ತಂ ಸುತ್ತಗುಳಂ ನಿಬ್ಬೇಠಿಯಮಾನಂ ಗಚ್ಛತಿ, ಸುತ್ತೇ ಖೀಣೇ ನ ಗಚ್ಛತಿ, ಏವಮೇವ ಸೋ ಜೀವೋ ‘‘ಚುಲ್ಲಾಸೀತಿ ಮಹಾಕಪ್ಪಿನೋ ಸತಸಹಸ್ಸಾನೀ’’ತಿ ವುತ್ತಕಾಲಮೇವ ಅತ್ತಭಾವಗುಳಂ ನಿಬ್ಬೇಠೇನ್ತೋ ಪಲಾಯತಿ ಪವತ್ತತಿ, ತತೋ ಉದ್ಧಂ ನ ಪವತ್ತತಿ.

೬೮೭. ಏವಮೇವ ಚ ಸೋ ಜೀವೋತಿ ಯಥಾ ಕೋಚಿ ಪುರಿಸೋ ಅತ್ತನೋ ನಿವಾಸಗಾಮತೋ ನಿಕ್ಖಮಿತ್ವಾ ತತೋ ಅಞ್ಞಂ ಗಾಮಂ ಪವಿಸತಿ ಕೇನಚಿದೇವ ಕರಣೀಯೇನ, ಏವಮೇವ ಸೋ ಜೀವೋ ಇತೋ ಸರೀರತೋ ನಿಕ್ಖಮಿತ್ವಾ ಅಞ್ಞಂ ಅಪರಂ ಸರೀರಂ ನಿಯತವಸೇನ ಪವಿಸತೀತಿ ಅಧಿಪ್ಪಾಯೋ. ಬೋನ್ದಿನ್ತಿ ಕಾಯಂ.

೬೮೯. ಚುಲ್ಲಾಸೀತೀತಿ ಚತುರಾಸೀತಿ. ಮಹಾಕಪ್ಪಿನೋತಿ ಮಹಾಕಪ್ಪಾನಂ. ತತ್ಥ ‘‘ಏಕಮ್ಹಾ ಮಹಾಸರಾ ಅನೋತತ್ತಾದಿತೋ ವಸ್ಸಸತೇ ವಸ್ಸಸತೇ ಕುಸಗ್ಗೇನ ಏಕೇಕಂ ಉದಕಬಿನ್ದುಂ ನೀಹರನ್ತೇ ಇಮಿನಾ ಉಪಕ್ಕಮೇನ ಸತ್ತಕ್ಖತ್ತುಂ ತಮ್ಹಿ ಸರೇ ನಿರುದಕೇ ಜಾತೇ ಏಕೋ ಮಹಾಕಪ್ಪೋ ನಾಮ ಹೋತೀ’’ತಿ ವತ್ವಾ ‘‘ಏವರೂಪಾನಂ ಮಹಾಕಪ್ಪಾನಂ ಚತುರಾಸೀತಿಸತಸಹಸ್ಸಾನಿ ಸಂಸಾರಸ್ಸ ಪರಿಮಾಣ’’ನ್ತಿ ವದನ್ತಿ. ಯೇ ಬಾಲಾ ಯೇ ಚ ಪಣ್ಡಿತಾತಿ ಯೇ ಅನ್ಧಬಾಲಾ, ಯೇ ಚ ಸಪ್ಪಞ್ಞಾ, ಸಬ್ಬೇಪಿ ತೇ. ಸಂಸಾರಂ ಖೇಪಯಿತ್ವಾನಾತಿ ಯಥಾವುತ್ತಕಾಲಪರಿಚ್ಛೇದಂ ಸಂಸಾರಂ ಅಪರಾಪರುಪ್ಪತ್ತಿವಸೇನ ಖೇಪೇತ್ವಾ. ದುಕ್ಖಸ್ಸನ್ತಂ ಕರಿಸ್ಸರೇತಿ ವಟ್ಟದುಕ್ಖಸ್ಸ ಪರಿಯನ್ತಂ ಪರಿಯೋಸಾನಂ ಕರಿಸ್ಸನ್ತಿ. ಪಣ್ಡಿತಾಪಿ ಅನ್ತರಾ ಸುಜ್ಝಿತುಂ ನ ಸಕ್ಕೋನ್ತಿ, ಬಾಲಾಪಿ ತತೋ ಉದ್ಧಂ ನಪ್ಪವತ್ತನ್ತೀತಿ ತಸ್ಸ ಲದ್ಧಿ.

೬೯೦. ಮಿತಾನಿ ಸುಖದುಕ್ಖಾನಿ, ದೋಣೇಹಿ ಪಿಟಕೇಹಿ ಚಾತಿ ಸತ್ತಾನಂ ಸುಖದುಕ್ಖಾನಿ ನಾಮ ದೋಣೇಹಿ ಪಿಟಕೇಹಿ ಮಾನಭಾಜನೇಹಿ ಮಿತಾನಿ ವಿಯ ಯಥಾವುತ್ತಕಾಲಪರಿಚ್ಛೇದೇನೇವ ಪರಿಮಿತತ್ತಾ ಪಚ್ಚೇಕಞ್ಚ ತೇಸಂ ತೇಸಂ ಸತ್ತಾನಂ ತಾನಿ ನಿಯತಿಪರಿಣಾಮಜಾನಿ ಪರಿಮಿತಾನಿ. ತಯಿದಂ ಜಿನೋ ಸಬ್ಬಂ ಪಜಾನಾತಿ ಜಿನಭೂಮಿಯಂ ಠಿತೋ ಕೇವಲಂ ಪಜಾನಾತಿ ಸಂಸಾರಸ್ಸ ಸಮತಿಕ್ಕನ್ತತ್ತಾ. ಸಂಸಾರೇ ಪನ ಪರಿಬ್ಭಮತಿ ಸಮ್ಮೂಳ್ಹಾಯಂ ಇತರಾ ಪಜಾ.

೬೯೧. ಏವಂದಿಟ್ಠಿ ಪುರೇ ಆಸಿನ್ತಿ ಯಥಾವುತ್ತನತ್ಥಿಕದಿಟ್ಠಿಕೋ ಪುಬ್ಬೇವ ಅಹಂ ಅಹೋಸಿಂ. ಸಮ್ಮೂಳ್ಹೋ ಮೋಹಪಾರುತೋತಿ ಯಥಾವುತ್ತಾಯ ದಿಟ್ಠಿಯಾ ಹೇತುಭೂತೇನ ಸಮ್ಮೋಹೇನ ಸಮ್ಮೂಳ್ಹೋ, ತಂಸಹಜಾತೇನ ಪನ ಮೋಹೇನ ಪಾರುತೋ, ಪಟಿಚ್ಛಾದಿತಕುಸಲಬೀಜೋತಿ ಅಧಿಪ್ಪಾಯೋ.

೬೯೨. ಏವಂ ಪುಬ್ಬೇ ಯಾ ಅತ್ತನೋ ಉಪ್ಪನ್ನಾ ಪಾಪದಿಟ್ಠಿ, ತಸ್ಸಾ ವಸೇನ ಕತಂ ಪಾಪಕಮ್ಮಂ ದಸ್ಸೇತ್ವಾ ಇದಾನಿ ಅತ್ತನಾ ಆಯತಿಂ ಅನುಭವಿತಬ್ಬಂ ತಸ್ಸ ಫಲಂ ದಸ್ಸೇನ್ತೋ ‘‘ಓರಂ ಮೇ ಛಹಿ ಮಾಸೇಹೀ’’ತಿಆದಿಮಾಹ.

೬೯೫-೭. ತತ್ಥ ವಸ್ಸಾನಿ ಸತಸಹಸ್ಸಾನೀತಿ ವಸ್ಸಾನಂ ಸತಸಹಸ್ಸಾನಿ, ಅತಿಕ್ಕಮಿತ್ವಾತಿ ವಚನಸೇಸೋ. ಭುಮ್ಮತ್ಥೇ ವಾ ಏತಂ ಪಚ್ಚತ್ತವಚನಂ, ವಸ್ಸೇಸು ಸತಸಹಸ್ಸೇಸು ವೀತಿವತ್ತೇಸೂತಿ ಅತ್ಥೋ. ಘೋಸೋ ಸುಯ್ಯತಿ ತಾವದೇತಿ ಯದಾ ಏತ್ತಕೋ ಕಾಲೋ ಅತಿಕ್ಕನ್ತೋ ಹೋತಿ, ತಾವದೇವ ತಸ್ಮಿಂ ಕಾಲೇ ‘‘ಇಧ ಪಚ್ಚನ್ತಾನಂ ವೋ ಮಾರಿಸಾ ವಸ್ಸಸತಸಹಸ್ಸಪರಿಮಾಣೋ ಕಾಲೋ ಅತೀತೋ’’ತಿ ಏವಂ ತಸ್ಮಿಂ ನಿರಯೇ ಸದ್ದೋ ಸುಯ್ಯತಿ. ಲಕ್ಖೋ ಏಸೋ, ಮಹಾರಾಜ, ಸತಭಾಗವಸ್ಸಕೋಟಿಯೋತಿ ಸತಭಾಗಾ ಸತಕೋಟ್ಠಾಸಾ ವಸ್ಸಕೋಟಿಯೋ, ಮಹಾರಾಜ, ನಿರಯೇ ಪಚ್ಚನ್ತಾನಂ ಸತ್ತಾನಂ ಆಯುನೋ ಏಸೋ ಲಕ್ಖೋ ಏಸೋ ಪರಿಚ್ಛೇದೋತಿ ಅತ್ಥೋ. ಇದಂ ವುತ್ತಂ ಹೋತಿ – ದಸದಸಕಂ ಸತಂ ನಾಮ, ದಸ ಸತಾನಿ ಸಹಸ್ಸಂ ನಾಮ, ದಸದಸಸಹಸ್ಸಾನಿ ಸತಸಹಸ್ಸಂ ನಾಮ, ಸತಸತಸಹಸ್ಸಾನಿ ಕೋಟಿ ನಾಮ, ತಾಸಂ ಕೋಟೀನಂ ವಸೇನ ಸತಸಹಸ್ಸವಸ್ಸಕೋಟಿಯೋ ಸತಭಾಗಾ ವಸ್ಸಕೋಟಿಯೋ. ಸಾ ಚ ಖೋ ನೇರಯಿಕಾನಂಯೇವ ವಸ್ಸಗಣನಾವಸೇನ ವೇದಿತಬ್ಬಾ, ನ ಮನುಸ್ಸಾನಂ, ದೇವಾನಂ ವಾ. ಈದಿಸಾನಿ ಅನೇಕಾನಿ ವಸ್ಸಕೋಟಿಸತಸಹಸ್ಸಾನಿ ನೇರಯಿಕಾನಂ ಆಯು. ತೇನಾಹ ‘‘ಕೋಟಿಸತಸಹಸ್ಸಾನಿ, ನಿರಯೇ ಪಚ್ಚರೇ ಜನಾ’’ತಿ. ಯಾದಿಸೇನ ಪನ ಪಾಪೇನ ಸತ್ತಾ ಏವಂ ನಿರಯೇಸು ಪಚ್ಚನ್ತಿ, ತಂ ನಿಗಮನವಸೇನ ದಸ್ಸೇತುಂ ‘‘ಮಿಚ್ಛಾದಿಟ್ಠೀ ಚ ದುಸ್ಸೀಲಾ, ಯೇ ಚ ಅರಿಯೂಪವಾದಿನೋ’’ತಿ ವುತ್ತಂ. ವೇದಿಸ್ಸನ್ತಿ ಅನುಭವಿಸ್ಸಂ.

೬೯೮-೭೦೬. ಏವಂ ಆಯತಿಂ ಅತ್ತನಾ ಅನುಭವಿತಬ್ಬಂ ಪಾಪಫಲಂ ದಸ್ಸೇತ್ವಾ ಇದಾನಿ ‘‘ಕೇನ ತೇ ಬ್ರಹ್ಮಚರಿಯೇನ, ಆನುಭಾವೋ ಅಯಂ ತವಾ’’ತಿ ರಞ್ಞಾ ಪುಚ್ಛಿತಮತ್ಥಂ ಆಚಿಕ್ಖಿತ್ವಾ ತಂ ಸರಣೇಸು ಚೇವ ಸೀಲೇಸು ಚ ಪತಿಟ್ಠಾಪೇತುಕಾಮೋ ‘‘ತಂ ಸುಣೋಹಿ ಮಹಾರಾಜಾ’’ತಿಆದಿಮಾಹ. ತತ್ಥ ಸೀಲೇಸುಪೋಸಥೇ ರತಾತಿ ನಿಚ್ಚಸೀಲೇಸು ಚ ಉಪೋಸಥಸೀಲೇಸು ಚ ಅಭಿರತಾ. ಅದಾತಿ ಅದಾಸಿ. ತಂ ಧಮ್ಮನ್ತಿ ತಂ ಅಟ್ಠಙ್ಗಿಕಂ ಮಗ್ಗಂ ಅಮತಪದಞ್ಚ.

೭೦೯-೧೨. ಏವಂ ಪೇತೇನ ಸರಣೇಸು ಸೀಲೇಸು ಚ ಸಮಾದಪಿತೋ ರಾಜಾ ಪಸನ್ನಮಾನಸೋ ತೇನ ಅತ್ತನೋ ಕತಂ ಉಪಕಾರಂ ತಾವ ಕಿತ್ತೇತ್ವಾ ಸರಣಾದೀಸು ಪತಿಟ್ಠಹನ್ತೋ ‘‘ಅತ್ಥಕಾಮೋ’’ತಿಆದಿಕಾ ತಿಸ್ಸೋ ಗಾಥಾ ವತ್ವಾ ಪುಬ್ಬೇ ಅತ್ತನಾ ಗಹಿತಾಯ ಪಾಪಿಕಾಯ ದಿಟ್ಠಿಯಾ ಪಟಿನಿಸ್ಸಟ್ಠಭಾವಂ ಪಕಾಸೇನ್ತೋ ‘‘ಓಫುಣಾಮೀ’’ತಿ ಗಾಥಮಾಹ.

ತತ್ಥ ಓಫುಣಾಮಿ ಮಹಾವಾತೇತಿ ಮಹನ್ತೇ ವಾತೇ ವಾಯನ್ತೇ ಭುಸಂ ವಿಯ ತಂ ಪಾಪಕಂ ದಿಟ್ಠಿಂ, ಯಕ್ಖ, ತವ ಧಮ್ಮದೇಸನಾವಾತೇ ಓಫುಣಾಮಿ ನಿದ್ಧುನಾಮಿ. ನದಿಯಾ ವಾ ಸೀಘಗಾಮಿಯಾತಿ ಸೀಘಸೋತಾಯ ಮಹಾನದಿಯಾ ವಾ ತಿಣಕಟ್ಠಪಣ್ಣಕಸಟಂ ವಿಯ ಪಾಪಿಕಂ ದಿಟ್ಠಿಂ ಪವಾಹೇಮೀತಿ ಅಧಿಪ್ಪಾಯೋ. ವಮಾಮಿ ಪಾಪಿಕಂ ದಿಟ್ಠಿನ್ತಿ ಮಮ ಮನೋಮುಖಗತಂ ಪಾಪಿಕಂ ದಿಟ್ಠಿಂ ಉಚ್ಛಡ್ಡಯಾಮಿ. ತತ್ಥ ಕಾರಣಮಾಹ ‘‘ಬುದ್ಧಾನಂ ಸಾಸನೇ ರತೋ’’ತಿ. ಯಸ್ಮಾ ಏಕಂಸೇನ ಅಮತಾವಹೇ ಬುದ್ಧಾನಂ ಭಗವನ್ತಾನಂ ಸಾಸನೇ ರತೋ ಅಭಿರತೋ, ತಸ್ಮಾ ತಂ ದಿಟ್ಠಿಸಙ್ಖಾತಂ ವಿಸಂ ವಮಾಮೀತಿ ಯೋಜನಾ.

೭೧೩. ತಿ ಓಸಾನಗಾಥಾ ಸಙ್ಗೀತಿಕಾರೇಹಿ ಠಪಿತಾ. ತತ್ಥ ಪಾಮೋಕ್ಖೋತಿಪಾಚೀನದಿಸಾಭಿಮುಖೋ ಹುತ್ವಾ. ರಥಮಾರುಹೀತಿ ರಾಜಾ ಗಮನಸಜ್ಜಂ ಅತ್ತನೋ ರಾಜರಥಂ ಅಭಿರುಹಿ, ಆರುಯ್ಹ ಯಕ್ಖಾನುಭಾವೇನ ತಂ ದಿವಸಮೇವ ಅತ್ತನೋ ನಗರಂ ಪತ್ವಾ ರಾಜಭವನಂ ಪಾವಿಸಿ. ಸೋ ಅಪರೇನ ಸಮಯೇನ ಇಮಂ ಪವತ್ತಿಂ ಭಿಕ್ಖೂನಂ ಆರೋಚೇಸಿ, ಭಿಕ್ಖೂ ತಂ ಥೇರಾನಂ ಆರೋಚೇಸುಂ, ಥೇರಾ ತತಿಯಸಙ್ಗೀತಿಯಂ ಸಙ್ಗಹಂ ಆರೋಪೇಸುಂ.

ನನ್ದಕಪೇತವತ್ಥುವಣ್ಣನಾ ನಿಟ್ಠಿತಾ.