೮. ನಿಸ್ಸಯಪಚ್ಚಯನಿದ್ದೇಸವಣ್ಣನಾ

೮. ನಿಸ್ಸಯಪಚ್ಚಯನಿದ್ದೇಸೇ ಸಹಜಾತಪಚ್ಚಯನಿದ್ದೇಸಸ್ಸ ಪುರಿಮಾನಂ ಪಞ್ಚನ್ನಂ ಕೋಟ್ಠಾಸಾನಂ ವಸೇನ ಸಹಜಾತನಿಸ್ಸಯನಯಂ ದಸ್ಸೇತ್ವಾ ಪುನ ಛಟ್ಠೇನ ಕೋಟ್ಠಾಸೇನ ಪುರೇಜಾತನಿಸ್ಸಯನಯಂ ದಸ್ಸೇತುಂ ಚಕ್ಖಾಯತನಂ ಚಕ್ಖುವಿಞ್ಞಾಣಧಾತುಯಾತಿಆದಿ ಆರದ್ಧಂ. ತತ್ಥ ಯಂ ರೂಪಂ ನಿಸ್ಸಾಯಾತಿ ವತ್ಥುರೂಪಂ ಸನ್ಧಾಯ ವುತ್ತಂ. ತಞ್ಹಿ ನಿಸ್ಸಾಯ ತಿವಿಧಾ ಮನೋಧಾತು, ಠಪೇತ್ವಾ ಅರೂಪವಿಪಾಕಂ ದ್ವಾಸತ್ತತಿವಿಧಾ ಮನೋವಿಞ್ಞಾಣಧಾತೂತಿ ಇಮಾನಿ ಪಞ್ಚಸತ್ತತಿ ಚಿತ್ತಾನಿ ವತ್ತನ್ತೀತಿ ಅಯಂ ತಾವೇತ್ಥ ಪಾಳಿವಣ್ಣನಾ. ಅಯಮ್ಪಿ ನಿಸ್ಸಯಪಚ್ಚಯೋ ಜಾತಿವಸೇನ ಕುಸಲಾದಿಭೇದತೋ ಪಞ್ಚಧಾವ ಭಿಜ್ಜತಿ. ತತ್ಥ ಕುಸಲೋ ಭೂಮಿತೋ ಚತುಬ್ಬಿಧೋವ ಅಕುಸಲೋ ಏಕವಿಧೋ ವಿಪಾಕೋ ಚತುಬ್ಬಿಧೋ, ಕಿರಿಯಸಙ್ಖಾತೋ ತಿವಿಧೋ, ರೂಪಂ ಏಕವಿಧಮೇವಾತಿ ಏವಮೇತ್ಥ ನಾನಪ್ಪಕಾರಭೇದತೋ ವಿಞ್ಞಾತಬ್ಬೋ ವಿನಿಚ್ಛಯೋ.

ಏವಂ ಭಿನ್ನೇ ಪನೇತ್ಥ ಚತುಭೂಮಕಮ್ಪಿ ಕುಸಲಂ ಪಞ್ಚವೋಕಾರೇ ಸಮ್ಪಯುತ್ತಕ್ಖನ್ಧಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ ನಿಸ್ಸಯಪಚ್ಚಯೇನ ಪಚ್ಚಯೋ ಹೋತಿ. ತಥಾ ಅಕುಸಲಂ. ಯಂ ಪನೇತ್ಥ ಆರುಪ್ಪೇ ಉಪ್ಪಜ್ಜತಿ, ತಂ ಅರೂಪಧಮ್ಮಾನಞ್ಞೇವ ನಿಸ್ಸಯಪಚ್ಚಯೋ ಹೋತಿ. ಕಾಮಾವಚರರೂಪಾವಚರವಿಪಾಕಂ ಪವತ್ತೇ ಸಮ್ಪಯುತ್ತಧಮ್ಮಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ, ಪಟಿಸನ್ಧಿಯಂ ಕಟತ್ತಾರೂಪಸ್ಸಾಪಿ ನಿಸ್ಸಯಪಚ್ಚಯೋ ಹೋತಿ. ಅರೂಪಾವಚರವಿಪಾಕಂ ಸಮ್ಪಯುತ್ತಕ್ಖನ್ಧಾನಂಯೇವ ಹೋತಿ. ಲೋಕುತ್ತರವಿಪಾಕಂ ಪಞ್ಚವೋಕಾರೇ; ಸಮ್ಪಯುತ್ತಕಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ, ಚತುವೋಕಾರೇ ಅರೂಪಸ್ಸೇವ ನಿಸ್ಸಯಪಚ್ಚಯೋ ಹೋತಿ. ಕಾಮಾವಚರಅರೂಪಾವಚರಕಿರಿಯಾ ಪಞ್ಚವೋಕಾರೇ ಸಮ್ಪಯುತ್ತಕಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ ನಿಸ್ಸಯಪಚ್ಚಯೋ ಹೋತಿ, ಚತುವೋಕಾರೇ ಅರೂಪಾನಞ್ಞೇವ. ರೂಪಾವಚರಕಿರಿಯಾ ಸಮ್ಪಯುತ್ತಕಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ ಏಕನ್ತೇನ ನಿಸ್ಸಯಪಚ್ಚಯೋ ಹೋತಿ.

ಚತುಸಮುಟ್ಠಾನಿಕರೂಪಸ್ಸ ಚ ಕಮ್ಮಸಮುಟ್ಠಾನರೂಪೇ ಏಕಂ ಮಹಾಭೂತಂ ತಿಣ್ಣಂ, ತೀಣಿ ಏಕಸ್ಸ, ದ್ವೇ ದ್ವಿನ್ನಂ ಮಹಾಭೂತಾನಂ, ಮಹಾಭೂತಾ ಉಪಾದಾರೂಪಾನಂ, ವತ್ಥುರೂಪಂ ಪಞ್ಚವೋಕಾರಭವೇ ಚತುಭೂಮಕಕುಸಲಸ್ಸ, ಅಕುಸಲಸ್ಸ, ಠಪೇತ್ವಾ ಆರುಪ್ಪವಿಪಾಕಞ್ಚೇವ ದ್ವೇ ಪಞ್ಚವಿಞ್ಞಾಣಾನಿ ಚ ಸೇಸತೇಭೂಮಕವಿಪಾಕಸ್ಸ, ತೇಭೂಮಕಕಿರಿಯಸ್ಸಾತಿ ಇಮೇಸಂ ಚತುನ್ನಂ ಧಮ್ಮರಾಸೀನಂ ನಿಸ್ಸಯಪಚ್ಚಯೋ ಹೋತಿ. ಚಕ್ಖಾಯತನಾದೀನಿ ಪಞ್ಚ ಸಸಮ್ಪಯುತ್ತಾನಂ ಚಕ್ಖುವಿಞ್ಞಾಣಾದೀನಂ ನಿಸ್ಸಯಪಚ್ಚಯೋ ಹೋತಿ. ಉತುಚಿತ್ತಾಹಾರಸಮುಟ್ಠಾನೇಸು ಪನ ಮಹಾಭೂತಾ ಮಹಾಭೂತಾನಞ್ಚೇವ ಉಪಾದಾರೂಪಸ್ಸ ಚ ನಿಸ್ಸಯಪಚ್ಚಯೇನ ಪಚ್ಚಯೋತಿ ಏವಮೇತ್ಥ ಪಚ್ಚಯುಪ್ಪನ್ನತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋತಿ.

ನಿಸ್ಸಯಪಚ್ಚಯನಿದ್ದೇಸವಣ್ಣನಾ.