೨. ದುತಿಯಆಘಾತಪಟಿವಿನಯಸುತ್ತವಣ್ಣನಾ

೧೬೨. ದುತಿಯೇ ಆಘಾತೋ ಏತೇಸು ಪಟಿವಿನೇತಬ್ಬೋತಿ ಆಘಾತಪಟಿವಿನಯಾ. ಆಘಾತೋ ಏತೇಹಿ ಪಟಿವಿನೇತಬ್ಬೋತಿಪಿ ಆಘಾತಪಟಿವಿನಯಾ. ಪಟಿವಿನಯೋತಿ ಹಿ ಪಟಿವಿನಯವತ್ಥೂನಮ್ಪಿ ಪಟಿವಿನಯಕಾರಣಾನಮ್ಪಿ ಏತಂ ಅಧಿವಚನಂ, ತದುಭಯಮ್ಪಿ ಇಧ ವಟ್ಟತಿ. ಪಞ್ಚ ಹಿ ಪುಗ್ಗಲಾ ಪಟಿವಿನಯವತ್ಥೂ ಹೋನ್ತಿ ಪಞ್ಚಹಿ ಉಪಮಾಹಿ ಪಞ್ಚ ಪಟಿಪತ್ತಿಯೋ ಪಟಿವಿನಯಕಾರಣಾನಿ. ಲಭತಿ ಚ ಕಾಲೇನ ಕಾಲಂ ಚೇತಸೋ ವಿವರಂ ಚೇತಸೋ ಪಸಾದನ್ತಿ ಕಾಲೇ ಕಾಲೇ ಸಮಥವಿಪಸ್ಸನಾಚಿತ್ತಸ್ಸ ಉಪ್ಪನ್ನೋಕಾಸಸಙ್ಖಾತಂ ವಿವರಞ್ಚೇವ ಸದ್ಧಾಸಮ್ಪನ್ನಭಾವಸಙ್ಖಾತಂ ಪಸಾದಞ್ಚ ಲಭತಿ.

ರಥಿಯಾಯಾತಿ ಅನ್ತರವೀಥಿಯಂ. ನನ್ತಕನ್ತಿ ಪಿಲೋತಿಕಖಣ್ಡಂ. ನಿಗ್ಗಹೇತ್ವಾತಿ ಅಕ್ಕಮಿತ್ವಾ. ಯೋ ತತ್ಥ ಸಾರೋತಿ ಯಂ ತತ್ಥ ಥಿರಟ್ಠಾನಂ. ತಂ ಪರಿಪಾತೇತ್ವಾತಿ ತಂ ಲುಞ್ಚಿತ್ವಾ. ಏವಮೇವ ಖೋತಿ ಏತ್ಥ ಪಂಸುಕೂಲಿಕೋ ವಿಯ ಮೇತ್ತಾವಿಹಾರೀ ದಟ್ಠಬ್ಬೋ, ರಥಿಯಾಯ ನನ್ತಕಂ ವಿಯ ವೇರಿಪುಗ್ಗಲೋ, ದುಬ್ಬಲಟ್ಠಾನಂ ವಿಯ ಅಪರಿಸುದ್ಧಕಾಯಸಮಾಚಾರತಾ, ಥಿರಟ್ಠಾನಂ ವಿಯ ಪರಿಸುದ್ಧವಚೀಸಮಾಚಾರತಾ, ದುಬ್ಬಲಟ್ಠಾನಂ ಛಡ್ಡೇತ್ವಾ ಥಿರಟ್ಠಾನಂ ಆದಾಯ ಗನ್ತ್ವಾ ಸಿಬ್ಬಿತ್ವಾ ರಜಿತ್ವಾ ಪಾರುಪಿತ್ವಾ ವಿಚರಣಕಾಲೋ ವಿಯ ಅಪರಿಸುದ್ಧಕಾಯಸಮಾಚಾರತಂ ಅಮನಸಿಕತ್ವಾ ಪರಿಸುದ್ಧವಚೀಸಮಾಚಾರತಂ ಮನಸಿಕತ್ವಾ ವೇರಿಮ್ಹಿ ಚಿತ್ತುಪ್ಪಾದಂ ನಿಬ್ಬಾಪೇತ್ವಾ ಫಾಸುವಿಹಾರಕಾಲೋ ದಟ್ಠಬ್ಬೋ.

ಸೇವಾಲಪಣಕಪರಿಯೋನದ್ಧಾತಿ ಸೇವಾಲೇನ ಚ ಉದಕಪಪ್ಪಟಕೇನ ಚ ಪಟಿಚ್ಛನ್ನಾ. ಘಮ್ಮಪರೇತೋತಿ ಘಮ್ಮೇನ ಅನುಗತೋ. ಕಿಲನ್ತೋತಿ ಮಗ್ಗಕಿಲನ್ತೋ. ತಸಿತೋತಿ ತಣ್ಹಾಭಿಭೂತೋ. ಪಿಪಾಸಿತೋತಿ ಪಾನೀಯಂ ಪಾತುಕಾಮೋ. ಅಪವಿಯೂಹಿತ್ವಾತಿ ಅಪನೇತ್ವಾ. ಪಿವಿತ್ವಾತಿ ಪಸನ್ನಉದಕಂ ಪಿವಿತ್ವಾ. ಏವಮೇವ ಖೋತಿ ಏತ್ಥ ಘಮ್ಮಾಭಿತತ್ತೋ ಪುರಿಸೋ ವಿಯ ಮೇತ್ತಾವಿಹಾರೀ ದಟ್ಠಬ್ಬೋ, ಸೇವಾಲಪಣಕಂ ವಿಯ ಅಪರಿಸುದ್ಧವಚೀಸಮಾಚಾರತಾ, ಪಸನ್ನಉದಕಂ ವಿಯ ಪರಿಸುದ್ಧಕಾಯಸಮಾಚಾರತಾ, ಸೇವಾಲಪಣಕಂ ಅಪಬ್ಯೂಹಿತ್ವಾ ಪಸನ್ನೋದಕಂ ಪಿವಿತ್ವಾ ಗಮನಂ ವಿಯ ಅಪರಿಸುದ್ಧವಚೀಸಮಾಚಾರತಂ ಅಮನಸಿಕತ್ವಾ ಪರಿಸುದ್ಧಕಾಯಸಮಾಚಾರತಂ ಮನಸಿಕತ್ವಾ ವೇರಿಮ್ಹಿ ಚಿತ್ತುಪ್ಪಾದಂ ನಿಬ್ಬಾಪೇತ್ವಾ ಫಾಸುವಿಹಾರಕಾಲೋ ದಟ್ಠಬ್ಬೋ.

ಖೋಭೇಸ್ಸಾಮೀತಿ ಚಾಲೇಸ್ಸಾಮಿ. ಲೋಳೇಸ್ಸಾಮೀತಿ ಆಕುಲಂ ಕರಿಸ್ಸಾಮಿ. ಅಪೇಯ್ಯಮ್ಪಿ ತಂ ಕರಿಸ್ಸಾಮೀತಿ ಪಿವಿತುಂ ಅಸಕ್ಕುಣೇಯ್ಯಂ ಕರಿಸ್ಸಾಮಿ. ಚತುಕ್ಕುಣ್ಡಿಕೋತಿ ಜಾಣೂಹಿ ಚ ಹತ್ಥೇಹಿ ಚ ಭೂಮಿಯಂ ಪತಿಟ್ಠಾನೇನ ಚತುಕ್ಕುಣ್ಡಿಕೋ ಹುತ್ವಾ. ಗೋಪೀತಕಂ ಪಿವಿತ್ವಾತಿ ಗಾವಿಯೋ ವಿಯ ಮುಖೇನ ಆಕಡ್ಢೇನ್ತೋ ಪಿವಿತ್ವಾ. ಏವಮೇವ ಖೋತಿ ಏತ್ಥ ಘಮ್ಮಾಭಿತತ್ತೋ ಪುರಿಸೋ ವಿಯ ಮೇತ್ತಾವಿಹಾರೀ ದಟ್ಠಬ್ಬೋ, ಗೋಪದಂ ವಿಯ ವೇರಿಪುಗ್ಗಲೋ, ಗೋಪದೇ ಪರಿತ್ತಉದಕಂ ವಿಯ ತಸ್ಸಬ್ಭನ್ತರೇ ಪರಿತ್ತಗುಣೋ, ಚತುಕ್ಕುಣ್ಡಿಕಸ್ಸ ಗೋಪೀತಕಂ ಪಿವಿತ್ವಾ ಪಕ್ಕಮನಂ ವಿಯ ತಸ್ಸ ಅಪರಿಸುದ್ಧಕಾಯವಚೀಸಮಾಚಾರತಂ ಅಮನಸಿಕತ್ವಾ ಯಂ ಸೋ ಕಾಲೇನ ಕಾಲಂ ಧಮ್ಮಸ್ಸವನಂ ನಿಸ್ಸಾಯ ಚೇತಸೋ ವಿವರಪ್ಪಸಾದಸಙ್ಖಾತಂ ಪೀತಿಪಾಮೋಜ್ಜಂ ಲಭತಿ, ತಂ ಮನಸಿಕತ್ವಾ ಚಿತ್ತುಪ್ಪಾದನಿಬ್ಬಾಪನಂ ವೇದಿತಬ್ಬಂ.

ಆಬಾಧಿಕೋತಿ ಇರಿಯಾಪಥಭಞ್ಜನಕೇನ ವಿಸಭಾಗಾಬಾಧೇನ ಆಬಾಧಿಕೋ. ಪುರತೋಪಿಸ್ಸಾತಿ ಪುರತೋಪಿ ಭವೇಯ್ಯ. ಅನಯಬ್ಯಸನನ್ತಿ ಅವಡ್ಢಿವಿನಾಸಂ. ಏವಮೇವ ಖೋತಿ ಏತ್ಥ ಸೋ ಅನಾಥಗಿಲಾನೋ ವಿಯ ಸಬ್ಬಕಣ್ಹಧಮ್ಮಸಮನ್ನಾಗತೋ ಪುಗ್ಗಲೋ, ಅದ್ಧಾನಮಗ್ಗೋ ವಿಯ ಅನಮತಗ್ಗಸಂಸಾರೋ, ಪುರತೋ ಚ ಪಚ್ಛತೋ ಚ ಗಾಮಾನಂ ದೂರಭಾವೋ ವಿಯ ನಿಬ್ಬಾನಸ್ಸ ದೂರಭಾವೋ, ಸಪ್ಪಾಯಭೋಜನಾನಂ ಅಲಾಭೋ ವಿಯ ಸಾಮಞ್ಞಫಲಭೋಜನಾನಂ ಅಲಾಭೋ, ಸಪ್ಪಾಯಭೇಸಜ್ಜಾನಂ ಅಲಾಭೋ ವಿಯ ಸಮಥವಿಪಸ್ಸನಾನಂ ಅಭಾವೋ, ಪತಿರೂಪಉಪಟ್ಠಾಕಾನಂ ಅಲಾಭೋ ವಿಯ ಓವಾದಾನುಸಾಸನೀಹಿ ಕಿಲೇಸತಿಕಿಚ್ಛಕಾನಂ ಅಭಾವೋ, ಗಾಮನ್ತನಾಯಕಸ್ಸ ಅಲಾಭೋ ವಿಯ ನಿಬ್ಬಾನಸಮ್ಪಾಪಕಸ್ಸ ತಥಾಗತಸ್ಸ ವಾ ತಥಾಗತಸಾವಕಸ್ಸ ವಾ ಅಲದ್ಧಭಾವೋ, ಅಞ್ಞತರಸ್ಸ ಪುರಿಸಸ್ಸ ದಿಸ್ವಾ ಕಾರುಞ್ಞುಪಟ್ಠಾನಂ ವಿಯ ತಸ್ಮಿಂ ಪುಗ್ಗಲೇ ಮೇತ್ತಾವಿಹಾರಿಕಸ್ಸ ಕಾರುಞ್ಞಂ ಉಪ್ಪಾದೇತ್ವಾ ಚಿತ್ತನಿಬ್ಬಾಪನಂ ವೇದಿತಬ್ಬಂ.

ಅಚ್ಛೋದಕಾತಿ ಪಸನ್ನೋದಕಾ. ಸಾತೋದಕಾತಿ ಮಧುರೋದಕಾ. ಸೀತೋದಕಾತಿ ತನುಸೀತಸಲಿಲಾ. ಸೇತಕಾತಿ ಊಮಿಭಿಜ್ಜನಟ್ಠಾನೇಸು ಸೇತವಣ್ಣಾ. ಸುಪತಿತ್ಥಾತಿ ಸಮತಿತ್ಥಾ. ಏವಮೇವ ಖೋತಿ ಏತ್ಥ ಘಮ್ಮಾಭಿತತ್ತೋ ಪುರಿಸೋ ವಿಯ ಮೇತ್ತಾವಿಹಾರೀ ದಟ್ಠಬ್ಬೋ, ಸಾ ಪೋಕ್ಖರಣೀ ವಿಯ ಪರಿಸುದ್ಧಸಬ್ಬದ್ವಾರೋ ಪುರಿಸೋ, ನ್ಹತ್ವಾ ಪಿವಿತ್ವಾ ಪಚ್ಚುತ್ತರಿತ್ವಾ ರುಕ್ಖಚ್ಛಾಯಾಯ ನಿಪಜ್ಜಿತ್ವಾ ಯಥಾಕಾಮಂ ಗಮನಂ ವಿಯ ತೇಸು ದ್ವಾರೇಸು ಯಂ ಇಚ್ಛತಿ, ತಂ ಆರಮ್ಮಣಂ ಕತ್ವಾ ಚಿತ್ತನಿಬ್ಬಾಪನಂ ವೇದಿತಬ್ಬಂ. ತತಿಯಚತುತ್ಥಾನಿ ಹೇಟ್ಠಾ ವುತ್ತನಯಾನೇವ.