೪. ಞಾಣಕಥಾವಣ್ಣನಾ

೬೧೪-೬೧೫. ಇದಾನಿ ಞಾಣಕಥಾ ನಾಮ ಹೋತಿ. ತತ್ಥ ಮಗ್ಗಞಾಣೇನ ಅಞ್ಞಾಣೇ ವಿಗತೇಪಿ ಪುನ ಚಕ್ಖುವಿಞ್ಞಾಣಾದಿವಸೇನ ಞಾಣವಿಪ್ಪಯುತ್ತಚಿತ್ತೇ ವತ್ತಮಾನೇ ಯಸ್ಮಾ ತಂ ಮಗ್ಗಚಿತ್ತಂ ನ ಪವತ್ತತಿ, ತಸ್ಮಾ ‘‘ನ ವತ್ತಬ್ಬಂ ಞಾಣೀ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಮಹಾಸಂಘಿಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ಅಞ್ಞಾಣೇ ವಿಗತೇ ‘ಞಾಣೀ’ತಿ ಪಞ್ಞತ್ತಿ ನ ಸಿಯಾ, ರಾಗಾದೀಸು ವಿಗತೇಸು ವೀತರಾಗಾದಿಪಞ್ಞತ್ತಿಪಿ ನ ಸಿಯಾತಿ ಪುಗ್ಗಲಪಞ್ಞತ್ತಿಯಂ ಅಕೋವಿದೋಸೀ’’ತಿ ಚೋದೇತುಂ ರಾಗೇ ವಿಗತೇತಿಆದಿಮಾಹ. ಇತರೋ ತೇಸು ವಿಗತೇಸು ಸರಾಗಾದಿಭಾವೇ ಯುತ್ತಿಂ ಅಪಸ್ಸನ್ತೋ ಪಟಿಕ್ಖಿಪತಿ. ಪರಿಯೋಸಾನೇ ಯಸ್ಮಾ ಞಾಣಪಟಿಲಾಭೇನ ಸೋ ಞಾಣೀತಿ ವತ್ತಬ್ಬತಂ ಅರಹತಿ, ತಸ್ಮಾ ನ ಹೇವನ್ತಿ ಪಟಿಕ್ಖೇಪೋ ಸಕವಾದಿಸ್ಸಾತಿ.

ಞಾಣಕಥಾವಣ್ಣನಾ.