೯. ಅಕ್ಖಮಸುತ್ತವಣ್ಣನಾ

೧೩೯. ನವಮೇ ಹತ್ಥಿಕಾಯನ್ತಿ ಹತ್ಥಿಘಟಂ. ಸೇಸೇಸುಪಿ ಏಸೇವ ನಯೋ. ಸಙ್ಗಾಮೇ ಅವಚರನ್ತೀತಿ ಸಙ್ಗಾಮಾವಚರಾ. ಏಕಿಸ್ಸಾ ವಾ ತಿಣೋದಕದತ್ತಿಯಾ ವಿಮಾನಿತೋತಿ ಏಕದಿವಸಂ ಏಕೇನ ತಿಣೋದಕದಾನೇನ ವಿಮಾನಿತೋ, ಏಕದಿವಸಮತ್ತಂ ಅಲದ್ಧತಿಣೋದಕೋತಿ ಅತ್ಥೋ. ಇತೋ ಪರಮ್ಪಿ ಏಸೇವ ನಯೋ. ನ ಸಕ್ಕೋತಿ ಚಿತ್ತಂ ಸಮಾದಹಿತುನ್ತಿ ಆರಮ್ಮಣೇ ಚಿತ್ತಂ ಸಮ್ಮಾ ಠಪೇತುಂ ನ ಸಕ್ಕೋತಿ. ಸೇಸಮೇತ್ಥ ಉತ್ತಾನಮೇವ. ಇಮಸ್ಮಿಂ ಪನ ಸುತ್ತೇ ವಟ್ಟವಿವಟ್ಟಂ ಕಥಿತನ್ತಿ ವೇದಿತಬ್ಬಂ.