೩. ಅಯೋಘರಚರಿಯಾವಣ್ಣನಾ

೨೪. ತತಿಯೇ ಅಯೋಘರಮ್ಹಿ ಸಂವಡ್ಢೋತಿ ಅಮನುಸ್ಸಉಪದ್ದವಪರಿವಜ್ಜನತ್ಥಂ ಚತುರಸ್ಸಸಾಲವಸೇನ ಕತೇ ಮಹತಿ ಸಬ್ಬಅಯೋಮಯೇ ಗೇಹೇ ಸಂವಡ್ಢೋ. ನಾಮೇನಾಸಿ ಅಯೋಘರೋತಿ ಅಯೋಘರೇ ಜಾತಸಂವಡ್ಢಭಾವೇನೇವ ‘‘ಅಯೋಘರಕುಮಾರೋ’’ತಿ ನಾಮೇನ ಪಾಕಟೋ ಅಹೋಸಿ.

೨೫-೬. ತದಾ ಹಿ ಕಾಸಿರಞ್ಞೋ ಅಗ್ಗಮಹೇಸಿಯಾ ಪುರಿಮತ್ತಭಾವೇ ಸಪತ್ತಿ ‘‘ತವ ಜಾತಂ ಜಾತಂ ಪಜಂ ಖಾದೇಯ್ಯ’’ನ್ತಿ ಪತ್ಥನಂ ಪಟ್ಠಪೇತ್ವಾ ಯಕ್ಖಿನಿಯೋನಿಯಂ ನಿಬ್ಬತ್ತಾ ಓಕಾಸಂ ಲಭಿತ್ವಾ ತಸ್ಸಾ ವಿಜಾತಕಾಲೇ ದ್ವೇ ವಾರೇ ಪುತ್ತೇ ಖಾದಿ. ತತಿಯವಾರೇ ಪನ ಬೋಧಿಸತ್ತೋ ತಸ್ಸಾ ಕುಚ್ಛಿಯಂ ಪಟಿಸನ್ಧಿಂ ಗಣ್ಹಿ. ರಾಜಾ ‘‘ದೇವಿಯಾ ಜಾತಂ ಜಾತಂ ಪಜಂ ಏಕಾ ಯಕ್ಖಿನೀ ಖಾದತಿ, ಕಿಂ ನು ಖೋ ಕಾತಬ್ಬ’’ನ್ತಿ ಮನುಸ್ಸೇಹಿ ಸಮ್ಮನ್ತೇತ್ವಾ ‘‘ಅಮನುಸ್ಸಾ ನಾಮ ಅಯೋಘರಸ್ಸ ಭಾಯನ್ತಿ, ಅಯೋಘರಂ ಕಾತುಂ ವಟ್ಟತೀ’’ತಿ ವುತ್ತೇ ಕಮ್ಮಾರೇ ಆಣಾಪೇತ್ವಾ ಥಮ್ಭೇ ಆದಿಂ ಕತ್ವಾ ಅಯೋಮಯೇಹೇವ ಸಬ್ಬಗೇಹಸಮ್ಭಾರೇಹಿ ಚತುರಸ್ಸಸಾಲಂ ಮಹನ್ತಂ ಅಯೋಘರಂ ನಿಟ್ಠಾಪೇತ್ವಾ ಪರಿಪಕ್ಕಗಬ್ಭಂ ದೇವಿಂ ತತ್ಥ ವಾಸೇಸಿ. ಸಾ ತತ್ಥ ಧಞ್ಞಪುಞ್ಞಲಕ್ಖಣಂ ಪುತ್ತಂ ವಿಜಾಯಿ. ‘‘ಅಯೋಘರಕುಮಾರೋ’’ತ್ವೇವಸ್ಸ ನಾಮಂ ಕರಿಂಸು. ತಂ ಧಾತೀನಂ ದತ್ವಾ ಮಹನ್ತಂ ಆರಕ್ಖಂ ಸಂವಿದಹಿತ್ವಾ ರಾಜಾ ದೇವಿಂ ಅನ್ತೇಪುರಂ ಆನೇಸಿ. ಯಕ್ಖಿನೀಪಿ ಉದಕವಾರಂ ಗನ್ತ್ವಾ ವೇಸ್ಸವಣಸ್ಸ ಉದಕಂ ವಹನ್ತೀ ಜೀವಿತಕ್ಖಯಂ ಪತ್ತಾ.

ಮಹಾಸತ್ತೋ ಅಯೋಘರೇಯೇವ ವಡ್ಢಿತ್ವಾ ವಿಞ್ಞುತಂ ಪತ್ತೋ, ತತ್ಥೇವ ಸಬ್ಬಸಿಪ್ಪಾನಿ ಉಗ್ಗಣ್ಹಿ. ರಾಜಾ ಪುತ್ತಂ ಸೋಳಸವಸ್ಸುದ್ದೇಸಿಕಂ ವಿದಿತ್ವಾ ‘‘ರಜ್ಜಮಸ್ಸ ದಸ್ಸಾಮೀ’’ತಿ ಅಮಚ್ಚೇ ಆಣಾಪೇಸಿ – ‘‘ಪುತ್ತಂ ಮೇ ಆನೇಥಾ’’ತಿ. ತೇ ‘‘ಸಾಧು, ದೇವಾ’’ತಿ ನಗರಂ ಅಲಙ್ಕಾರಾಪೇತ್ವಾ ಸಬ್ಬಾಲಙ್ಕಾರವಿಭೂಸಿತಂ ಮಙ್ಗಲವಾರಣಂ ಆದಾಯ ತತ್ಥ ಗನ್ತ್ವಾ ಕುಮಾರಂ ಅಲಙ್ಕರಿತ್ವಾ ಹತ್ಥಿಕ್ಖನ್ಧೇ ನಿಸೀದಾಪೇತ್ವಾ ನಗರಂ ಪದಕ್ಖಿಣಂ ಕಾರೇತ್ವಾ ರಞ್ಞೋ ದಸ್ಸೇಸುಂ. ಮಹಾಸತ್ತೋ ರಾಜಾನಂ ವನ್ದಿತ್ವಾ ಅಟ್ಠಾಸಿ. ರಾಜಾ ತಸ್ಸ ಸರೀರಸೋಭಂ ಓಲೋಕೇತ್ವಾ ಬಲವಸಿನೇಹೇನ ತಂ ಆಲಿಙ್ಗಿತ್ವಾ ‘‘ಅಜ್ಜೇವ ಮೇ ಪುತ್ತಂ ಅಭಿಸಿಞ್ಚಥಾ’’ತಿ ಅಮಚ್ಚೇ ಆಣಾಪೇಸಿ. ಮಹಾಸತ್ತೋ ಪಿತರಂ ವನ್ದಿತ್ವಾ ‘‘ನ ಮಯ್ಹಂ ರಜ್ಜೇನ ಅತ್ಥೋ, ಅಹಂ ಪಬ್ಬಜಿಸ್ಸಾಮಿ, ಪಬ್ಬಜ್ಜಂ ಮೇ ಅನುಜಾನಾಥಾ’’ತಿ ಆಹ. ತೇನ ವುತ್ತಂ ‘‘ದುಕ್ಖೇನ ಜೀವಿತೋ ಲದ್ಧೋ’’ತಿಆದಿ.

ತತ್ಥ ದುಕ್ಖೇನಾತಿ, ತಾತ, ತವ ಭಾತಿಕಾ ದ್ವೇ ಏಕಾಯ ಯಕ್ಖಿನಿಯಾ ಖಾದಿತಾ, ತುಯ್ಹಂ ಪನ ತತೋ ಅಮನುಸ್ಸಭಯತೋ ನಿವಾರಣತ್ಥಂ ಕತೇನ ದುಕ್ಖೇನ ಮಹತಾ ಆಯಾಸೇನ ಜೀವಿತೋ ಲದ್ಧೋ. ಸಂಪೀಳೇ ಪತಿಪೋಸಿತೋತಿ ನಾನಾವಿಧಾಯ ಅಮನುಸ್ಸರಕ್ಖಾಯ ಸಮ್ಬಾಧೇ ಅಯೋಘರೇ ವಿಜಾಯನಕಾಲತೋ ಪಟ್ಠಾಯ ಯಾವ ಸೋಳಸವಸ್ಸುಪ್ಪತ್ತಿಯಾ ಸಮ್ಬಾಧೇ ಸಂವಡ್ಢಿತೋತಿ ಅತ್ಥೋ. ಅಜ್ಜೇವ, ಪುತ್ತ, ಪಟಿಪಜ್ಜ, ಕೇವಲಂ ವಸುಧಂ ಇಮನ್ತಿ ಕಞ್ಚನಮಾಲಾಲಙ್ಕತಸ್ಸ ಸೇತಚ್ಛತ್ತಸ್ಸ ಹೇಟ್ಠಾ ರತನರಾಸಿಮ್ಹಿ ಠಪೇತ್ವಾ ತೀಹಿ ಸಙ್ಖೇಹಿ ಅಭಿಸಿಞ್ಚಿಯಮಾನೋ ಇಮಂ ಕುಲಸನ್ತಕಂ ಕೇವಲಂ ಸಕಲಂ ಸಮುದ್ದಪರಿಯನ್ತಂ ತತೋಯೇವ ಸಹ ರಟ್ಠೇಹೀತಿ ಸರಟ್ಠಕಂ ಸಹ ನಿಗಮೇಹಿ ಮಹಾಗಾಮೇಹೀತಿ ಸನಿಗಮಂ ಅಪರಿಮಿತೇನ ಪರಿವಾರಜನೇನ ಸದ್ಧಿಂ ಸಜನಂ ಇಮಂ ವಸುಧಂ ಮಹಾಪಥವಿಂ ಅಜ್ಜೇವ, ಪುತ್ತ, ಪಟಿಪಜ್ಜ, ರಜ್ಜಂ ಕಾರೇಹೀತಿ ಅತ್ಥೋ. ವನ್ದಿತ್ವಾ ಖತ್ತಿಯಂ. ಅಞ್ಜಲಿಂ ಪಗ್ಗಹೇತ್ವಾನ, ಇದಂ ವಚನಮಬ್ರವಿನ್ತಿ ಖತ್ತಿಯಂ ಕಾಸಿರಾಜಾನಂ ಮಮ ಪಿತರಂ ವನ್ದಿತ್ವಾ ತಸ್ಸ ಅಞ್ಜಲಿಂ ಪಣಾಮೇತ್ವಾ ಇದಂ ವಚನಂ ಅಭಾಸಿಂ.

೨೭. ಯೇ ಕೇಚಿ ಮಹಿಯಾ ಸತ್ತಾತಿ ಇಮಿಸ್ಸಾ ಮಹಾಪಥವಿಯಾ ಯೇ ಕೇಚಿ ಸತ್ತಾ ನಾಮ. ಹೀನಮುಕ್ಕಟ್ಠಮಜ್ಝಿಮಾತಿ ಲಾಮಕಾ ಚೇವ ಉತ್ತಮಾ ಚ, ಉಭಿನ್ನಂ ವೇಮಜ್ಝೇ ಭವತ್ತಾ ಮಜ್ಝಿಮಾ ಚ. ಸಕೇ ಗೇಹೇತಿ ಸಬ್ಬೇ ತೇ ಸಕೇ ಗೇಹೇ. ಸಕಞಾತಿಭೀತಿ ಸಕೇಹಿ ಞಾತೀಹಿ ಸಮ್ಮೋದಮಾನಾ ವಿಸ್ಸಟ್ಠಾ ಅನುಕ್ಕಣ್ಠಿತಾ ಯಥಾವಿಭವಂ ವಡ್ಢನ್ತಿ.

೨೮. ಇದಂ ಲೋಕೇ ಉತ್ತರಿಯನ್ತಿ ಇದಂ ಪನ ಇಮಸ್ಮಿಂ ಲೋಕೇ ಅಸದಿಸಂ, ಮಯ್ಹಂ ಏವ ಆವೇಣಿಕಂ. ಕಿಂ ಪನ ತಂ ಸಂಪೀಳೇ ಮಮ ಪೋಸನನ್ತಿ ಸಮ್ಬಾಧೇ ಮಮ ಸಂವಡ್ಢನಂ. ತಥಾ ಹಿ ಅಯೋಘರಮ್ಹಿ ಸಂವಡ್ಢೋ, ಅಪ್ಪಭೇ ಚನ್ದಸೂರಿಯೇತಿ ಚನ್ದಸೂರಿಯಾನಂ ಪಭಾರಹಿತೇ ಅಯೋಘರೇ ಸಂವಡ್ಢೋಮ್ಹೀತಿ ಸಂವಡ್ಢೋ ಅಮ್ಹಿ.

೨೯. ಪೂತಿಕುಣಪಸಮ್ಪುಣ್ಣಾತಿ ಪೂತಿಗನ್ಧನಾನಪ್ಪಕಾರಕುಣಪಸಮ್ಪುಣ್ಣಾ ಗೂಥನಿರಯಸದಿಸಾ. ಮಾತು ಕುಚ್ಛಿತೋ ಜೀವಿತಸಂಸಯೇ ವತ್ತಮಾನೇ ಕಥಂ ಮುಚ್ಚಿತ್ವಾ ನಿಕ್ಖಮಿತ್ವಾ. ತತೋ ಘೋರತರೇತಿ ತತೋಪಿ ಗಬ್ಭವಾಸತೋ ದಾರುಣತರೇ, ಅವಿಸ್ಸಟ್ಠವಾಸೇನ ದುಕ್ಖೇ. ಪಕ್ಖಿತ್ತಯೋಘರೇತಿ ಪಕ್ಖಿತ್ತೋ ಅಯೋಘರೇ, ಬನ್ಧನಾಗಾರೇ ಠಪಿತೋ ವಿಯ ಅಹೋಸಿನ್ತಿ ದಸ್ಸೇತಿ.

೩೦. ಯದಿಹನ್ತಿ ಏತ್ಥ ಯದೀತಿ ನಿಪಾತಮತ್ತಂ. ತಾದಿಸನ್ತಿ ಯಾದಿಸಂ ಪುಬ್ಬೇ ವುತ್ತಂ, ತಾದಿಸಂ ಪರಮದಾರುಣಂ ದುಕ್ಖಂ ಪತ್ವಾ ಅಹಂ ರಜ್ಜೇಸು ಯದಿ ರಜ್ಜಾಮಿ ಯದಿ ರಮಿಸ್ಸಾಮಿ, ಏವಂ ಸನ್ತೇ ಪಾಪಾನಂ ಲಾಮಕಾನಂ ನಿಹೀನಪುರಿಸಾನಂ ಉತ್ತಮೋ ನಿಹೀನತಮೋ ಸಿಯಂ.

೩೧. ಉಕ್ಕಣ್ಠಿತೋಮ್ಹಿ ಕಾಯೇನಾತಿ ಅಪರಿಮುತ್ತಗಬ್ಭವಾಸಾದಿನಾ ಪೂತಿಕಾಯೇನ ಉಕ್ಕಣ್ಠಿತೋ ನಿಬ್ಬಿನ್ನೋ ಅಮ್ಹಿ. ರಜ್ಜೇನಮ್ಹಿ ಅನತ್ಥಿಕೋತಿ ರಜ್ಜೇನಪಿ ಅನತ್ಥಿಕೋ ಅಮ್ಹಿ. ಯಕ್ಖಿನಿಯಾ ಹತ್ಥತೋ ಮುತ್ತೋಪಿ ಹಿ ನಾಹಂ ಅಜರಾಮರೋ, ಕಿಂ ಮೇ ರಜ್ಜೇನ, ರಜ್ಜಞ್ಹಿ ನಾಮ ಸಬ್ಬೇಸಂ ಅನತ್ಥಾನಂ ಸನ್ನಿಪಾತಟ್ಠಾನಂ, ತತ್ಥ ಠಿತಕಾಲತೋ ಪಟ್ಠಾಯ ದುನ್ನಿಕ್ಖಮಂ ಹೋತಿ, ತಸ್ಮಾ ತಂ ಅನುಪಗನ್ತ್ವಾ ನಿಬ್ಬುತಿಂ ಪರಿಯೇಸಿಸ್ಸಂ, ಯತ್ಥ ಮಂ ಮಚ್ಚು ನ ಮದ್ದಿಯೇತಿ ಯತ್ಥ ಠಿತಂ ಮಂ ಮಹಾಸೇನೋ ಮಚ್ಚುರಾಜಾ ನ ಮದ್ದಿಯೇ ನ ಓತ್ಥರೇಯ್ಯ ನ ಅಭಿಭವೇಯ್ಯ, ತಂ ನಿಬ್ಬುತಿಂ ಅಮತಮಹಾನಿಬ್ಬಾನಂ ಪರಿಯೇಸಿಸ್ಸಾಮೀತಿ.

೩೨. ಏವಾಹಂ ಚಿನ್ತಯಿತ್ವಾನಾತಿ ಏವಂ ಇಮಿನಾ ವುತ್ತಪ್ಪಕಾರೇನ ನಾನಪ್ಪಕಾರಂ ಸಂಸಾರೇ ಆದೀನವಂ ಪಚ್ಚವೇಕ್ಖಣೇನ ನಿಬ್ಬಾನೇ ಆನಿಸಂಸದಸ್ಸನೇನ ಚ ಯೋನಿಸೋ ಚಿನ್ತೇತ್ವಾ. ವಿರವನ್ತೇ ಮಹಾಜನೇತಿ ಮಯಾ ವಿಪ್ಪಯೋಗದುಕ್ಖಾಸಹನೇನ ವಿರವನ್ತೇ ಪರಿದೇವನ್ತೇ ಮಾತಾಪಿತುಪ್ಪಮುಖೇ ಮಹನ್ತೇ ಜನೇ. ನಾಗೋವ ಬನ್ಧನಂ ಛೇತ್ವಾತಿ ಯಥಾ ನಾಮ ಮಹಾಬಲೋ ಹತ್ಥಿನಾಗೋ ದುಬ್ಬಲತರಂ ರಜ್ಜುಬನ್ಧನಂ ಸುಖೇನೇವ ಛಿನ್ದತಿ, ಏವಮೇವ ಞಾತಿಸಙ್ಗಾದಿಭೇದಸ್ಸ ತಸ್ಮಿಂ ಜನೇ ತಣ್ಹಾಬನ್ಧನಸ್ಸ ಛಿನ್ದನೇನ ಬನ್ಧನಂ ಛೇತ್ವಾ ಕಾನನಸಙ್ಖಾತಂ ಮಹಾವನಂ ಪಬ್ಬಜ್ಜೂಪಗಮನವಸೇನ ಪಾವಿಸಿಂ. ಓಸಾನಗಾಥಾ ವುತ್ತತ್ಥಾ ಏವ.

ತತ್ಥ ಚ ಮಹಾಸತ್ತೋ ಅತ್ತನೋ ಪಬ್ಬಜ್ಜಾಧಿಪ್ಪಾಯಂ ಜಾನಿತ್ವಾ ‘‘ತಾತ, ಕಿಂಕಾರಣಾ ಪಬ್ಬಜಸೀ’’ತಿ ರಞ್ಞಾ ವುತ್ತೋ ‘‘ದೇವ, ಅಹಂ ಮಾತುಕುಚ್ಛಿಮ್ಹಿ ದಸ ಮಾಸೇ ಗೂಥನಿರಯೇ ವಿಯ ವಸಿತ್ವಾ ಮಾತು ಕುಚ್ಛಿತೋ ನಿಕ್ಖನ್ತೋ ಯಕ್ಖಿನಿಯಾ ಭಯೇನ ಸೋಳಸವಸ್ಸಾನಿ ಬನ್ಧನಾಗಾರೇ ವಸನ್ತೋ ಬಹಿ ಓಲೋಕೇತುಮ್ಪಿ ನ ಲಭಿಂ, ಉಸ್ಸದನಿರಯೇ ಪಕ್ಖಿತ್ತೋ ವಿಯ ಅಹೋಸಿಂ, ಯಕ್ಖಿನಿತೋ ಮುತ್ತೋಪಿ ಅಜರಾಮರೋ ನ ಹೋಮಿ, ಮಚ್ಚು ನಾಮೇಸ ನ ಸಕ್ಕಾ ಕೇನಚಿ ಜಿನಿತುಂ, ಭವೇ ಉಕ್ಕಣ್ಠಿತೋಮ್ಹಿ, ಯಾವ ಮೇ ಬ್ಯಾಧಿಜರಾಮರಣಾನಿ ನಾಗಚ್ಛನ್ತಿ, ತಾವದೇವ ಪಬ್ಬಜಿತ್ವಾ ಧಮ್ಮಂ ಚರಿಸ್ಸಾಮಿ, ಅಲಂ ಮೇ ರಜ್ಜೇನ, ಅನುಜಾನಾಹಿ ಮಂ, ದೇವ, ಪಬ್ಬಜಿತು’’ನ್ತಿ ವತ್ವಾ –

‘‘ಯಮೇಕರತ್ತಿಂ ಪಠಮಂ, ಗಬ್ಭೇ ವಸತಿ ಮಾಣವೋ;

ಅಬ್ಭುಟ್ಠಿತೋವ ಸೋ ಯಾತಿ, ಸ ಗಚ್ಛಂ ನ ನಿವತ್ತತೀ’’ತಿ. (ಜಾ. ೧.೧೫.೩೬೩) –

ಆದಿನಾ ಚತುವೀಸತಿಯಾ ಗಾಥಾಹಿ ಪಿತು ಧಮ್ಮಂ ದೇಸೇತ್ವಾ ‘‘ಮಹಾರಾಜ, ತುಮ್ಹಾಕಂ ರಜ್ಜಂ ತುಮ್ಹಾಕಮೇವ ಹೋತು, ನ ಮಯ್ಹಂ ಇಮಿನಾ ಅತ್ಥೋ, ತುಮ್ಹೇಹಿ ಸದ್ಧಿಂ ಕಥೇನ್ತೇಯೇವ ಬ್ಯಾಧಿಜರಾಮರಣಾನಿ ಆಗಚ್ಛೇಯ್ಯುಂ, ತಿಟ್ಠಥ ತುಮ್ಹೇ’’ತಿ ವತ್ವಾ ಅಯದಾಮಂ ಛಿನ್ದಿತ್ವಾ ಮತ್ತಹತ್ಥೀ ವಿಯ, ಕಞ್ಚನಪಞ್ಜರಂ ಭಿನ್ದಿತ್ವಾ ಸೀಹಪೋತಕೋ ವಿಯ, ಕಾಮೇ ಪಹಾಯ ಮಾತಾಪಿತರೋ ವನ್ದಿತ್ವಾ ನಿಕ್ಖಮಿ. ಅಥಸ್ಸ ಪಿತಾ ‘‘ಅಯಂ ನಾಮ ಕುಮಾರೋ ಪಬ್ಬಜಿತುಕಾಮೋ, ಕಿಮಙ್ಗಂ ಪನಾಹಂ, ಮಮಾಪಿ ರಜ್ಜೇನ ಅತ್ಥೋ ನತ್ಥೀ’’ತಿ ರಜ್ಜಂ ಪಹಾಯ ತೇನ ಸದ್ಧಿಂ ಏವ ನಿಕ್ಖಮಿ. ತಸ್ಮಿಂ ನಿಕ್ಖಮನ್ತೇ ದೇವೀಪಿ ಅಮಚ್ಚಾಪಿ ಬ್ರಾಹ್ಮಣಗಹಪತಿಕಾದಯೋಪೀತಿ ಸಕಲನಗರವಾಸಿನೋ ಭೋಗೇ ಛಡ್ಡೇತ್ವಾ ನಿಕ್ಖಮಿಂಸು. ಸಮಾಗಮೋ ಮಹಾ ಅಹೋಸಿ, ಪರಿಸಾ ದ್ವಾದಸಯೋಜನಿಕಾ ಜಾತಾ, ತೇ ಆದಾಯ ಮಹಾಸತ್ತೋ ಹಿಮವನ್ತಂ ಪಾವಿಸಿ.

ಸಕ್ಕೋ ದೇವರಾಜಾ ತಸ್ಸ ನಿಕ್ಖನ್ತಭಾವಂ ಞತ್ವಾ ವಿಸ್ಸಕಮ್ಮಂ ಪೇಸೇತ್ವಾ ದ್ವಾದಸಯೋಜನಾಯಾಮಂ ಸತ್ತಯೋಜನವಿತ್ಥಾರಂ ಅಸ್ಸಮಪದಂ ಕಾರೇಸಿ, ಸಬ್ಬೇ ಚ ಪಬ್ಬಜಿತಪರಿಕ್ಖಾರೇ ಪಟಿಯಾದಾಪೇಸಿ. ಇಧ ಮಹಾಸತ್ತಸ್ಸ ಪಬ್ಬಜ್ಜಾ ಚ ಓವಾದದಾನಞ್ಚ ಬ್ರಹ್ಮಲೋಕಪರಾಯನತಾ ಚ ಪರಿಸಾಯ ಸಮ್ಮಾ ಪಟಿಪತ್ತಿ ಚ ಸಬ್ಬಾ ಮಹಾಗೋವಿನ್ದಚರಿಯಾಯಂ (ಚರಿಯಾ. ೧.೩೭ ಆದಯೋ) ವುತ್ತನಯೇನೇವ ವೇದಿತಬ್ಬಾ.

ತದಾ ಮಾತಾಪಿತರೋ ಮಹಾರಾಜಕುಲಾನಿ ಅಹೇಸುಂ, ಪರಿಸಾ ಬುದ್ಧಪರಿಸಾ, ಅಯೋಘರಪಣ್ಡಿತೋ ಲೋಕನಾಥೋ.

ತಸ್ಸ ಸೇಸಪಾರಮಿನಿದ್ಧಾರಣಾ ಆನುಭಾವವಿಭಾವನಾ ಚ ಹೇಟ್ಠಾ ವುತ್ತನಯೇನೇವ ವೇದಿತಬ್ಬಾತಿ.

ಅಯೋಘರಚರಿಯಾವಣ್ಣನಾ ನಿಟ್ಠಿತಾ.