೧೦. ಸಙ್ಖಪಾಲಚರಿಯಾವಣ್ಣನಾ

೮೫. ದಸಮೇ ಸಙ್ಖಪಾಲೋತಿಆದೀಸು ಅಯಂ ಸಙ್ಖೇಪತ್ಥೋ – ದೇವಭೋಗಸಮ್ಪತ್ತಿಸದಿಸಾಯ ಮಹತಿಯಾ ನಾಗಿದ್ಧಿಯಾ ಸಮನ್ನಾಗತತ್ತಾ ಮಹಿದ್ಧಿಕೋ. ಹೇಟ್ಠಾ ದ್ವೇ, ಉಪರಿ ದ್ವೇತಿ ಚತಸ್ಸೋ ದಾಠಾ ಆವುಧಾ ಏತಸ್ಸಾತಿ ದಾಠಾವುಧೋ. ಉಗ್ಗತೇಜವಿಸತಾಯ ಘೋರವಿಸೋ. ನಾಗಯೋನಿಸಿದ್ಧಾಹಿ ದ್ವೀಹಿ ಜಿವ್ಹಾಹಿ ಸಮನ್ನಾಗತೋತಿ ದ್ವಿಜಿವ್ಹೋ. ಮಹಾನುಭಾವಾನಮ್ಪಿ ಉರೇನ ಗಮನತೋ ‘‘ಉರಗಾ’’ತಿ ಲದ್ಧನಾಮಾನಂ ನಾಗಾನಂ ಅಧಿಪತಿಭಾವತೋ ಉರಗಾಧಿಭೂ.

೮೬. ದ್ವಿನ್ನಂ ಮಗ್ಗಾನಂ ವಿನಿವಿಜ್ಝಿತ್ವಾ ಸನ್ಧಿಭಾವೇನ ಗತಟ್ಠಾನಸಙ್ಖಾತೇ ಚತುಪ್ಪಥೇ. ಅಪರಾಪರಂ ಮಹಾಜನಸಞ್ಚರಣಟ್ಠಾನಭೂತೇ ಮಹಾಮಗ್ಗೇ. ತತೋ ಏವ ಮಹಾಜನಸಮಾಕಿಣ್ಣಭಾವೇನ ನಾನಾಜನಸಮಾಕುಲೇ. ಇದಾನಿ ವಕ್ಖಮಾನಾನಂ ಚತುನ್ನಂ ಅಙ್ಗಾನಂ ವಸೇನ ಚತುರೋ ಅಙ್ಗೇ. ಅಧಿಟ್ಠಾಯ ಅಧಿಟ್ಠಹಿತ್ವಾ, ಚಿತ್ತೇ ಠಪೇತ್ವಾ. ಯದಾಹಂ ಸಙ್ಖಪಾಲೋ ನಾಮ ಯಥಾವುತ್ತರೂಪೋ ನಾಗರಾಜಾ ಹೋಮಿ, ತದಾ ಹೇಟ್ಠಾ ವುತ್ತಪ್ಪಕಾರೇ ಠಾನೇ ವಾಸಂ ಉಪೋಸಥವಾಸವಸೇನ ನಿವಾಸಂ ಅಕಪ್ಪಯಿಂ ಕಪ್ಪೇಸಿಂ.

ಮಹಾಸತ್ತೋ ಹಿ ದಾನಸೀಲಾದಿಪುಞ್ಞಪಸುತೋ ಹುತ್ವಾ ಬೋಧಿಪರಿಯೇಸನವಸೇನ ಅಪರಾಪರಂ ದೇವಮನುಸ್ಸಗತೀಸು ಸಂಸರನ್ತೋ ಕದಾಚಿ ದೇವಭೋಗಸದಿಸಸಮ್ಪತ್ತಿಕೇ ನಾಗಭವನೇ ನಿಬ್ಬತ್ತಿತ್ವಾ ಸಙ್ಖಪಾಲೋ ನಾಮ ನಾಗರಾಜಾ ಅಹೋಸಿ ಮಹಿದ್ಧಿಕೋ ಮಹಾನುಭಾವೋ. ಸೋ ಗಚ್ಛನ್ತೇ ಕಾಲೇ ತಾಯ ಸಮ್ಪತ್ತಿಯಾ ವಿಪ್ಪಟಿಸಾರೀ ಹುತ್ವಾ ಮನುಸ್ಸಯೋನಿಂ ಪತ್ಥೇನ್ತೋ ಉಪೋಸಥವಾಸಂ ವಸಿ. ಅಥಸ್ಸ ನಾಗಭವನೇ ವಸನ್ತಸ್ಸ ಉಪೋಸಥವಾಸೋ ನ ಸಮ್ಪಜ್ಜತಿ, ಸೀಲಂ ಸಂಕಿಲಿಸ್ಸತಿ, ತೇನ ಸೋ ನಾಗಭವನಾ ನಿಕ್ಖಮಿತ್ವಾ ಕಣ್ಹವಣ್ಣಾಯ ನದಿಯಾ ಅವಿದೂರೇ ಮಹಾಮಗ್ಗಸ್ಸ ಚ ಏಕಪದಿಕಮಗ್ಗಸ್ಸ ಚ ಅನ್ತರೇ ಏಕಂ ವಮ್ಮಿಕಂ ಪರಿಕ್ಖಿಪಿತ್ವಾ ಉಪೋಸಥಂ ಅಧಿಟ್ಠಾಯ ಚಾತುದ್ದಸಪನ್ನರಸೇಸು ಸಮಾದಿನ್ನಸೀಲೋ ‘‘ಮಮ ಚಮ್ಮಾದೀನಿ ಅತ್ಥಿಕಾ ಗಣ್ಹನ್ತೂ’’ತಿ ಅತ್ತಾನಂ ದಾನಮುಖೇ ವಿಸ್ಸಜ್ಜೇತ್ವಾ ನಿಪಜ್ಜತಿ, ಪಾಟಿಪದೇ ನಾಗಭವನಂ ಗಚ್ಛತಿ. ತೇನ ವುತ್ತಂ ‘‘ಪುನಾಪರಂ ಯದಾ ಹೋಮಿ, ಸಙ್ಖಪಾಲೋ’’ತಿಆದಿ. ತಸ್ಸತ್ಥೋ ವುತ್ತೋ ಏವ.

೮೭. ಯಂ ಪನೇತ್ಥ ಛವಿಯಾ ಚಮ್ಮೇನಾತಿಆದಿಕಂ ‘‘ಚತುರೋ ಅಙ್ಗೇ ಅಧಿಟ್ಠಾಯಾ’’ತಿ ವುತ್ತಂ ಚತುರಙ್ಗಾಧಿಟ್ಠಾನದಸ್ಸನಂ. ಛವಿಚಮ್ಮಾನಿ ಹಿ ಇಧ ಏಕಮಙ್ಗಂ. ಏವಂ ಉಪೋಸಥವಾಸಂ ವಸನ್ತಸ್ಸ ಮಹಾಸತ್ತಸ್ಸ ದೀಘೋ ಅದ್ಧಾ ವೀತಿವತ್ತೋ.

ಅಥೇಕದಿವಸಂ ತಸ್ಮಿಂ ತಥಾ ಸೀಲಂ ಸಮಾದಿಯಿತ್ವಾ ನಿಪನ್ನೇ ಸೋಳಸ ಭೋಜಪುತ್ತಾ ‘‘ಮಂಸಂ ಆಹರಿಸ್ಸಾಮಾ’’ತಿ ಆವುಧಹತ್ಥಾ ಅರಞ್ಞೇ ಚರನ್ತಾ ಕಿಞ್ಚಿ ಅಲಭಿತ್ವಾ ನಿಕ್ಖಮನ್ತಾ ತಂ ವಮ್ಮಿಕಮತ್ಥಕೇ ನಿಪನ್ನಂ ದಿಸ್ವಾ ‘‘ಮಯಂ ಅಜ್ಜ ಗೋಧಾಪೋತಕಮ್ಪಿ ನ ಲಭಿಮ್ಹಾ, ಇಮಂ ನಾಗರಾಜಾನಂ ವಧಿತ್ವಾ ಖಾದಿಸ್ಸಾಮಾ’’ತಿ ಚಿನ್ತೇತ್ವಾ ‘‘ಮಹಾ ಖೋ ಪನೇಸ ಗಯ್ಹಮಾನೋ ಪಲಾಯೇಯ್ಯಾತಿ ಯಥಾನಿಪನ್ನಕಂಯೇವ ನಂ ಭೋಗೇಸು ಸೂಲೇಹಿ ವಿಜ್ಝಿತ್ವಾ ದುಬ್ಬಲಂ ಕತ್ವಾ ಗಣ್ಹಿಸ್ಸಾಮಾ’’ತಿ ಸೂಲಾನಿ ಆದಾಯ ಉಪಸಙ್ಕಮಿಂಸು. ಬೋಧಿಸತ್ತಸ್ಸಾಪಿ ಸರೀರಂ ಮಹನ್ತಂ ಏಕದೋಣಿಕನಾವಪ್ಪಮಾಣಂ ವಟ್ಟೇತ್ವಾ ಠಪಿತಸುಮನಪುಪ್ಫದಾಮಂ ವಿಯ ಜಿಞ್ಜುಕಫಲಸದಿಸೇಹಿ ಅಕ್ಖೀಹಿ ಜಯಸುಮನಪುಪ್ಫಸದಿಸೇನ ಚ ಸೀಸೇನ ಸಮನ್ನಾಗತಂ ಅತಿವಿಯ ಸೋಭತಿ. ಸೋ ತೇಸಂ ಸೋಳಸನ್ನಂ ಜನಾನಂ ಪದಸದ್ದೇನ ಭೋಗನ್ತರತೋ ಸೀಸಂ ನೀಹರಿತ್ವಾ ರತ್ತಕ್ಖೀನಿ ಉಮ್ಮೀಲೇತ್ವಾ ತೇ ಸೂಲಹತ್ಥೇ ಆಗಚ್ಛನ್ತೇ ದಿಸ್ವಾ ‘‘ಅಜ್ಜ ಮಯ್ಹಂ ಮನೋರಥೋ ಮತ್ಥಕಂ ಪಾಪುಣಿಸ್ಸತೀ’’ತಿ ಅತ್ತಾನಂ ದಾನಮುಖೇ ನಿಯ್ಯಾತೇತ್ವಾ ‘‘ಇಮೇ ಮಮ ಸರೀರಂ ಸತ್ತೀಹಿ ಕೋಟ್ಟೇತ್ವಾ ಛಿದ್ದಾವಛಿದ್ದಂ ಕರೋನ್ತೇ ನ ಓಲೋಕೇಸ್ಸಾಮೀ’’ತಿ ಅತ್ತನೋ ಸೀಲಖಣ್ಡಭಯೇನ ದಳ್ಹಂ ಅಧಿಟ್ಠಾನಂ ಅಧಿಟ್ಠಹಿತ್ವಾ ಸೀಸಂ ಭೋಗನ್ತರೇ ಏವ ಪವೇಸೇತ್ವಾ ನಿಪಜ್ಜಿ.

ಅಥ ನಂ ತೇ ಉಪಗನ್ತ್ವಾ ನಙ್ಗುಟ್ಠೇ ಗಹೇತ್ವಾ ಆಕಡ್ಢನ್ತಾ ಭೂಮಿಯಂ ಪಾತೇತ್ವಾ ತಿಖಿಣಸೂಲೇಹಿ ಅಟ್ಠಸು ಠಾನೇಸು ವಿಜ್ಝಿತ್ವಾ ಸಕಣ್ಟಕಾ ಕಾಳವೇತ್ತಯಟ್ಠಿಯೋ ಪಹಾರಮುಖೇಹಿ ಪವೇಸೇತ್ವಾ ಅಟ್ಠಸು ಠಾನೇಸು ಕಾಜೇಹಿ ಆದಾಯ ಮಹಾಮಗ್ಗಂ ಪಟಿಪಜ್ಜಿಂಸು. ಮಹಾಸತ್ತೋ ಸೂಲೇಹಿ ವಿಜ್ಝನತೋ ಪಟ್ಠಾಯ ಏಕಟ್ಠಾನೇಪಿ ಅಕ್ಖೀನಿ ಉಮ್ಮೀಲೇತ್ವಾ ತೇ ನ ಓಲೋಕೇಸಿ. ತಸ್ಸ ಅಟ್ಠಹಿ ಕಾಜೇಹಿ ಆದಾಯ ನೀಯಮಾನಸ್ಸ ಸೀಸಂ ಓಲಮ್ಬಿತ್ವಾ ಭೂಮಿಂ ಪಹರತಿ. ಅಥ ನಂ ‘‘ಸೀಸಮಸ್ಸ ಓಲಮ್ಬತೀ’’ತಿ ಮಹಾಮಗ್ಗೇ ನಿಪಜ್ಜಾಪೇತ್ವಾ ಸುಖುಮೇನ ಸೂಲೇನ ನಾಸಾಪುಟೇ ವಿಜ್ಝಿತ್ವಾ ರಜ್ಜುಕಂ ಪವೇಸೇತ್ವಾ ಸೀಸಂ ಉಕ್ಖಿಪಿತ್ವಾ ಕಾಜಕೋಟಿಯಂ ಲಗ್ಗೇತ್ವಾ ಪುನಪಿ ಉಕ್ಖಿಪಿತ್ವಾ ಮಗ್ಗಂ ಪಟಿಪಜ್ಜಿಂಸು. ತೇನ ವುತ್ತಂ –

೮೮. ‘‘ಅದ್ದಸಂಸು ಭೋಜಪುತ್ತಾ, ಖರಾ ಲುದ್ದಾ ಅಕಾರುಣಾ;

ಉಪಗಞ್ಛುಂ ಮಮಂ ತತ್ಥ, ದಣ್ಡಮುಗ್ಗರಪಾಣಿನೋ.

೮೯. ‘‘ನಾಸಾಯ ವಿನಿವಿಜ್ಝಿತ್ವಾ, ನಙ್ಗುಟ್ಠೇ ಪಿಟ್ಠಿಕಣ್ಟಕೇ;

ಕಾಜೇ ಆರೋಪಯಿತ್ವಾನ, ಭೋಜಪುತ್ತಾ ಹರಿಂಸು ಮ’’ನ್ತಿ.

ತತ್ಥ ಭೋಜಪುತ್ತಾತಿ ಲುದ್ದಪುತ್ತಾ. ಖರಾತಿ ಕಕ್ಖಳಾ, ಫರುಸಕಾಯವಚೀಕಮ್ಮನ್ತಾ. ಲುದ್ದಾತಿ ದಾರುಣಾ, ಘೋರಮಾನಸಾ. ಅಕಾರುಣಾತಿ ನಿಕ್ಕರುಣಾ. ದಣ್ಡಮುಗ್ಗರಪಾಣಿನೋತಿ ಚತುರಸ್ಸದಣ್ಡಹತ್ಥಾ. ನಾಸಾಯ ವಿನಿವಿಜ್ಝಿತ್ವಾತಿ ರಜ್ಜುಕಂ ಪವೇಸೇತುಂ ಸುಖುಮೇನ ಸೂಲೇನ ನಾಸಾಪುಟೇ ವಿಜ್ಝಿತ್ವಾ. ನಙ್ಗುಟ್ಠೇ ಪಿಟ್ಠಿಕಣ್ಟಕೇತಿ ನಙ್ಗುಟ್ಠಪ್ಪದೇಸೇ ತತ್ಥ ತತ್ಥ ಪಿಟ್ಠಿಕಣ್ಟಕಸಮೀಪೇ ಚ ವಿನಿವಿಜ್ಝಿತ್ವಾತಿ ಸಮ್ಬನ್ಧೋ. ಕಾಜೇ ಆರೋಪಯಿತ್ವಾನಾತಿ ಅಟ್ಠಸು ಠಾನೇಸು ವಿನಿವಿಜ್ಝಿತ್ವಾ ಬದ್ಧೇಸು ಅಟ್ಠಸು ವೇತ್ತಲತಾಮಣ್ಡಲೇಸು ಏಕೇಕಸ್ಮಿಂ ಓವಿಜ್ಝಿತಂ ಏಕೇಕಂ ಕಾಜಂ ದ್ವೇ ದ್ವೇ ಭೋಜಪುತ್ತಾ ಅತ್ತನೋ ಅತ್ತನೋ ಖನ್ಧಂ ಆರೋಪೇತ್ವಾ.

೯೦. ಸಸಾಗರನ್ತಂ ಪಥವಿನ್ತಿ ಸಮುದ್ದಪರಿಯನ್ತಂ ಮಹಾಪಥವಿಂ. ಸಕಾನನಂ ಸಪಬ್ಬತನ್ತಿ ಸದ್ಧಿಂ ಕಾನನೇಹಿ ಪಬ್ಬತೇಹಿ ಚಾತಿ ಸಕಾನನಂ ಸಪಬ್ಬತಞ್ಚ. ನಾಸಾವಾತೇನ ಝಾಪಯೇತಿ ಸಚಾಹಂ ಇಚ್ಛಮಾನೋ ಇಚ್ಛನ್ತೋ ಕುಜ್ಝಿತ್ವಾ ನಾಸಾವಾತಂ ವಿಸ್ಸಜ್ಜೇಯ್ಯಂ, ಸಮುದ್ದಪರಿಯನ್ತಂ ಸಕಾನನಂ ಸಪಬ್ಬತಂ ಇಮಂ ಮಹಾಪಥವಿಂ ಝಾಪೇಯ್ಯಂ, ಸಹ ನಾಸಾವಾತವಿಸ್ಸಜ್ಜನೇನ ಛಾರಿಕಂ ಕರೇಯ್ಯಂ, ಏತಾದಿಸೋ ತದಾ ಮಯ್ಹಂ ಆನುಭಾವೋ.

೯೧. ಏವಂ ಸನ್ತೇಪಿ ಸೂಲೇಹಿ ವಿನಿವಿಜ್ಝನ್ತೇ, ಕೋಟ್ಟಯನ್ತೇಪಿ ಸತ್ತಿಭಿ. ಭೋಜಪುತ್ತೇ ನ ಕುಪ್ಪಾಮೀತಿ ದುಬ್ಬಲಭಾವಕರಣತ್ಥಂ ವೇತ್ತಲತಾಪವೇಸನತ್ಥಞ್ಚ ಸಾರದಾರೂಹಿ ತಚ್ಛೇತ್ವಾ ಕತೇಹಿ ತಿಖಿಣಸೂಲೇಹಿ ಅಟ್ಠಸು ಠಾನೇಸು ವಿಜ್ಝನ್ತೇಪಿ ದುಬ್ಬಲಭಾವಕರಣತ್ಥಂ ತಿಖಿಣಾಹಿ ಸತ್ತೀಹಿ ತಹಿಂ ತಹಿಂ ಕೋಟ್ಟಯನ್ತೇಪಿ ಭೋಜಪುತ್ತಾನಂ ಲುದ್ದಾನಂ ನ ಕುಪ್ಪಾಮಿ. ಏಸಾ ಮೇ ಸೀಲಪಾರಮೀತಿ ಏವಂ ಮಹಾನುಭಾವಸ್ಸ ತಥಾ ಅಧಿಟ್ಠಹನ್ತಸ್ಸ ಯಾ ಮೇ ಮಯ್ಹಂ ಸೀಲಖಣ್ಡಭಯೇನ ತೇಸಂ ಅಕುಜ್ಝನಾ, ಏಸಾ ಏಕನ್ತೇನೇವ ಜೀವಿತನಿರಪೇಕ್ಖಭಾವೇನ ಪವತ್ತಾ ಮಯ್ಹಂ ಸೀಲಪಾರಮೀ, ಸೀಲವಸೇನ ಪರಮತ್ಥಪಾರಮೀತಿ ಅತ್ಥೋ.

ತಥಾ ಪನ ಬೋಧಿಸತ್ತೇ ತೇಹಿ ನೀಯಮಾನೇ ಮಿಥಿಲನಗರವಾಸೀ ಆಳಾರೋ ನಾಮ ಕುಟುಮ್ಬಿಕೋ ಪಞ್ಚಸಕಟಸತಾನಿ ಆದಾಯ ಸುಖಯಾನಕೇ ನಿಸೀದಿತ್ವಾ ಗಚ್ಛನ್ತೋ ತೇ ಭೋಜಪುತ್ತೇ ಮಹಾಸತ್ತಂ ಹರನ್ತೇ ದಿಸ್ವಾ ಕಾರುಞ್ಞಂ ಉಪ್ಪಾದೇತ್ವಾ ತೇ ಲುದ್ದೇ ಪುಚ್ಛಿ – ‘‘ಕಿಸ್ಸಾಯಂ ನಾಗೋ ನೀಯತಿ, ನೇತ್ವಾ ಚಿಮಂ ಕಿಂ ಕರಿಸ್ಸಥಾ’’ತಿ? ತೇ ‘‘ಇಮಸ್ಸ ನಾಗಸ್ಸ ಮಂಸಂ ಸಾದುಞ್ಚ ಮುದುಞ್ಚ ಥೂಲಞ್ಚ ಪಚಿತ್ವಾ ಖಾದಿಸ್ಸಾಮಾ’’ತಿ ಆಹಂಸು. ಅಥ ಸೋ ತೇಸಂ ಸೋಳಸವಾಹಗೋಣೇ ಪಸತಂ ಪಸತಂ ಸುವಣ್ಣಮಾಸಕೇ ಸಬ್ಬೇಸಂ ನಿವಾಸನಪಾರುಪನಾನಿ ಭರಿಯಾನಮ್ಪಿ ತೇಸಂ ವತ್ಥಾಭರಣಾನಿ ದತ್ವಾ ‘‘ಸಮ್ಮಾ, ಅಯಂ ಮಹಾನುಭಾವೋ ನಾಗರಾಜಾ, ಅತ್ತನೋ ಸೀಲಗುಣೇನ ತುಮ್ಹಾಕಂ ನ ದುಬ್ಭಿ, ಇಮಂ ಕಿಲಮನ್ತೇಹಿ ಬಹುಂ ತುಮ್ಹೇಹಿ ಅಪುಞ್ಞಂ ಪಸುತಂ, ವಿಸ್ಸಜ್ಜೇಥಾ’’ತಿ ಆಹ. ತೇ ‘‘ಅಯಂ ಅಮ್ಹಾಕಂ ಮನಾಪೋ ಭಕ್ಖೋ, ಬಹೂ ಚ ನೋ ಉರಗಾ ಭುತ್ತಪುಬ್ಬಾ, ತಥಾಪಿ ತವ ವಚನಂ ಅಮ್ಹೇಹಿ ಪೂಜೇತಬ್ಬಂ, ತಸ್ಮಾ ಇಮಂ ನಾಗಂ ವಿಸ್ಸಜ್ಜೇಸ್ಸಾಮಾ’’ತಿ ವಿಸ್ಸಜ್ಜೇತ್ವಾ ಮಹಾಸತ್ತಂ ಭೂಮಿಯಂ ನಿಪಜ್ಜಾಪೇತ್ವಾ ಅತ್ತನೋ ಕಕ್ಖಳತಾಯ ತಾ ಕಣ್ಟಕಾಚಿತಾ ಆವುತಾ ಕಾಳವೇತ್ತಲತಾ ಕೋಟಿಯಂ ಗಹೇತ್ವಾ ಆಕಡ್ಢಿತುಂ ಆರಭಿಂಸು.

ಅಥ ಸೋ ನಾಗರಾಜಾನಂ ಕಿಲಮನ್ತಂ ದಿಸ್ವಾ ಅಕಿಲಮೇನ್ತೋವ ಅಸಿನಾ ಲತಾ ಛಿನ್ದಿತ್ವಾ ದಾರಕಾನಂ ಕಣ್ಣವೇಧತೋ ಪಟಿಹರಣನಿಯಾಮೇನ ಅದುಕ್ಖಾಪೇನ್ತೋ ಸಣಿಕಂ ನೀಹರಿ. ತಸ್ಮಿಂ ಕಾಲೇ ತೇ ಭೋಜಪುತ್ತಾ ಯಂ ಬನ್ಧನಂ ತಸ್ಸ ನತ್ಥುತೋ ಪವೇಸೇತ್ವಾ ಪಟಿಮುಕ್ಕಂ, ತಂ ಬನ್ಧನಂ ಸಣಿಕಂ ಮೋಚಯಿಂಸು. ಮಹಾಸತ್ತೋ ಮುಹುತ್ತಂ ಪಾಚೀನಾಭಿಮುಖೋ ಗನ್ತ್ವಾ ಅಸ್ಸುಪುಣ್ಣೇಹಿ ನೇತ್ತೇಹಿ ಆಳಾರಂ ಓಲೋಕೇಸಿ. ಲುದ್ದಾ ಥೋಕಂ ಗನ್ತ್ವಾ ‘‘ಉರಗೋ ದುಬ್ಬಲೋ, ಮತಕಾಲೇ ಗಹೇತ್ವಾವ ನಂ ಗಮಿಸ್ಸಾಮಾ’’ತಿ ನಿಲೀಯಿಂಸು. ಆಳಾರೋ ಮಹಾಸತ್ತಸ್ಸ ಅಞ್ಜಲಿಂ ಪಗ್ಗಯ್ಹ ‘‘ಗಚ್ಛೇವ ಖೋ ತ್ವಂ, ಮಹಾನಾಗ, ಮಾ ತಂ ಲುದ್ದಾ ಪುನ ಗಹೇಸು’’ನ್ತಿ ವದನ್ತೋ ಥೋಕಂ ತಂ ನಾಗಂ ಅನುಗನ್ತ್ವಾ ನಿವತ್ತಿ.

ಬೋಧಿಸತ್ತೋ ನಾಗಭವನಂ ಗನ್ತ್ವಾ ತತ್ಥ ಪಪಞ್ಚಂ ಅಕತ್ವಾ ಮಹನ್ತೇನ ಪರಿವಾರೇನ ನಿಕ್ಖಮಿತ್ವಾ ಆಳಾರಂ ಉಪಸಙ್ಕಮಿತ್ವಾ ನಾಗಭವನಸ್ಸ ವಣ್ಣಂ ಕಥೇತ್ವಾ ತಂ ತತ್ಥ ನೇತ್ವಾ ತೀಹಿ ಕಞ್ಞಾಸತೇಹಿ ಸದ್ಧಿಂ ಮಹನ್ತಮಸ್ಸ ಯಸಂ ದತ್ವಾ ದಿಬ್ಬೇಹಿ ಕಾಮೇಹಿ ಸನ್ತಪ್ಪೇಸಿ. ಆಳಾರೋ ನಾಗಭವನೇ ಏಕವಸ್ಸಂ ವಸಿತ್ವಾ ದಿಬ್ಬೇ ಕಾಮೇ ಪರಿಭುಞ್ಜಿತ್ವಾ ‘‘ಇಚ್ಛಾಮಹಂ, ಸಮ್ಮ, ಪಬ್ಬಜಿತು’’ನ್ತಿ ನಾಗರಾಜಸ್ಸ ಕಥೇತ್ವಾ ಪಬ್ಬಜಿತಪರಿಕ್ಖಾರೇ ಗಹೇತ್ವಾ ತತೋ ನಿಕ್ಖಮಿತ್ವಾ ಹಿಮವನ್ತಪ್ಪದೇಸಂ ಗನ್ತ್ವಾ ಪಬ್ಬಜಿತ್ವಾ ತತ್ಥ ಚಿರಂ ವಸಿತ್ವಾ ಅಪರಭಾಗೇ ಚಾರಿಕಂ ಚರನ್ತೋ ಬಾರಾಣಸಿಂ ಪತ್ವಾ ಬಾರಾಣಸಿರಞ್ಞಾ ಸಮಾಗತೋ ತೇನ ಆಚಾರಸಮ್ಪತ್ತಿಂ ನಿಸ್ಸಾಯ ಪಸನ್ನೇನ ‘‘ತ್ವಂ ಉಳಾರಭೋಗಾ ಮಞ್ಞೇ ಕುಲಾ ಪಬ್ಬಜಿತೋ, ಕೇನ ನು ಖೋ ಕಾರಣೇನ ಪಬ್ಬಜಿತೋಸೀ’’ತಿ ಪುಟ್ಠೋ ಅತ್ತನೋ ಪಬ್ಬಜ್ಜಾಕಾರಣಂ ಕಥೇನ್ತೋ ಲುದ್ದಾನಂ ಹತ್ಥತೋ ಬೋಧಿಸತ್ತಸ್ಸ ವಿಸ್ಸಜ್ಜಾಪನಂ ಆದಿಂ ಕತ್ವಾ ಸಬ್ಬಂ ಪವತ್ತಿಂ ರಞ್ಞೋ ಆಚಿಕ್ಖಿತ್ವಾ –

‘‘ದಿಟ್ಠಾ ಮಯಾ ಮಾನುಸಕಾಪಿ ಕಾಮಾ, ಅಸಸ್ಸತಾ ವಿಪರಿಣಾಮಧಮ್ಮಾ;

ಆದೀನವಂ ಕಾಮಗುಣೇಸು ದಿಸ್ವಾ, ಸದ್ಧಾಯಹಂ ಪಬ್ಬಜಿತೋಮ್ಹಿ, ರಾಜ.

‘‘ದುಮಪ್ಫಲಾನೀವ ಪತನ್ತಿ ಮಾಣವಾ, ದಹರಾ ಚ ವುದ್ಧಾ ಚ ಸರೀರಭೇದಾ;

ಏತಮ್ಪಿ ದಿಸ್ವಾ ಪಬ್ಬಜಿತೋಮ್ಹಿ ರಾಜ, ಅಪಣ್ಣಕಂ ಸಾಮಞ್ಞಮೇವ ಸೇಯ್ಯೋ’’ತಿ. (ಜಾ. ೨.೧೭.೧೯೧-೧೯೨) –

ಇಮಾಹಿ ಗಾಥಾಹಿ ಧಮ್ಮಂ ದೇಸೇಸಿ.

ತಂ ಸುತ್ವಾ ರಾಜಾ –

‘‘ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ನಾಗಞ್ಚ ಸುತ್ವಾನ ತವಞ್ಚಳಾರ, ಕಾಹಾಮಿ ಪುಞ್ಞಾನಿ ಅನಪ್ಪಕಾನೀ’’ತಿ. (ಜಾ. ೨.೧೭.೧೯೩) –

ಆಹ.

ಅಥಸ್ಸ ತಾಪಸೋ –

‘‘ಅದ್ಧಾ ಹವೇ ಸೇವಿತಬ್ಬಾ ಸಪಞ್ಞಾ, ಬಹುಸ್ಸುತಾ ಯೇ ಬಹುಠಾನಚಿನ್ತಿನೋ;

ನಾಗಞ್ಚ ಸುತ್ವಾನ ಮಮಞ್ಚ ರಾಜ, ಕರೋಹಿ ಪುಞ್ಞಾನಿ ಅನಪ್ಪಕಾನೀ’’ತಿ. (ಜಾ. ೨.೧೭.೧೯೪) –

ಏವಂ ಧಮ್ಮಂ ದೇಸೇತ್ವಾ ತತ್ಥೇವ ಚತ್ತಾರೋ ವಸ್ಸಾನಮಾಸೇ ವಸಿತ್ವಾ ಪುನ ಹಿಮವನ್ತಂ ಗನ್ತ್ವಾ ಯಾವಜೀವಂ ಚತ್ತಾರೋ ಬ್ರಹ್ಮವಿಹಾರೇ ಭಾವೇತ್ವಾ ಬ್ರಹ್ಮಲೋಕೂಪಗೋ ಅಹೋಸಿ. ಬೋಧಿಸತ್ತೋಪಿ ಯಾವಜೀವಂ ಉಪೋಸಥವಾಸಂ ವಸಿತ್ವಾ ಸಗ್ಗಪುರಂ ಪೂರೇಸಿ. ಸೋಪಿ ರಾಜಾ ದಾನಾದೀನಿ ಪುಞ್ಞಾನಿ ಕತ್ವಾ ಯಥಾಕಮ್ಮಂ ಗತೋ.

ತದಾ ಆಳಾರೋ ಸಾರಿಪುತ್ತತ್ಥೇರೋ ಅಹೋಸಿ, ಬಾರಾಣಸಿರಾಜಾ ಆನನ್ದತ್ಥೇರೋ, ಸಙ್ಖಪಾಲನಾಗರಾಜಾ ಲೋಕನಾಥೋ.

ತಸ್ಸ ಸರೀರಪರಿಚ್ಚಾಗೋ ದಾನಪಾರಮೀ, ತಥಾರೂಪೇನಪಿ ವಿಸತೇಜೇನ ಸಮನ್ನಾಗತಸ್ಸ ತಥಾರೂಪಾಯಪಿ ಪೀಳಾಯ ಸತಿ ಸೀಲಸ್ಸ ಅಭಿನ್ನತಾ ಸೀಲಪಾರಮೀ, ದೇವಭೋಗಸಮ್ಪತ್ತಿಸದಿಸಂ ಭೋಗಂ ಪಹಾಯ ನಾಗಭವನತೋ ನಿಕ್ಖಮಿತ್ವಾ ಸಮಣಧಮ್ಮಕರಣಂ ನೇಕ್ಖಮ್ಮಪಾರಮೀ, ‘‘ದಾನಾದಿಅತ್ಥಂ ಇದಞ್ಚಿದಞ್ಚ ಕಾತುಂ ವಟ್ಟತೀ’’ತಿ ಸಂವಿದಹನಂ ಪಞ್ಞಾಪಾರಮೀ, ಕಾಮವಿತಕ್ಕವಿನೋದನಂ ಅಧಿವಾಸನವೀರಿಯಞ್ಚ ವೀರಿಯಪಾರಮೀ, ಅಧಿವಾಸನಖನ್ತಿ ಖನ್ತಿಪಾರಮೀ, ಸಚ್ಚಸಮಾದಾನಂ ಸಚ್ಚಪಾರಮೀ, ಅಚಲಸಮಾದಾನಾಧಿಟ್ಠಾನಂ ಅಧಿಟ್ಠಾನಪಾರಮೀ, ಭೋಜಪುತ್ತೇ ಉಪಾದಾಯ ಸಬ್ಬಸತ್ತೇಸು ಮೇತ್ತಾನುದ್ದಯಭಾವೋ ಮೇತ್ತಾಪಾರಮೀ, ವೇದನಾಯ ಸತ್ತಸಙ್ಖಾರಕತವಿಪ್ಪಕಾರೇಸು ಚ ಮಜ್ಝತ್ತಭಾವೋ ಉಪೇಕ್ಖಾಪಾರಮೀತಿ ಏವಂ ದಸ ಪಾರಮಿಯೋ ಲಬ್ಭನ್ತಿ. ಸೀಲಪಾರಮೀ ಪನ ಅತಿಸಯವತೀತಿ ಕತ್ವಾ ಸಾ ಏವ ದೇಸನಂ ಆರುಳ್ಹಾ. ತಥಾ ಇಧ ಬೋಧಿಸತ್ತಸ್ಸ ಗುಣಾನುಭಾವಾ ‘‘ಯೋಜನಸತಿಕೇ ನಾಗಭವನಟ್ಠಾನೇ’’ತಿಆದಿನಾ ಭೂರಿದತ್ತಚರಿಯಾಯಂ (ಚರಿಯಾ. ೨.೧೧ ಆದಯೋ) ವುತ್ತನಯೇನೇವ ಯಥಾರಹಂ ವಿಭಾವೇತಬ್ಬಾತಿ.

ಸಙ್ಖಪಾಲಚರಿಯಾವಣ್ಣನಾ ನಿಟ್ಠಿತಾ.

ಏತೇತಿ ಯೇ ಹತ್ಥಿನಾಗಚರಿಯಾದಯೋ ಇಮಸ್ಮಿಂ ವಗ್ಗೇ ನಿದ್ದಿಟ್ಠಾ ಅನನ್ತರಗಾಥಾಯ ಚ ‘‘ಹತ್ಥಿನಾಗೋ ಭೂರಿದತ್ತೋ’’ತಿಆದಿನಾ ಉದ್ದಾನವಸೇನ ಸಙ್ಗಹೇತ್ವಾ ದಸ್ಸಿತಾ ನವ ಚರಿಯಾ, ತೇ ಸಬ್ಬೇ ವಿಸೇಸತೋ ಸೀಲಪಾರಮಿಪೂರಣವಸೇನ ಪವತ್ತಿಯಾ ಸೀಲಂ ಬಲಂ ಏತೇಸನ್ತಿ ಸೀಲಬಲಾ. ಸೀಲಸ್ಸ ಪರಮತ್ಥಪಾರಮಿಭೂತಸ್ಸ ಪರಿಕ್ಖರಣತೋ ಸನ್ತಾನಸ್ಸ ಚ ಪರಿಭಾವನಾವಸೇನ ಅಭಿಸಙ್ಖರಣತೋ ಪರಿಕ್ಖಾರಾ. ಉಕ್ಕಂಸಗತಾಯ ಸೀಲಪರಮತ್ಥಪಾರಮಿಯಾ ಅಸಮ್ಪುಣ್ಣತ್ತಾ ಪದೇಸೋ ಏತೇಸಂ ಅತ್ಥಿ, ನ ನಿಪ್ಪದೇಸೋತಿ ಪದೇಸಿಕಾ ಸಪ್ಪದೇಸಾ. ಕಸ್ಮಾತಿ ಚೇ? ಆಹ ‘‘ಜೀವಿತಂ ಪರಿರಕ್ಖಿತ್ವಾ, ಸೀಲಾನಿ ಅನುರಕ್ಖಿಸ’’ನ್ತಿ, ಯಸ್ಮಾ ಏತೇಸು ಹತ್ಥಿನಾಗಚರಿಯಾದೀಸು (ಚರಿಯಾ. ೨.೧ ಆದಯೋ) ಅಹಂ ಅತ್ತನೋ ಜೀವಿತಂ ಏಕದೇಸೇನ ಪರಿರಕ್ಖಿತ್ವಾವ ಸೀಲಾನಿ ಅನುರಕ್ಖಿಂ, ಜೀವಿತಂ ನ ಸಬ್ಬಥಾ ಪರಿಚ್ಚಜಿಂ, ಏಕನ್ತೇನೇವ ಪನ ಸಙ್ಖಪಾಲಸ್ಸ ಮೇ ಸತೋ ಸಬ್ಬಕಾಲಮ್ಪಿ ಜೀವಿತಂ ಯಸ್ಸ ಕಸ್ಸಚಿ ನಿಯ್ಯತ್ತಂ, ಸಙ್ಖಪಾಲನಾಗರಾಜಸ್ಸ ಪನ ಮೇ ಮಹಾನುಭಾವಸ್ಸ ಉಗ್ಗವಿಸತೇಜಸ್ಸ ಸತೋ ಸಮಾನಸ್ಸ ಸಬ್ಬಕಾಲಮ್ಪಿ ತೇಹಿ ಲುದ್ದೇಹಿ ಸಮಾಗಮೇ ತತೋ ಪುಬ್ಬೇಪಿ ಪಚ್ಛಾಪಿ ಸತೋ ಏವಂ ಪುಗ್ಗಲವಿಭಾಗಂ ಅಕತ್ವಾ ಯಸ್ಸ ಕಸ್ಸಚಿ ಸೀಲಾನುರಕ್ಖಣತ್ಥಮೇವ ಜೀವಿತಂ ಏಕಂಸೇನೇವ ನಿಯ್ಯತ್ತಂ ನೀಯಾತಿತಂ ದಾನಮುಖೇ ನಿಸ್ಸಟ್ಠಂ, ತಸ್ಮಾ ಸಾ ಸೀಲಪಾರಮೀತಿ ಯಸ್ಮಾ ಚೇತದೇವಂ, ತಸ್ಮಾ ತೇನ ಕಾರಣೇನ ಸಾ ಪರಮತ್ಥಪಾರಮಿಭಾವಂ ಪತ್ತಾ ಮಯ್ಹಂ ಸೀಲಪಾರಮೀತಿ ದಸ್ಸೇತೀತಿ.

ಪರಮತ್ಥದೀಪನಿಯಾ ಚರಿಯಾಪಿಟಕಸಂವಣ್ಣನಾಯ

ದಸವಿಧಚರಿಯಾಸಙ್ಗಹಸ್ಸ ವಿಸೇಸತೋ

ಸೀಲಪಾರಮಿವಿಭಾವನಸ್ಸ

ದುತಿಯವಗ್ಗಸ್ಸ ಅತ್ಥವಣ್ಣನಾ ನಿಟ್ಠಿತಾ.