೨. ದುತಿಯಉಗ್ಗಸುತ್ತವಣ್ಣನಾ

೨೨. ದುತಿಯೇ ನಾಗವನೇತಿ ತಸ್ಸ ಕಿರ ಸೇಟ್ಠಿನೋ ನಾಗವನಂ ನಾಮ ಉಯ್ಯಾನಂ, ಸೋ ತತ್ಥ ಪುರೇಭತ್ತಂ ಗನ್ಧಮಾಲಾದೀನಿ ಗಾಹಾಪೇತ್ವಾ ಉಯ್ಯಾನಕೀಳಿಕಂ ಕೀಳಿತುಕಾಮೋ ಗನ್ತ್ವಾ ಪರಿಚಾರಿಯಮಾನೋ ಭಗವನ್ತಂ ಅದ್ದಸ. ಸಹ ದಸ್ಸನೇನೇವಸ್ಸ ಪುರಿಮನಯೇನೇವ ಚಿತ್ತಂ ಪಸೀದಿ, ಸುರಾಪಾನೇನ ಚ ಉಪ್ಪನ್ನಮನ್ದೋ ತಙ್ಖಣಂಯೇವ ಪಹೀಯಿ. ತಂ ಸನ್ಧಾಯೇವಮಾಹ. ಓಣೋಜೇಸಿನ್ತಿ ಉದಕಂ ಹತ್ಥೇ ಪಾತೇತ್ವಾ ಅದಾಸಿಂ. ಅಸುಕೋತಿ ಅಮುಕೋ. ಸಮಚಿತ್ತೋವ ದೇಮೀತಿ ‘‘ಇಮಸ್ಸ ಥೋಕಂ, ಇಮಸ್ಸ ಬಹುಕ’’ನ್ತಿ ಏವಂ ಚಿತ್ತನಾನತ್ತಂ ನ ಕರೋಮಿ, ದೇಯ್ಯಧಮ್ಮಂ ಪನ ಏಕಸದಿಸಂ ಕರೋಮೀತಿ ದಸ್ಸೇತಿ. ಆರೋಚೇನ್ತೀತಿ ಆಕಾಸೇ ಠತ್ವಾ ಆರೋಚೇನ್ತಿ. ನತ್ಥಿ ತಂ ಸಂಯೋಜನನ್ತಿ ಇಮಿನಾ ಉಪಾಸಕೋ ಅತ್ತನೋ ಅನಾಗಾಮಿಫಲಂ ಬ್ಯಾಕರೋತಿ.