೯. ಬಾಲಿಸಿಕವತ್ಥು

ನ ತೇನ ಅರಿಯೋ ಹೋತೀತಿ ಇಮಂ ಧಮ್ಮದೇಸನಂ ಸತ್ಥಾ ಜೇತವನೇ ವಿಹರನ್ತೋ ಏಕಂ ಅರಿಯಂ ನಾಮ ಬಾಲಿಸಿಕಂ ಆರಬ್ಭ ಕಥೇಸಿ.

ಏಕದಿವಸಞ್ಹಿ ಸತ್ಥಾ ತಸ್ಸ ಸೋತಾಪತ್ತಿಮಗ್ಗಸ್ಸೂಪನಿಸ್ಸಯಂ ದಿಸ್ವಾ ಸಾವತ್ಥಿಯಾ ಉತ್ತರದ್ವಾರಗಾಮೇ ಪಿಣ್ಡಾಯ ಚರಿತ್ವಾ ಭಿಕ್ಖುಸಙ್ಘಪರಿವುತೋ ತತೋ ಆಗಚ್ಛತಿ. ತಸ್ಮಿಂ ಖಣೇ ಸೋ ಬಾಲಿಸಿಕೋ ಬಲಿಸೇನ ಮಚ್ಛೇ ಗಣ್ಹನ್ತೋ ಬುದ್ಧಪ್ಪಮುಖಂ ಭಿಕ್ಖುಸಙ್ಘಂ ದಿಸ್ವಾ ಬಲಿಸಯಟ್ಠಿಂ ಛಡ್ಡೇತ್ವಾ ಅಟ್ಠಾಸಿ. ಸತ್ಥಾ ತಸ್ಸ ಅವಿದೂರೇ ಠಾನೇ ನಿವತ್ತಿತ್ವಾ ಠಿತೋ ‘‘ತ್ವಂ ಕಿಂ ನಾಮೋಸೀ’’ತಿ ಸಾರಿಪುತ್ತತ್ಥೇರಾದೀನಂ ನಾಮಾನಿ ಪುಚ್ಛಿ. ತೇಪಿ ‘‘ಅಹಂ ಸಾರಿಪುತ್ತೋ ಅಹಂ ಮೋಗ್ಗಲ್ಲಾನೋ’’ತಿ ಅತ್ತನೋ ಅತ್ತನೋ ನಾಮಾನಿ ಕಥಯಿಂಸು. ಬಾಲಿಸಿಕೋ ಚಿನ್ತೇಸಿ – ‘‘ಸತ್ಥಾ ಸಬ್ಬೇಸಂ ನಾಮಾನಿ ಪುಚ್ಛತಿ, ಮಮಮ್ಪಿ ನಾಮಂ ಪುಚ್ಛಿಸ್ಸತಿ ಮಞ್ಞೇ’’ತಿ. ಸತ್ಥಾ ತಸ್ಸ ಇಚ್ಛಂ ಞತ್ವಾ, ‘‘ಉಪಾಸಕ, ತ್ವಂ ಕೋ ನಾಮೋಸೀ’’ತಿ ಪುಚ್ಛಿತ್ವಾ ‘‘ಅಹಂ, ಭನ್ತೇ, ಅರಿಯೋ ನಾಮಾ’’ತಿ ವುತ್ತೇ ‘‘ನ, ಉಪಾಸಕ, ತಾದಿಸಾ ಪಾಣಾತಿಪಾತಿನೋ ಅರಿಯಾ ನಾಮ ಹೋನ್ತಿ, ಅರಿಯಾ ಪನ ಮಹಾಜನಸ್ಸ ಅಹಿಂಸನಭಾವೇ ಠಿತಾ’’ತಿ ವತ್ವಾ ಇಮಂ ಗಾಥಮಾಹ –

೨೭೦. ‘‘ನ ತೇನ ಅರಿಯೋ ಹೋತಿ, ಯೇನ ಪಾಣಾನಿ ಹಿಂಸತಿ;

ಅಹಿಂಸಾ ಸಬ್ಬಪಾಣಾನಂ, ಅರಿಯೋತಿ ಪವುಚ್ಚತೀ’’ತಿ.

ತತ್ಥ ಅಹಿಂಸಾತಿ ಅಹಿಂಸನೇನ. ಇದಂ ವುತ್ತಂ ಹೋತಿ – ಯೇನ ಹಿ ಪಾಣಾನಿ ಹಿಂಸತಿ, ನ ತೇನ ಕಾರಣೇನ ಅರಿಯೋ ಹೋತಿ. ಯೋ ಪನ ಸಬ್ಬಪಾಣಾನಂ ಪಾಣಿಆದೀಹಿ ಅಹಿಂಸನೇನ ಮೇತ್ತಾದಿಭಾವನಾಯ ಪತಿಟ್ಠಿತತ್ತಾ ಹಿಂಸತೋ ಆರಾವ ಠಿತೋ, ಅಯಂ ಅರಿಯೋತಿ ವುಚ್ಚತೀತಿ ಅತ್ಥೋ.

ದೇಸನಾವಸಾನೇ ಬಾಲಿಸಿಕೋ ಸೋತಾಪತ್ತಿಫಲೇ ಪತಿಟ್ಠಹಿ, ಸಮ್ಪತ್ತಾನಮ್ಪಿ ಸಾತ್ಥಿಕಾ ಧಮ್ಮದೇಸನಾ ಅಹೋಸೀತಿ.

ಬಾಲಿಸಿಕವತ್ಥು ನವಮಂ.