೮. ದುತಿಯಬಲಸುತ್ತವಣ್ಣನಾ

೨೮. ಅಟ್ಠಮೇ ಬಲಾನೀತಿ ಞಾಣಬಲಾನಿ. ಆಸವಾನಂ ಖಯಂ ಪಟಿಜಾನಾತೀತಿ ಅರಹತ್ತಂ ಪಟಿಜಾನಾತಿ. ಅನಿಚ್ಚತೋತಿ ಹುತ್ವಾ ಅಭಾವಾಕಾರೇನ. ಯಥಾಭೂತನ್ತಿ ಯಥಾಸಭಾವತೋ. ಸಮ್ಮಪ್ಪಞ್ಞಾಯಾತಿ ಸಹವಿಪಸ್ಸನಾಯ ಮಗ್ಗಪಞ್ಞಾಯ. ಅಙ್ಗಾರಕಾಸೂಪಮಾತಿ ಸನ್ತಾಪನಟ್ಠೇನ ಅಙ್ಗಾರಕಾಸುಯಾ ಉಪಮಿತಾ ಇಮೇ ಕಾಮಾತಿ. ವಿವೇಕನಿನ್ನನ್ತಿ ಫಲಸಮಾಪತ್ತಿವಸೇನ ನಿಬ್ಬಾನನಿನ್ನಂ. ವಿವೇಕಟ್ಠನ್ತಿ ಕಿಲೇಸೇಹಿ ವಜ್ಜಿತಂ ದೂರೀಭೂತಂ ವಾ. ನೇಕ್ಖಮ್ಮಾಭಿರತನ್ತಿ ಪಬ್ಬಜ್ಜಾಭಿರತಂ. ಬ್ಯನ್ತಿಭೂತನ್ತಿ ವಿಗತನ್ತಭೂತಂ ಏಕದೇಸೇನಾಪಿ ಅನಲ್ಲೀನಂ ವಿಸಂಯುತ್ತಂ ವಿಸಂಸಟ್ಠಂ. ಆಸವಟ್ಠಾನಿಯೇಹೀತಿ ಸಮ್ಪಯೋಗವಸೇನ ಆಸವಾನಂ ಕಾರಣಭೂತೇಹಿ, ಕಿಲೇಸಧಮ್ಮೇಹೀತಿ ಅತ್ಥೋ. ಅಥ ವಾ ಬ್ಯನ್ತಿಭೂತನ್ತಿ ವಿಗತವಾಯನ್ತಿ ಅತ್ಥೋ. ಕುತೋ? ಸಬ್ಬಸೋ ಆಸವಟ್ಠಾನಿಯೇಹಿ ಧಮ್ಮೇಹಿ, ಸಬ್ಬೇಹಿ ತೇಭೂಮಕಧಮ್ಮೇಹೀತಿ ಅತ್ಥೋ. ಇಮಸ್ಮಿಂ ಸುತ್ತೇ ಅರಿಯಮಗ್ಗೋ ಲೋಕಿಯಲೋಕುತ್ತರೋ ಕಥಿತೋ.