೧೮. ಮಗ್ಗಪಚ್ಚಯನಿದ್ದೇಸವಣ್ಣನಾ

೧೮. ಮಗ್ಗಪಚ್ಚಯನಿದ್ದೇಸೇ ಮಗ್ಗಙ್ಗಾನೀತಿ ಅಹೇತುಕಚಿತ್ತುಪ್ಪಾದವಜ್ಜೇಸು ಸೇಸಚಿತ್ತೇಸು ಉಪ್ಪನ್ನಾನಿ ಪಞ್ಞಾ, ವಿತಕ್ಕೋ, ಸಮ್ಮಾವಾಚಾಕಮ್ಮನ್ತಾಜೀವಾ, ವೀರಿಯಂ, ಸತಿ, ಸಮಾಧಿ, ಮಿಚ್ಛಾದಿಟ್ಠಿ, ಮಿಚ್ಛಾವಾಚಾಕಮ್ಮನ್ತಾಜೀವಾತಿ ಇಮಾನಿ ದ್ವಾದಸಙ್ಗಾನಿ. ಮಗ್ಗಸ್ಸ ಪನ ಹೇತುಪಚ್ಛಿಮಕತ್ತಾ ಅಹೇತುಕಚಿತ್ತೇಸು ಮಗ್ಗಙ್ಗಾನಿ ನ ಉದ್ಧಟಾನಿ. ತಂಸಮುಟ್ಠಾನಾನನ್ತಿ ಇಧಾಪಿ ಕಟತ್ತಾರೂಪಂ ಸಙ್ಗಹಿತಮೇವ. ವುತ್ತಞ್ಹೇತಂ ಪಞ್ಹಾವಾರೇ – ‘‘ಪಟಿಸನ್ಧಿಕ್ಖಣೇ ವಿಪಾಕಾಬ್ಯಾಕತಾನಿ ಮಗ್ಗಙ್ಗಾನಿ ಸಮ್ಪಯುತ್ತಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಮಗ್ಗಪಚ್ಚಯೇನ ಪಚ್ಚಯೋ’’ತಿ. ಅಯಂ ತಾವೇತ್ಥ ಪಾಳಿವಣ್ಣನಾ.

ಅಯಂ ಪನ ಮಗ್ಗಪಚ್ಚಯೋ ದ್ವಾದಸನ್ನಂ ಮಗ್ಗಙ್ಗಾನಂ ವಸೇನ ಠಿತೋಪಿ ಜಾತಿಭೇದತೋ ಕುಸಲಾದಿವಸೇನ ಚತುಧಾ, ಕುಸಲಾದೀನಞ್ಚ ಕಾಮಾವಚರಾದಿಭೂಮಿಭೇದತೋ ದ್ವಾದಸಧಾ ಭಿಜ್ಜತೀತಿ ಏವಮೇತ್ಥ ನಾನಪ್ಪಕಾರಭೇದತೋ ವಿಞ್ಞಾತಬ್ಬೋ ವಿನಿಚ್ಛಯೋ. ಏವಂ ಭಿನ್ನೇ ಪನೇತ್ಥ ಚತುಭೂಮಕಮ್ಪಿ ಕುಸಲಮಗ್ಗಙ್ಗಂ ಪಞ್ಚವೋಕಾರೇ ಸಮ್ಪಯುತ್ತಧಮ್ಮಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ, ಠಪೇತ್ವಾ ರೂಪಾವಚರಂ ಅವಸೇಸಂ ಆರುಪ್ಪೇ ಸಮ್ಪಯುತ್ತಧಮ್ಮಾನಞ್ಞೇವ ಮಗ್ಗಪಚ್ಚಯೇನ ಪಚ್ಚಯೋತಿ ಸಬ್ಬಂ ಝಾನಪಚ್ಚಯೇ ವಿಯ ವಿತ್ಥಾರೇತಬ್ಬನ್ತಿ ಏವಮೇತ್ಥ ಪಚ್ಚಯುಪ್ಪನ್ನತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋತಿ.

ಮಗ್ಗಪಚ್ಚಯನಿದ್ದೇಸವಣ್ಣನಾ.