೨. ಸಮ್ಪಯುತ್ತಕಥಾವಣ್ಣನಾ

೪೭೩-೪೭೪. ಇದಾನಿ ಸಮ್ಪಯುತ್ತಕಥಾ ನಾಮ ಹೋತಿ. ತತ್ಥ ಯಸ್ಮಾ ತಿಲಮ್ಹಿ ತೇಲಂ ವಿಯ ನ ವೇದನಾದಯೋ ಸಞ್ಞಾದೀಸು ಅನುಪವಿಟ್ಠಾ, ತಸ್ಮಾ ‘‘ನತ್ಥಿ ಕೇಚಿ ಧಮ್ಮಾ ಕೇಹಿಚಿ ಧಮ್ಮೇಹಿ ಸಮ್ಪಯುತ್ತಾ, ಏವಂ ಸನ್ತೇ ಞಾಣಸಮ್ಪಯುತ್ತನ್ತಿಆದಿ ನಿರತ್ಥಕಂ ಹೋತೀ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ರಾಜಗಿರಿಕಸಿದ್ಧತ್ಥಿಕಾನಞ್ಞೇವ; ತೇ ಸನ್ಧಾಯ ಅಞ್ಞೇನೇವತ್ಥೇನ ಸಮ್ಪಯುತ್ತತಂ ದಸ್ಸೇತುಂ ಪುಚ್ಛಾ ಸಕವಾದಿಸ್ಸ, ಅತ್ತನೋ ಲದ್ಧಿವಸೇನ ಪಟಿಞ್ಞಾ ಇತರಸ್ಸ. ಸೇಸಮಿಧಾಪಿ ಹೇಟ್ಠಾ ವುತ್ತನಯತ್ತಾ ಉತ್ತಾನತ್ಥಮೇವ. ಯೋ ಪನೇಸ ಪರವಾದಿನಾ ‘‘ಯಥಾ ತಿಲಮ್ಹಿ ತೇಲ’’ನ್ತಿಆದಿಕೋ ಉಪಮಾಪಞ್ಹೋ ಆಹಟೋ, ಸೋ ಯಸ್ಮಾ ವೇದನಾಸಞ್ಞಾನಂ ವಿಯ ತಿಲತೇಲಾನಂ ಲಕ್ಖಣತೋ ನಾನತ್ತವವತ್ಥಾನಂ ನತ್ಥಿ. ಸಬ್ಬೇಸುಪಿ ಹಿ ತಿಲಅಟ್ಠಿತಚೇಸು ತಿಲೋತಿ ವೋಹಾರಮತ್ತಂ, ತೇನೇವ ತಿಲಂ ನಿಬ್ಬತ್ತೇತ್ವಾ ಗಹಿತೇ ಪುರಿಮಸಣ್ಠಾನೇನ ತಿಲೋ ನಾಮ ನ ಪಞ್ಞಾಯತಿ, ತಸ್ಮಾ ಅನಾಹಟಸದಿಸೋವ ಹೋತೀತಿ.

ಸಮ್ಪಯುತ್ತಕಥಾವಣ್ಣನಾ.