೫. ಞಾಣಂ ಚಿತ್ತವಿಪ್ಪಯುತ್ತನ್ತಿಕಥಾವಣ್ಣನಾ

೬೧೬-೬೧೭. ಇದಾನಿ ಞಾಣಂ ಚಿತ್ತವಿಪ್ಪಯುತ್ತನ್ತಿಕಥಾ ನಾಮ ಹೋತಿ. ತತ್ಥ ಯಸ್ಮಾ ಅರಹಾ ಚಕ್ಖುವಿಞ್ಞಾಣಾದಿಸಮಙ್ಗೀ ಪಟಿಲದ್ಧಂ ಮಗ್ಗಞಾಣಂ ಸನ್ಧಾಯ ‘‘ಞಾಣೀ’’ತಿ ವುಚ್ಚತಿ, ನ ಚಸ್ಸ ತಂ ತೇನ ಚಿತ್ತೇನ ಸಮ್ಪಯುತ್ತಂ, ತಸ್ಮಾ ‘‘ಞಾಣಂ ಚಿತ್ತವಿಪ್ಪಯುತ್ತ’’ನ್ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಪುಬ್ಬಸೇಲಿಯಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಅಥ ನಂ ‘‘ಯದಿ ತೇ ಞಾಣಂ ಚಿತ್ತವಿಪ್ಪಯುತ್ತಂ ಚಿತ್ತವಿಪ್ಪಯುತ್ತೇಸು ರೂಪಾದೀಸು ಅಞ್ಞತರಂ ಸಿಯಾ’’ತಿ ಚೋದೇತುಂ ರೂಪನ್ತಿಆದಿಮಾಹ. ಇತರೋ ಪಟಿಕ್ಖಿಪತಿ. ಸೇಸಂ ಹೇಟ್ಠಾ ವುತ್ತನಯಮೇವ. ಪರಿಯೋಸಾನೇ ಪನ ಪಞ್ಞವಾತಿ ಪುಟ್ಠೋ ಪಟಿಲಾಭವಸೇನ ತಂ ಪವತ್ತಿಂ ಇಚ್ಛತಿ, ತಸ್ಮಾ ಪಟಿಜಾನಾತೀತಿ.

ಞಾಣಂ ಚಿತ್ತವಿಪ್ಪಯುತ್ತನ್ತಿಕಥಾವಣ್ಣನಾ.