೧೭. ಝಾನಪಚ್ಚಯನಿದ್ದೇಸವಣ್ಣನಾ

೧೭. ಝಾನಪಚ್ಚಯನಿದ್ದೇಸೇ ಝಾನಙ್ಗಾನೀತಿ ದ್ವಿಪಞ್ಚವಿಞ್ಞಾಣವಜ್ಜೇಸು ಸೇಸಚಿತ್ತೇಸು ಉಪ್ಪನ್ನಾನಿ ವಿತಕ್ಕವಿಚಾರಪೀತಿಸೋಮನಸ್ಸದೋಮನಸ್ಸುಪೇಕ್ಖಾಚಿತ್ತೇಕಗ್ಗತಾಸಙ್ಖಾತಾನಿ ಸತ್ತ ಅಙ್ಗಾನಿ. ಪಞ್ಚನ್ನಂ ಪನ ವಿಞ್ಞಾಣಕಾಯಾನಂ ಅಭಿನಿಪಾತಮತ್ತತ್ತಾ ತೇಸು ವಿಜ್ಜಮಾನಾನಿಪಿ ಉಪೇಕ್ಖಾಸುಖದುಕ್ಖಾನಿ ಉಪನಿಜ್ಝಾನಾಕಾರಸ್ಸ ಅಭಾವತೋ ಝಾನಙ್ಗಾನೀತಿ ನ ಉದ್ಧಟಾನಿ. ತತ್ಥ ಪಚ್ಛಿನ್ನತ್ತಾ ಪನ ಸೇಸಾಹೇತುಕೇಸುಪಿ ಝಾನಙ್ಗಂ ನ ಉದ್ಧಟಮೇವ. ತಂಸಮುಟ್ಠಾನಾನನ್ತಿ ಇಧಾಪಿ ಕಟತ್ತಾರೂಪಂ ಸಙ್ಗಹಿತನ್ತಿ ವೇದಿತಬ್ಬಂ. ವುತ್ತಞ್ಹೇತಂ ಪಞ್ಹಾವಾರೇ – ‘‘ಪಟಿಸನ್ಧಿಕ್ಖಣೇ ವಿಪಾಕಾಬ್ಯಾಕತಾನಿ ಝಾನಙ್ಗಾನಿ ಸಮ್ಪಯುತ್ತಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಝಾನಪಚ್ಚಯೇನ ಪಚ್ಚಯೋ’’ತಿ. ಅಯಂ ತಾವೇತ್ಥ ಪಾಳಿವಣ್ಣನಾ. ಅಯಂ ಪನ ಝಾನಪಚ್ಚಯೋ ಸತ್ತನ್ನಂ ಝಾನಙ್ಗಾನಂ ವಸೇನ ಠಿತೋಪಿ ಜಾತಿಭೇದತೋ ಕುಸಲಾಕುಸಲವಿಪಾಕಕಿರಿಯವಸೇನ ಚತುಧಾ ಭಿಜ್ಜತಿ, ಪುನ ಭೂಮಿವಸೇನ ಚತುಧಾ; ಏಕಧಾ, ಚತುಧಾ, ತಿಧಾತಿ ದ್ವಾದಸಧಾ ಭಿಜ್ಜತೀತಿ ಏವಮೇತ್ಥ ನಾನಪ್ಪಕಾರಭೇದತೋ ವಿಞ್ಞಾತಬ್ಬೋ ವಿನಿಚ್ಛಯೋ.

ಏವಂ ಭಿನ್ನೇ ಪನೇತ್ಥ ಚತುಭೂಮಕಮ್ಪಿ ಕುಸಲಝಾನಙ್ಗಂ ಪಞ್ಚವೋಕಾರೇ ಸಮ್ಪಯುತ್ತಧಮ್ಮಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ, ಠಪೇತ್ವಾ ರೂಪಾವಚರಂ ಅವಸೇಸಂ ಆರುಪ್ಪೇ ಸಮ್ಪಯುತ್ತಧಮ್ಮಾನಞ್ಞೇವ ಝಾನಪಚ್ಚಯೇನ ಪಚ್ಚಯೋ. ಅಕುಸಲೇಪಿ ಏಸೇವ ನಯೋ. ಕಾಮಾವಚರರೂಪಾವಚರವಿಪಾಕಂ ಪವತ್ತೇ ಸಮ್ಪಯುತ್ತಧಮ್ಮಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ, ಪಟಿಸನ್ಧಿಯಂ ಸಮ್ಪಯುತ್ತಧಮ್ಮಾನಞ್ಚೇವ ಕಟತ್ತಾರೂಪಸ್ಸ ಚ, ಆರುಪ್ಪವಿಪಾಕಂ ಸಮ್ಪಯುತ್ತಧಮ್ಮಾನಞ್ಞೇವ, ಯಞ್ಚ ಆರುಪ್ಪೇ ಲೋಕುತ್ತರವಿಪಾಕಂ ಉಪ್ಪಜ್ಜತಿ, ತಞ್ಚ. ಪಞ್ಚವೋಕಾರೇ ಪನ ತಂ ಚಿತ್ತಸಮುಟ್ಠಾನರೂಪಸ್ಸಪಿ ಝಾನಪಚ್ಚಯೇನ ಪಚ್ಚಯೋ ಹೋತಿ. ತೇಭೂಮಕಮ್ಪಿ ಕಿರಿಯಝಾನಙ್ಗಂ ಪಞ್ಚವೋಕಾರೇ ಸಮ್ಪಯುತ್ತಧಮ್ಮಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ. ಯಂ ಪನೇತ್ಥ ಆರುಪ್ಪೇ ಉಪ್ಪಜ್ಜತಿ, ತಂ ಸಮ್ಪಯುತ್ತಧಮ್ಮಾನಞ್ಞೇವ ಝಾನಪಚ್ಚಯೇನ ಪಚ್ಚಯೋತಿ ಏವಮೇತ್ಥ ಪಚ್ಚಯುಪ್ಪನ್ನತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋತಿ.

ಝಾನಪಚ್ಚಯನಿದ್ದೇಸವಣ್ಣನಾ.