೪-೭. ಪಾಣಾತಿಪಾತೀಸುತ್ತಾದಿವಣ್ಣನಾ

೨೧೪-೨೧೭. ಚತುತ್ಥಂ ಚತುನ್ನಂ ಕಮ್ಮಕಿಲೇಸಾನಂ ತಪ್ಪಟಿಪಕ್ಖಸ್ಸ ಚ ವಸೇನ ವುತ್ತಂ, ಪಞ್ಚಮಂ ಸುಕ್ಕಪಕ್ಖಾನಂ ಆದಿತೋ ಚತುನ್ನಂ ಮಿಚ್ಛತ್ತಾನಂ ವಸೇನ, ಛಟ್ಠಂ ಅವಸೇಸಾನಂ ಚತುನ್ನಂ, ಸತ್ತಮಂ ಅನರಿಯವೋಹಾರಅರಿಯವೋಹಾರಾನಂ. ತಥಾ ಅಟ್ಠಮನವಮದಸಮಾನಿ ಸಪ್ಪಟಿಪಕ್ಖಾನಂ ಅಸ್ಸದ್ಧಮ್ಮಾನಂ ವಸೇನ ವುತ್ತಾನಿ. ಸಬ್ಬಸುತ್ತೇಸು ಪನ ಸುಕ್ಕಪಕ್ಖಧಮ್ಮಾ ಲೋಕಿಯಲೋಕುತ್ತರಮಿಸ್ಸಕಾವ ಕಥಿತಾ. ನವಸು ಸುತ್ತೇಸು ಕಿಞ್ಚಾಪಿ ‘‘ಸಗ್ಗೇ’’ತಿ ವುತ್ತಂ, ತಯೋ ಪನ ಮಗ್ಗಾ ತೀಣಿ ಚ ಫಲಾನಿ ಲಬ್ಭನ್ತಿಯೇವಾತಿ.

ಪರಿಸಾವಗ್ಗೋ ದುತಿಯೋ.