೩. ಉಪಕ್ಕಿಲೇಸಸುತ್ತವಣ್ಣನಾ

೨೩. ತತಿಯೇ ನ ಚ ಪಭಸ್ಸರನ್ತಿ ನ ಚ ಪಭಾವನ್ತಂ. ಪಭಙ್ಗು ಚಾತಿ ಪಭಿಜ್ಜನಸಭಾವಂ. ಅಯೋತಿ ಕಾಳಲೋಹಂ. ಲೋಹನ್ತಿ ಠಪೇತ್ವಾ ಇಧ ವುತ್ತಾನಿ ಚತ್ತಾರಿ ಅವಸೇಸಂ ಲೋಹಂ. ಸಜ್ಝನ್ತಿ ರಜತಂ. ಚಿತ್ತಸ್ಸಾತಿ ಚಾತುಭೂಮಕಕುಸಲಚಿತ್ತಸ್ಸ. ತೇಭೂಮಕಸ್ಸ ತಾವ ಉಪಕ್ಕಿಲೇಸಾ ಹೋನ್ತು, ಲೋಕುತ್ತರಸ್ಸ ಕಥಂ ಹೋನ್ತೀತಿ? ಉಪ್ಪಜ್ಜಿತುಂ ಅಪ್ಪದಾನೇನ. ಯದಗ್ಗೇನ ಹಿ ಉಪ್ಪಜ್ಜಿತುಂ ನ ದೇನ್ತಿ, ತದಗ್ಗೇನೇವ ತೇ ಲೋಕಿಯಸ್ಸಪಿ ಲೋಕುತ್ತರಸ್ಸಪಿ ಉಪಕ್ಕಿಲೇಸಾ ನಾಮ ಹೋನ್ತಿ. ಪಭಙ್ಗು ಚಾತಿ ಆರಮ್ಮಣೇ ಚುಣ್ಣವಿಚುಣ್ಣಭಾವೂಪಗಮನೇನ ಭಿಜ್ಜನಸಭಾವಂ. ಸಮ್ಮಾ ಸಮಾಧಿಯತಿ ಆಸವಾನಂ ಖಯಾಯಾತಿ ಆಸವಾನಂ ಖಯಸಙ್ಖಾತಸ್ಸ ಅರಹತ್ತಸ್ಸ ಅತ್ಥಾಯ ಹೇತುನಾ ಕಾರಣೇನ ಸಮಾಧಿಯತಿ. ಏತ್ತಾವತಾ ಚಿತ್ತಂ ವಿಸೋಧೇತ್ವಾ ಅರಹತ್ತೇ ಪತಿಟ್ಠಿತಂ ಖೀಣಾಸವಂ ದಸ್ಸೇತಿ. ಇದಾನಿಸ್ಸ ಅಭಿಞ್ಞಾಪಟಿವೇಧಂ ದಸ್ಸೇನ್ತೋ ಯಸ್ಸ ಯಸ್ಸ ಚಾತಿಆದಿಮಾಹ. ತಂ ಉತ್ತಾನತ್ಥಮೇವಾತಿ.