೫. ಉದಕೂಪಮಾಸುತ್ತವಣ್ಣನಾ

೧೫. ಪಞ್ಚಮೇ ಉದಕೂಪಮಾತಿ ನಿಮುಜ್ಜನಾದಿಆಕಾರಂ ಗಹೇತ್ವಾ ಉದಕೇನ ಉಪಮಿತಾ. ಸಕಿಂ ನಿಮುಗ್ಗೋತಿ ಏಕವಾರಮೇವ ನಿಮುಗ್ಗೋ. ಏಕನ್ತಕಾಳಕೇಹೀತಿ ನಿಯತಮಿಚ್ಛಾದಿಟ್ಠಿಂ ಸನ್ಧಾಯ ವುತ್ತಂ. ಉಮ್ಮುಜ್ಜತೀತಿ ಉಟ್ಠಹತಿ. ಸಾಧೂತಿ ಸೋಭನಾ ಭದ್ದಕಾ. ಹಾಯತಿಯೇವಾತಿ ಚಙ್ಕವಾರೇ ಆಸಿತ್ತಉದಕಂ ವಿಯ ಪರಿಹಾಯತೇವ. ಉಮ್ಮುಜ್ಜಿತ್ವಾ ವಿಪಸ್ಸತಿ ವಿಲೋಕೇತೀತಿ ಉಟ್ಠಹಿತ್ವಾ ಗನ್ತಬ್ಬದಿಸಂ ವಿಪಸ್ಸತಿ ವಿಲೋಕೇತಿ. ಪತರತೀತಿ ಗನ್ತಬ್ಬದಿಸಾಭಿಮುಖೋ ತರತಿ ನಾಮ. ಪಟಿಗಾಧಪ್ಪತ್ತೋ ಹೋತೀತಿ ಉಟ್ಠಾಯ ವಿಲೋಕೇತ್ವಾ ಪತರಿತ್ವಾ ಏಕಸ್ಮಿಂ ಠಾನೇ ಪತಿಟ್ಠಾಪತ್ತೋ ನಾಮ ಹೋತಿ, ತಿಟ್ಠತಿ ನ ಪುನಾಗಚ್ಛತಿ. ತಿಣ್ಣೋ ಪಾರಙ್ಗತೋ ಥಲೇ ತಿಟ್ಠತೀತಿ ಸಬ್ಬಕಿಲೇಸೋಘಂ ತರಿತ್ವಾ ಪರತೀರಂ ಗನ್ತ್ವಾ ನಿಬ್ಬಾನಥಲೇ ಪತಿಟ್ಠಿತೋ ನಾಮ ಹೋತಿ. ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥಿತಂ.