೬. ಸುಚರಿತಸುತ್ತವಣ್ಣನಾ

೬೫. ಛಟ್ಠೇ ಸುಟ್ಠು ಚರಿತಾನಿ, ಸುನ್ದರಾನಿ ವಾ ಚರಿತಾನಿ ಸುಚರಿತಾನಿ. ಕಾಯೇನ ಸುಚರಿತಂ, ಕಾಯತೋ ವಾ ಪವತ್ತಂ ಸುಚರಿತಂ ಕಾಯಸುಚರಿತಂ. ಸೇಸೇಸುಪಿ ಏಸೇವ ನಯೋ. ಇಧಾಪಿ ಪನ ಪಞ್ಞತ್ತಿವಸೇನ, ಕಮ್ಮಪಥವಸೇನ ಚಾತಿ ದುವಿಧಾ ಕಥಾ. ತತ್ಥ ಕಾಯದ್ವಾರೇ ಪಞ್ಞತ್ತಸಿಕ್ಖಾಪದಸ್ಸ ಅವೀತಿಕ್ಕಮೋ ಕಾಯಸುಚರಿತಂ, ವಚೀದ್ವಾರೇ ಪಞ್ಞತ್ತಸಿಕ್ಖಾಪದಸ್ಸ ಅವೀತಿಕ್ಕಮೋ ವಚೀಸುಚರಿತಂ, ಉಭಯತ್ಥ ಪಞ್ಞತ್ತಸ್ಸ ಅವೀತಿಕ್ಕಮೋ ಮನೋಸುಚರಿತನ್ತಿ ಅಯಂ ಪಞ್ಞತ್ತಿಕಥಾ. ಪಾಣಾತಿಪಾತಾದೀಹಿ ಪನ ವಿರಮನ್ತಸ್ಸ ಉಪ್ಪನ್ನಾ ತಿಸ್ಸೋ ಚೇತನಾಪಿ ವಿರತಿಯೋಪಿ ಕಾಯಸುಚರಿತಂ, ಮುಸಾವಾದಾದೀಹಿ ವಿರಮನ್ತಸ್ಸ ಚತಸ್ಸೋ ಚೇತನಾಪಿ ವಿರತಿಯೋಪಿ ವಚೀಸುಚರಿತಂ, ಅನಭಿಜ್ಝಾ, ಅಬ್ಯಾಪಾದೋ, ಸಮ್ಮಾದಿಟ್ಠೀತಿ ತಯೋ ಚೇತನಾಸಮ್ಪಯುತ್ತಧಮ್ಮಾ ಮನೋಸುಚರಿತನ್ತಿ ಅಯಂ ಕಮ್ಮಪಥಕಥಾ. ಸೇಸಂ ವುತ್ತನಯಮೇವ.

ಛಟ್ಠಸುತ್ತವಣ್ಣನಾ ನಿಟ್ಠಿತಾ.