೪. ಚೋರಸುತ್ತವಣ್ಣನಾ

೮೪. ಚತುತ್ಥೇ ಮಹಾಚೋರೋತಿ ರಜ್ಜನ್ತರೇ ದುಬ್ಭಿತುಂ ಸಮತ್ಥೋ ಮಹಾಚೋರೋ. ಪರಿಯಾಪಜ್ಜತೀತಿ ಪರಿಯಾದಾನಂ ಗಚ್ಛತಿ. ನ ಚಿರಟ್ಠಿತಿಕೋ ಹೋತೀತಿ ಅದ್ಧಾನಂ ಪಾಲೇನ್ತೋ ಠಾತುಂ ನ ಸಕ್ಕೋತಿ. ಅಪ್ಪಹರನ್ತಸ್ಸ ಪಹರತೀತಿ ಅತ್ತನೋ ಅವೇರಿನೇ ಅಪ್ಪಹರನ್ತೇ ಗುಣಸಮ್ಪನ್ನೇ ಚ ಮಹಲ್ಲಕೇ ಚ ತರುಣದಾರಕೇ ಚ ಅಪ್ಪಹರಿತಬ್ಬಯುತ್ತಕೇ ಪಹರತಿ. ಅನವಸೇಸಂ ಆದಿಯತೀತಿ ನಿಸ್ಸೇಸಂ ಗಣ್ಹಾತಿ. ಬ್ಯತ್ತಚೋರಾನಞ್ಹಿ ಇದಂ ವತ್ತಂ – ಪರಸ್ಸ ದ್ವೀಸು ಸಾಟಕೇಸು ಏಕೋ ಗಹೇತಬ್ಬೋ, ಏಕಸ್ಮಿಂ ಸನ್ತೇ ದುಬ್ಬಲಂ ದತ್ವಾ ಥಿರೋ ಗಹೇತಬ್ಬೋ. ಪುಟಭತ್ತತಣ್ಡುಲಾದೀಸು ಏಕಂ ಕೋಟ್ಠಾಸಂ ದತ್ವಾ ಏಕೋ ಗಹೇತಬ್ಬೋತಿ. ಅಚ್ಚಾಸನ್ನೇ ಕಮ್ಮಂ ಕರೋತೀತಿ ಗಾಮನಿಗಮರಾಜಧಾನೀನಂ ಆಸನ್ನಟ್ಠಾನೇ ಚೋರಿಕಕಮ್ಮಂ ಕರೋತಿ. ನ ಚ ನಿಧಾನಕುಸಲೋ ಹೋತೀತಿ ಯಂ ಲದ್ಧಂ, ತಂ ದಕ್ಖಿಣೇಯ್ಯೇ ನಿದಹಿತುಂ ಛೇಕೋ ನ ಹೋತಿ, ಪರಲೋಕಮಗ್ಗಂ ನ ಸೋಧೇತಿ.