೬. ನ ವತ್ತಬ್ಬಂ ಸಙ್ಘೋ ದಕ್ಖಿಣಂ ಪಟಿಗ್ಗಣ್ಹಾತೀತಿಕಥಾವಣ್ಣನಾ

೭೯೧-೭೯೨. ಇದಾನಿ ನ ವತ್ತಬ್ಬಂ ಸಙ್ಘೋ ದಕ್ಖಿಣಂ ಪಟಿಗ್ಗಣ್ಹಾತೀತಿಕಥಾ ನಾಮ ಹೋತಿ. ತತ್ಥ ‘‘ಪರಮತ್ಥತೋ ಮಗ್ಗಫಲಾನೇವ ಸಙ್ಘೋ, ಮಗ್ಗಫಲೇಹಿ ಅಞ್ಞೋ ಸಙ್ಘೋ ನಾಮ ನತ್ಥಿ, ಮಗ್ಗಫಲಾನಿ ಚ ನ ಕಿಞ್ಚಿ ಪಟಿಗ್ಗಣ್ಹನ್ತಿ, ತಸ್ಮಾ ನ ವತ್ತಬ್ಬಂ ಸಙ್ಘೋ ದಕ್ಖಿಣಂ ಪಟಿಗ್ಗಣ್ಹಾತೀ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಏತರಹಿ ಮಹಾಪುಞ್ಞವಾದೀಸಙ್ಖಾತಾನಂ ವೇತುಲ್ಲಕಾನಂ; ತೇ ಸನ್ಧಾಯ ನ ವತ್ತಬ್ಬನ್ತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ಸಙ್ಘೋ ನ ಪಟಿಗ್ಗಣ್ಹೇಯ್ಯ, ನ ನಂ ಸತ್ಥಾ ಆಹುನೇಯ್ಯಾತಿಆದೀಹಿ ಥೋಮೇಯ್ಯಾ’’ತಿ ಚೋದೇತುಂ ನನು ಸಙ್ಘೋ ಆಹುನೇಯ್ಯೋತಿಆದಿಮಾಹ. ಸಙ್ಘಸ್ಸ ದಾನಂ ದೇನ್ತೀತಿ ‘‘ಯೇ ತೇ ಸಙ್ಘಸ್ಸ ದೇನ್ತಿ, ತೇ ಪಟಿಗ್ಗಾಹಕೇಸು ಅಸತಿ ಕಸ್ಸ ದದೇಯ್ಯು’’ನ್ತಿ ಚೋದನತ್ಥಂ ವುತ್ತಂ. ಆಹುತಿಂ ಜಾತವೇದೋ ವಾತಿ ಸುತ್ತಂ ಪರಸಮಯತೋ ಆಗತಂ. ತತ್ಥ ಮಹಾಮೇಘನ್ತಿ ಮೇಘವುಟ್ಠಿಂ ಸನ್ಧಾಯ ವುತ್ತಂ. ವುಟ್ಠಿಞ್ಹಿ ಮೇದನೀ ಪಟಿಗ್ಗಣ್ಹಾತಿ, ನ ಮೇಘಮೇವ. ಮಗ್ಗೋ ಪಟಿಗ್ಗಣ್ಹಾತೀತಿ ‘‘ಮಗ್ಗಫಲಾನಿ ಸಙ್ಘೋ’’ತಿ ಲದ್ಧಿಯಾ ವದತಿ, ನ ಚ ಮಗ್ಗಫಲಾನೇವ ಸಙ್ಘೋ. ಮಗ್ಗಫಲಪಾತುಭಾವಪರಿಸುದ್ಧೇ ಪನ ಖನ್ಧೇ ಉಪಾದಾಯ ಪಞ್ಞತ್ತಾ ಅಟ್ಠ ಪುಗ್ಗಲಾ ಸಙ್ಘೋ, ತಸ್ಮಾ ಅಸಾಧಕಮೇತನ್ತಿ.

ನ ವತ್ತಬ್ಬಂ ಸಙ್ಘೋ ದಕ್ಖಿಣಂ ಪಟಿಗ್ಗಣ್ಹಾತೀತಿಕಥಾವಣ್ಣನಾ.