೧೧. ಅಪ್ಪಮಾದಸುತ್ತವಣ್ಣನಾ

೫೩. ಏಕಾದಸಮೇ ಸಮಧಿಗ್ಗಯ್ಹಾತಿ ಸುಟ್ಠು ಗಣ್ಹಿತ್ವಾ. ಜಙ್ಗಲಾನಂ ಪಾಣಾನನ್ತಿ ಪಥವೀತಲಚಾರೀನಂ ಸಪಾದಕಪಾಣಾನಂ. ಪದಜಾತಾನೀತಿ ಪದಾನಿ. ಸಮೋಧಾನಂ ಗಚ್ಛನ್ತೀತಿ ಓಧಾನಂ ಉಪನಿಕ್ಖೇಪಂ ಗಚ್ಛನ್ತಿ. ಅಗ್ಗಮಕ್ಖಾಯತೀತಿ ಸೇಟ್ಠಂ ಅಕ್ಖಾಯತಿ. ಪಬ್ಬಜಲಾಯಕೋತಿ ಪಬ್ಬಜತಿಣಚ್ಛೇದಕೋ. ಓಧುನಾತೀತಿ ಹೇಟ್ಠಾ ಮುಖಂ ಧುನಾತಿ. ನಿಧುನಾತೀತಿ ಉಭೋಹಿ ಪಸ್ಸೇಹಿ ಧುನಾತಿ. ನಿಚ್ಛಾದೇತೀತಿ ಬಾಹಾಯ ವಾ ಪಹರತಿ, ರುಕ್ಖೇ ವಾ ಪಹರತಿ. ಅಮ್ಬಪಿಣ್ಡಿಯಾತಿ ಅಮ್ಬಫಲಪಿಣ್ಡಿಯಾ. ವಣ್ಟೂಪನಿಬನ್ಧನಾನೀತಿ ವಣ್ಟೇ ಉಪನಿಬನ್ಧನಾನಿ, ವಣ್ಟೇ ವಾ ಪತಿಟ್ಠಿತಾನಿ. ತದನ್ವಯಾನಿ ಭವನ್ತೀತಿ ವಣ್ಟಾನುವತ್ತಕಾನಿ ಭವನ್ತಿ, ಅಮ್ಬಪಿಣ್ಡಿದಣ್ಡಕಾನುವತ್ತಕಾನಿ ಭವನ್ತೀತಿಪಿ ಅತ್ಥೋ. ಖುದ್ದರಾಜಾನೋತಿ ಖುದ್ದಕರಾಜಾನೋ, ಪಕತಿರಾಜಾನೋ ವಾ.