೨. ಆರಭತಿಸುತ್ತವಣ್ಣನಾ

೧೪೨. ದುತಿಯೇ ಆರಭತಿ ಚ ವಿಪ್ಪಟಿಸಾರೀ ಚ ಹೋತೀತಿ ಆಪತ್ತಿವೀತಿಕ್ಕಮನವಸೇನ ಆರಭತಿ ಚೇವ, ತಪ್ಪಚ್ಚಯಾ ಚ ವಿಪ್ಪಟಿಸಾರೀ ಹೋತಿ. ಚೇತೋವಿಮುತ್ತಿಂ ಪಞ್ಞಾವಿಮುತ್ತಿನ್ತಿ ಅರಹತ್ತಸಮಾಧಿಞ್ಚೇವ ಅರಹತ್ತಫಲಞಾಣಞ್ಚ. ನಪ್ಪಜಾನಾತೀತಿ ಅನಧಿಗತತ್ತಾ ನ ಜಾನಾತಿ. ಆರಭತಿ ನ ವಿಪ್ಪಟಿಸಾರೀ ಹೋತೀತಿ ಆಪತ್ತಿಂ ಆಪಜ್ಜತಿ, ವುಟ್ಠಿತತ್ತಾ ಪನ ನ ವಿಪ್ಪಟಿಸಾರೀ ಹೋತಿ. ನಾರಭತಿ ವಿಪ್ಪಟಿಸಾರೀ ಹೋತೀತಿ ಸಕಿಂ ಆಪತ್ತಿಂ ಆಪಜ್ಜಿತ್ವಾ ತತೋ ವುಟ್ಠಾಯ ಪಚ್ಛಾ ಕಿಞ್ಚಾಪಿ ನಾಪಜ್ಜತಿ, ವಿಪ್ಪಟಿಸಾರಂ ಪನ ವಿನೋದೇತುಂ ನ ಸಕ್ಕೋತಿ. ನಾರಭತಿ ನ ವಿಪ್ಪಟಿಸಾರೀ ಹೋತೀತಿ ನ ಚೇವ ಆಪತ್ತಿಂ ಆಪಜ್ಜತಿ, ನ ಚ ವಿಪ್ಪಟಿಸಾರೀ ಹೋತಿ. ತಞ್ಚ ಚೇತೋವಿಮುತ್ತಿಂ…ಪೇ… ನಿರುಜ್ಝನ್ತೀತಿ ಅರಹತ್ತಂ ಪನ ಅಪ್ಪತ್ತೋ ಹೋತಿ. ಪಞ್ಚಮನಯೇನ ಖೀಣಾಸವೋ ಕಥಿತೋ.

ಆರಮ್ಭಜಾತಿ ಆಪತ್ತಿವೀತಿಕ್ಕಮಸಮ್ಭವಾ. ವಿಪ್ಪಟಿಸಾರಜಾತಿ ವಿಪ್ಪಟಿಸಾರತೋ ಜಾತಾ. ಪವಡ್ಢನ್ತೀತಿ ಪುನಪ್ಪುನಂ ಉಪ್ಪಜ್ಜನೇನ ವಡ್ಢನ್ತಿ. ಆರಮ್ಭಜೇ ಆಸವೇ ಪಹಾಯಾತಿ ವೀತಿಕ್ಕಮಸಮ್ಭವೇ ಆಸವೇ ಆಪತ್ತಿದೇಸನಾಯ ವಾ ಆಪತ್ತಿವುಟ್ಠಾನೇನ ವಾ ಪಜಹಿತ್ವಾ. ಪಟಿವಿನೋದೇತ್ವಾತಿ ಸುದ್ಧನ್ತೇ ಠಿತಭಾವಪಚ್ಚವೇಕ್ಖಣೇನ ನೀಹರಿತ್ವಾ. ಚಿತ್ತಂ ಪಞ್ಞಞ್ಚ ಭಾವೇತೂತಿ ವಿಪಸ್ಸನಾಚಿತ್ತಞ್ಚ ತಂಸಮ್ಪಯುತ್ತಂ ಪಞ್ಞಞ್ಚ ಭಾವೇತು. ಸೇಸಂ ಇಮಿನಾ ಉಪಾಯೇನೇವ ವೇದಿತಬ್ಬನ್ತಿ.