೩. ಚೇತಸಿಕಕಥಾವಣ್ಣನಾ

೪೭೫-೪೭೭. ಇದಾನಿ ಚೇತಸಿಕಕಥಾ ನಾಮ ಹೋತಿ. ತತ್ಥ ಯಸ್ಮಾ ಫಸ್ಸಿಕಾದಯೋ ನಾಮ ನತ್ಥಿ, ತಸ್ಮಾ ‘‘ಚೇತಸಿಕೇನಾಪಿ ನ ಭವಿತಬ್ಬಂ, ಇತಿ ನತ್ಥಿ ಚೇತಸಿಕೋ ಧಮ್ಮೋ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ರಾಜಗಿರಿಕಸಿದ್ಧತ್ಥಿಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಸಹಜಾತೋತಿ ಸಮ್ಪಯುತ್ತಸಹಜಾತಂ ಸನ್ಧಾಯ ವುತ್ತಂ. ಫಸ್ಸಿಕಾತಿ ತಾದಿಸಂ ವೋಹಾರಂ ಅಪಸ್ಸನ್ತಸ್ಸ ಪುಚ್ಛಾ ಪರವಾದಿಸ್ಸ. ಕಿಂ ವೋಹಾರೇನ, ಯಥಾ ಚಿತ್ತನಿಸ್ಸಿತಕೋತಿ ಚೇತಸಿಕೋ, ಏವಂ ಸೋಪಿ ಫಸ್ಸನಿಸ್ಸಿತತ್ತಾ ಫಸ್ಸಿಕೋತಿ ವುತ್ತೇ ದೋಸೋ ನತ್ಥೀತಿ ಪಟಿಞ್ಞಾ ಸಕವಾದಿಸ್ಸ. ಸೇಸಂ ಉತ್ತಾನತ್ಥಮೇವಾತಿ.

ಚೇತಸಿಕಕಥಾವಣ್ಣನಾ.