೧. ಸಾಸನಕಥಾವಣ್ಣನಾ

೮೭೮. ಇದಾನಿ ಸಾಸನಕಥಾ ನಾಮ ಹೋತಿ. ತತ್ಥ ತಿಸ್ಸೋ ಸಙ್ಗೀತಿಯೋ ಸನ್ಧಾಯ ‘‘ಸಾಸನಂ ನವಂ ಕತ’’ನ್ತಿ ಚ ‘‘ಅತ್ಥಿ ಕೋಚಿ ತಥಾಗತಸ್ಸ ಸಾಸನಂ ನವಂ ಕರೋತೀ’’ತಿ ಚ ‘‘ಲಬ್ಭಾ ತಥಾಗತಸ್ಸ ಸಾಸನಂ ನವಂ ಕಾತು’’ನ್ತಿ ಚ ಯೇಸಂ ಲದ್ಧಿ, ಸೇಯ್ಯಥಾಪಿ ಏಕಚ್ಚಾನಂ ಉತ್ತರಾಪಥಕಾನಂ; ತೇ ಸನ್ಧಾಯ ತೀಸುಪಿ ಕಥಾಸು ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಸತಿಪಟ್ಠಾನಾತಿಆದಿ ಸಾಸನಂ ನಾಮ ಸತಿಪಟ್ಠಾನಾದಯೋ ಚೇವ ಅರಿಯಧಮ್ಮಾ, ಕುಸಲಾದೀನಞ್ಚ ದೇಸನಾ. ತತ್ಥ ಯೇಸಂ ಭಗವತಾ ದೇಸಿತಾ ಸತಿಪಟ್ಠಾನಾದಯೋ, ಠಪೇತ್ವಾ ತೇ ಅಞ್ಞೇಸಂ ವಾ ಸತಿಪಟ್ಠಾನಾದೀನಂ ಕರಣೇನ ಅಕುಸಲಾದೀನಂ ವಾ ಕುಸಲಾದಿಭಾವಕರಣೇನ ಸಾಸನಂ ನವಂಕತಂ ನಾಮ ಭವೇಯ್ಯ, ಕಿಂ ತಂ ಏವಂ ಕತಂ ಕೇನಚಿ, ಅತ್ಥಿ ವಾ ಕೋಚಿ ಏವಂ ಕರೋತಿ, ಲಬ್ಭಾ ವಾ ಏವಂ ಕಾತುನ್ತಿ ತೀಸುಪಿ ಪುಚ್ಛಾಸು ಚೋದನತ್ಥಂ ವುತ್ತಂ. ಸೇಸಂ ಸಬ್ಬತ್ಥ ಯಥಾಪಾಳಿಮೇವ ನಿಯ್ಯಾತೀತಿ.

ಸಾಸನಕಥಾವಣ್ಣನಾ.