೧೦. ಸಬ್ಬಸಂಯೋಜನಪ್ಪಹಾನಕಥಾವಣ್ಣನಾ

೪೧೩. ಇದಾನಿ ಸಂಯೋಜನಪ್ಪಹಾನಕಥಾ ನಾಮ ಹೋತಿ. ತತ್ಥ ಯೇಸಂ ‘‘ನಿಪ್ಪರಿಯಾಯೇನೇವ ಸಬ್ಬಸಂಯೋಜನಪ್ಪಹಾನಂ ಅರಹತ್ತ’’ನ್ತಿ ಲದ್ಧಿ, ಸೇಯ್ಯಥಾಪಿ ಏತರಹಿ ಅನ್ಧಕಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಪುನ ಸಬ್ಬೇ ಸಂಯೋಜನಾತಿ ಪುಟ್ಠೋ ಹೇಟ್ಠಾ ವುತ್ತಮಗ್ಗತ್ತಯೇನ ಪಹೀನೇ ಸನ್ಧಾಯ ಪಟಿಕ್ಖಿಪತಿ. ದುತಿಯಂ ಪುಟ್ಠೋ ತೇನ ಮಗ್ಗೇನ ಅಪ್ಪಹೀನಸ್ಸ ಅಭಾವಾ ಪಟಿಜಾನಾತಿ. ಸಕ್ಕಾಯದಿಟ್ಠಿಆದೀಸುಪಿ ಪಠಮಮಗ್ಗೇನ ಪಹೀನಭಾವಂ ಸನ್ಧಾಯ ಪಟಿಕ್ಖಿಪತಿ, ಚತುತ್ಥಮಗ್ಗೇನ ಅನವಸೇಸಪ್ಪಹಾನಂ ಸನ್ಧಾಯ ಪಟಿಜಾನಾತಿ. ಏಸೇವ ನಯೋ ಸಬ್ಬತ್ಥಾತಿ.

ಸಬ್ಬಸಂಯೋಜನಪ್ಪಹಾನಕಥಾವಣ್ಣನಾ.

ಚತುತ್ಥೋ ವಗ್ಗೋ.