೭. ಉಗ್ಗಸುತ್ತವಣ್ಣನಾ

೭. ಸತ್ತಮೇ ಉಗ್ಗೋ ರಾಜಮಹಾಮತ್ತೋತಿ ಪಸೇನದಿಕೋಸಲಸ್ಸ ಮಹಾಅಮಚ್ಚೋ. ಉಪಸಙ್ಕಮೀತಿ ಭುತ್ತಪಾತರಾಸೋ ಉಪಸಙ್ಕಮಿ. ಅಡ್ಢೋತಿ ನಿಧಾನಗತೇನ ಧನೇನ ಅಡ್ಢೋ. ಮಿಗಾರೋ ರೋಹಣೇಯ್ಯೋತಿ ರೋಹಣಸೇಟ್ಠಿನೋ ನತ್ತಾರಂ ಮಿಗಾರಸೇಟ್ಠಿಂ ಸನ್ಧಾಯೇವಮಾಹ. ಮಹದ್ಧನೋತಿ ವಳಞ್ಜನಧನೇನ ಮಹದ್ಧನೋ. ಮಹಾಭೋಗೋತಿ ಉಪಭೋಗಪರಿಭೋಗಭಣ್ಡಸ್ಸ ಮಹನ್ತತಾಯ ಮಹಾಭೋಗೋ. ಹಿರಞ್ಞಸ್ಸಾತಿ ಸುವಣ್ಣಸ್ಸೇವ. ಸುವಣ್ಣಾಮೇವ ಹಿಸ್ಸ ಕೋಟಿಸಙ್ಖ್ಯಂ ಅಹೋಸಿ. ರೂಪಿಯಸ್ಸಾತಿ ಸೇಸಸ್ಸ ತಟ್ಟಕಸರಕಅತ್ಥರಣಪಾವುರಣಾದಿನೋ ಪರಿಭೋಗಪರಿಕ್ಖಾರಸ್ಸ ಪಮಾಣಸಙ್ಖಾನೇ ವಾದೋಯೇವ ನತ್ಥಿ.