೧-೫. ಪಠಮಪಿಯಸುತ್ತಾದಿವಣ್ಣನಾ

೧-೫. ಸತ್ತಕನಿಪಾತಸ್ಸ ಪಠಮೇ ಅನವಞ್ಞತ್ತಿಕಾಮೋತಿ ಅಭಿಞ್ಞಾತಭಾವಕಾಮೋ. ತತಿಯೇ ಯೋನಿಸೋ ವಿಚಿನೇ ಧಮ್ಮನ್ತಿ ಉಪಾಯೇನ ಚತುಸಚ್ಚಧಮ್ಮಂ ವಿಚಿನಾತಿ. ಪಞ್ಞಾಯತ್ಥಂ ವಿಪಸ್ಸತೀತಿ ಸಹವಿಪಸ್ಸನಾಯ ಮಗ್ಗಪಞ್ಞಾಯ ಸಚ್ಚಧಮ್ಮಂ ವಿಪಸ್ಸತಿ. ಪಜ್ಜೋತಸ್ಸೇವಾತಿ ದೀಪಸ್ಸೇವ. ವಿಮೋಕ್ಖೋ ಹೋತಿ ಚೇತಸೋತಿ ತಸ್ಸ ಇಮೇಹಿ ಬಲೇಹಿ ಸಮನ್ನಾಗತಸ್ಸ ಖೀಣಾಸವಸ್ಸ ದೀಪನಿಬ್ಬಾನಂ ವಿಯ ಚರಿಮಕಚಿತ್ತಸ್ಸ ವತ್ಥಾರಮ್ಮಣೇಹಿ ವಿಮೋಕ್ಖೋ ಹೋತಿ, ಗತಟ್ಠಾನಂ ನ ಪಞ್ಞಾಯತಿ. ಚತುತ್ಥೇ ಸದ್ಧೋ ಹೋತೀತಿಆದೀನಿ ಪಞ್ಚಕನಿಪಾತೇ ವಣ್ಣಿತಾನೇವ. ಪಞ್ಚಮೇ ಧನಾನೀತಿ ಅದಾಲಿದ್ದಿಯಕರಣಟ್ಠೇನ ಧನಾನಿ.