೩. ಕೋಸಲರಞ್ಞೋ ಪರಾಜಯವತ್ಥು

ಜಯಂ ವೇರನ್ತಿ ಇಮಂ ಧಮ್ಮದೇಸನಂ ಸತ್ಥಾ ಜೇತವನೇ ವಿಹರನ್ತೋ ಕೋಸಲರಞ್ಞೋ ಪರಾಜಯಂ ಆರಬ್ಭ ಕಥೇಸಿ.

ಸೋ ಕಿರ ಕಾಸಿಕಗಾಮಂ ನಿಸ್ಸಾಯ ಭಾಗಿನೇಯ್ಯೇನ ಅಜಾತಸತ್ತುನಾ ಸದ್ಧಿಂ ಯುಜ್ಝನ್ತೋ ತೇನ ತಯೋ ವಾರೇ ಪರಾಜಿತೋ ತತಿಯವಾರೇ ಚಿನ್ತೇಸಿ – ‘‘ಅಹಂ ಖೀರಮುಖಮ್ಪಿ ದಾರಕಂ ಪರಾಜೇತುಂ ನಾಸಕ್ಖಿಂ, ಕಿಂ ಮೇ ಜೀವಿತೇನಾ’’ತಿ. ಸೋ ಆಹಾರೂಪಚ್ಛೇದಂ ಕತ್ವಾ ಮಞ್ಚಕೇ ನಿಪಜ್ಜಿ. ಅಥಸ್ಸ ಸಾ ಪವತ್ತಿ ಸಕಲನಗರಂ ಪತ್ಥರಿ. ಭಿಕ್ಖೂ ತಥಾಗತಸ್ಸ ಆರೋಚೇಸುಂ – ‘‘ಭನ್ತೇ, ರಾಜಾ ಕಿರ ಕಾಸಿಕಗಾಮಕಂ ನಿಸ್ಸಾಯ ತಯೋ ವಾರೇ ಪರಾಜಿತೋ, ಸೋ ಇದಾನಿ ಪರಾಜಿತ್ವಾ ಆಗತೋ ‘ಖೀರಮುಖಮ್ಪಿ ದಾರಕಂ ಪರಾಜೇತುಂ ನಾಸಕ್ಖಿಂ, ಕಿಂ ಮೇ ಜೀವಿತೇನಾ’ತಿ ಆಹಾರೂಪಚ್ಛೇದಂ ಕತ್ವಾ ಮಞ್ಚಕೇ ನಿಪನ್ನೋ’’ತಿ. ಸತ್ಥಾ ತೇಸಂ ಕಥಂ ಸುತ್ವಾ, ‘‘ಭಿಕ್ಖವೇ, ಜಿನನ್ತೋಪಿ ವೇರಂ ಪಸವತಿ, ಪರಾಜಿತೋ ಪನ ದುಕ್ಖಂ ಸೇತಿಯೇವಾ’’ತಿ ವತ್ವಾ ಇಮಂ ಗಾಥಮಾಹ –

೨೦೧. ‘‘ಜಯಂ ವೇರಂ ಪಸವತಿ, ದುಕ್ಖಂ ಸೇತಿ ಪರಾಜಿತೋ;

ಉಪಸನ್ತೋ ಸುಖಂ ಸೇತಿ, ಹಿತ್ವಾ ಜಯಪರಾಜಯ’’ನ್ತಿ.

ತತ್ಥ ಜಯನ್ತಿ ಪರಂ ಜಿನನ್ತೋ ವೇರಂ ಪಟಿಲಭತಿ. ಪರಾಜಿತೋತಿ ಪರೇನ ಪರಾಜಿತೋ ‘‘ಕದಾ ನು ಖೋ ಪಚ್ಚಾಮಿತ್ತಸ್ಸ ಪಿಟ್ಠಿಂ ದಟ್ಠುಂ ಸಕ್ಖಿಸ್ಸಾಮೀ’’ತಿ ದುಕ್ಖಂ ಸೇತಿ ಸಬ್ಬಿರಿಯಾಪಥೇಸು ದುಕ್ಖಮೇವ ವಿಹರತೀತಿ ಅತ್ಥೋ. ಉಪಸನ್ತೋತಿ ಅಬ್ಭನ್ತರೇ ಉಪಸನ್ತರಾಗಾದಿಕಿಲೇಸೋ ಖೀಣಾಸವೋ ಜಯಞ್ಚ ಪರಾಜಯಞ್ಚ ಹಿತ್ವಾ ಸುಖಂ ಸೇತಿ, ಸಬ್ಬಿರಿಯಾಪಥೇಸು ಸುಖಮೇವ ವಿಹರತೀತಿ ಅತ್ಥೋ.

ದೇಸನಾವಸಾನೇ ಬಹೂ ಸೋತಾಪತ್ತಿಫಲಾದೀನಿ ಪಾಪುಣಿಂಸೂತಿ.

ಕೋಸಲರಞ್ಞೋ ಪರಾಜಯವತ್ಥು ತತಿಯಂ.