೫. ಠಪೇತ್ವಾ ಅರಿಯಮಗ್ಗನ್ತಿಕಥಾವಣ್ಣನಾ

೭೮೯-೭೯೦. ಇದಾನಿ ಠಪೇತ್ವಾ ಅರಿಯಮಗ್ಗನ್ತಿಕಥಾ ನಾಮ ಹೋತಿ. ತತ್ಥ ‘‘ಯಸ್ಮಾ ಅರಿಯಮಗ್ಗೋ ‘ದುಕ್ಖನಿರೋಧಗಾಮಿನಿಪಟಿಪದಾ’ತಿ ವುತ್ತೋ, ತಸ್ಮಾ ಠಪೇತ್ವಾ ಅರಿಯಮಗ್ಗಂ ಅವಸೇಸಾ ಸಙ್ಖಾರಾ ದುಕ್ಖಾ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಹೇತುವಾದಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ಏವಂ ಸಮುದಯಸ್ಸಾಪಿ ದುಕ್ಖಭಾವೋ ಆಪಜ್ಜತೀ’’ತಿ ಚೋದೇತುಂ ದುಕ್ಖಸಮುದಯೋಪೀತಿ ಆಹ. ಇತರೋ ಹೇತುಲಕ್ಖಣಂ ಸನ್ಧಾಯ ಪಟಿಕ್ಖಿಪತಿ. ಪುನ ಪುಟ್ಠೋ ಪವತ್ತಪರಿಯಾಪನ್ನಭಾವಂ ಸನ್ಧಾಯ ಪಟಿಜಾನಾತಿ. ತೀಣೇವಾತಿ ಪಞ್ಹೇಸು ಸುತ್ತವಿರೋಧಭಯೇನ ಪಟಿಕ್ಖಿಪತಿ, ಲದ್ಧಿವಸೇನ ಪಟಿಜಾನಾತಿ. ಸೇಸಮೇತ್ಥ ಉತ್ತಾನತ್ಥಮೇವಾತಿ.

ಠಪೇತ್ವಾ ಅರಿಯಮಗ್ಗನ್ತಿಕಥಾವಣ್ಣನಾ.