೮. ದುತಿಯಸಮಯಸುತ್ತವಣ್ಣನಾ

೨೮. ಅಟ್ಠಮೇ ಮಣ್ಡಲಮಾಳೇತಿ ಭೋಜನಸಾಲಾಯ. ಚಾರಿತ್ತಕಿಲಮಥೋತಿ ಪಿಣ್ಡಪಾತಚರಿಯಾಯ ಉಪ್ಪನ್ನಕಿಲಮಥೋ. ಭತ್ತಕಿಲಮಥೋತಿ ಭತ್ತದರಥೋ. ವಿಹಾರಪಚ್ಛಾಯಾಯನ್ತಿ ವಿಹಾರಪಚ್ಚನ್ತೇ ಛಾಯಾಯ. ಯದೇವಸ್ಸ ದಿವಾ ಸಮಾಧಿನಿಮಿತ್ತಂ ಮನಸಿಕತಂ ಹೋತೀತಿ ಯಂ ಏವ ತಸ್ಸ ತತೋ ಪುರಿಮದಿವಸಭಾಗೇ ಸಮಥನಿಮಿತ್ತಂ ಚಿತ್ತೇ ಕತಂ ಹೋತಿ. ತದೇವಸ್ಸ ತಸ್ಮಿಂ ಸಮಯೇ ಸಮುದಾಚರತೀತಿ ತಂಯೇವ ಏತಸ್ಸ ತಸ್ಮಿಂ ಸಮಯೇ ದಿವಾವಿಹಾರೇ ನಿಸಿನ್ನಸ್ಸ ಮನೋದ್ವಾರೇ ಸಞ್ಚರತಿ. ಓಜಟ್ಠಾಯೀತಿ ಓಜಾಯ ಠಿತೋ ಪತಿಟ್ಠಿತೋ. ಫಾಸುಕಸ್ಸ ಹೋತೀತಿ ಫಾಸುಕಂ ಅಸ್ಸ ಹೋತಿ. ಸಮ್ಮುಖಾತಿ ಕಥೇನ್ತಸ್ಸ ಸಮ್ಮುಖಟ್ಠಾನೇ. ಸುತನ್ತಿ ಸೋತೇನ ಸುತಂ. ಪಟಿಗ್ಗಹಿತನ್ತಿ ಚಿತ್ತೇನ ಪಟಿಗ್ಗಹಿತಂ.