೫. ಮಟ್ಠಕುಣ್ಡಲೀಪೇತವತ್ಥುವಣ್ಣನಾ

ಅಲಙ್ಕತೋ ಮಟ್ಠಕುಣ್ಡಲೀತಿ ಇದಂ ಸತ್ಥರಿ ಜೇತವನೇ ವಿಹರನ್ತೇ ಮಟ್ಠಕುಣ್ಡಲಿದೇವಪುತ್ತಂ ಆರಬ್ಭ ವುತ್ತಂ. ತತ್ಥ ಯಂ ವತ್ತಬ್ಬಂ, ತಂ ಪರಮತ್ಥದೀಪನಿಯಂ ವಿಮಾನವತ್ಥುವಣ್ಣನಾಯಂ ಮಟ್ಠಕುಣ್ಡಲೀವಿಮಾನವತ್ಥುವಣ್ಣನಾಯ (ವಿ. ವ. ಅಟ್ಠ. ೧೨೦೬ ಮಟ್ಠಕುಣ್ಡಲೀವಿಮಾನವಣ್ಣನಾ) ವುತ್ತಮೇವ, ತಸ್ಮಾ ತತ್ಥ ವುತ್ತನಯೇನೇವ ವೇದಿತಬ್ಬಂ.

ಏತ್ಥ ಚ ಮಟ್ಠಕುಣ್ಡಲೀದೇವಪುತ್ತಸ್ಸ ವಿಮಾನದೇವತಾಭಾವತೋ ತಸ್ಸ ವತ್ಥು ಯದಿಪಿ ವಿಮಾನವತ್ಥುಪಾಳಿಯಂ ಸಙ್ಗಹಂ ಆರೋಪಿತಂ, ಯಸ್ಮಾ ಪನ ಸೋ ದೇವಪುತ್ತೋ ಅದಿನ್ನಪುಬ್ಬಕಬ್ರಾಹ್ಮಣಸ್ಸ ಪುತ್ತಸೋಕೇನ ಸುಸಾನಂ ಗನ್ತ್ವಾ ಆಳಾಹನಂ ಅನುಪರಿಯಾಯಿತ್ವಾ ರೋದನ್ತಸ್ಸ ಸೋಕಹರಣತ್ಥಂ ಅತ್ತನೋ ದೇವರೂಪಂ ಪಟಿಸಂಹರಿತ್ವಾ ಹರಿಚನ್ದನುಸ್ಸದೋ ಬಾಹಾ ಪಗ್ಗಯ್ಹ ಕನ್ದನ್ತೋ ದುಕ್ಖಾಭಿಭೂತಾಕಾರೇನ ಪೇತೋ ವಿಯ ಅತ್ತಾನಂ ದಸ್ಸೇಸಿ. ಮನುಸ್ಸತ್ತಭಾವತೋ ಅಪೇತತ್ತಾ ಪೇತಪರಿಯಾಯೋಪಿ ಲಬ್ಭತಿ ಏವಾತಿ ತಸ್ಸ ವತ್ಥು ಪೇತವತ್ಥುಪಾಳಿಯಮ್ಪಿ ಸಙ್ಗಹಂ ಆರೋಪಿತನ್ತಿ ದಟ್ಠಬ್ಬಂ.

ಮಟ್ಠಕುಣ್ಡಲೀಪೇತವತ್ಥುವಣ್ಣನಾ ನಿಟ್ಠಿತಾ.