೭. ರೋಗಸುತ್ತವಣ್ಣನಾ

೧೫೭. ಸತ್ತಮೇ ವಿಘಾತವಾತಿ ಮಹಿಚ್ಛಾಪಚ್ಚಯೇನ ವಿಘಾತೇನ ದುಕ್ಖೇನ ಸಮನ್ನಾಗತೋ. ಅಸನ್ತುಟ್ಠೋತಿ ಚತೂಸು ಪಚ್ಚಯೇಸು ತೀಹಿ ಸನ್ತೋಸೇಹಿ ಅಸನ್ತುಟ್ಠೋ. ಅನವಞ್ಞಪ್ಪಟಿಲಾಭಾಯಾತಿ ಪರೇಹಿ ಅನವಜಾನನಸ್ಸ ಪಟಿಲಾಭತ್ಥಾಯ. ಲಾಭಸಕ್ಕಾರಸಿಲೋಕಪ್ಪಟಿಲಾಭಾಯಾತಿ ಸುಸಙ್ಖತಚತುಪಚ್ಚಯಸಙ್ಖಾತಸ್ಸ ಲಾಭಸಕ್ಕಾರಸ್ಸ ಚೇವ ವಣ್ಣಭಣನಸಙ್ಖಾತಸ್ಸ ಸಿಲೋಕಸ್ಸ ಚ ಪಟಿಲಾಭತ್ಥಾಯ. ಸಙ್ಖಾಯ ಕುಲಾನಿ ಉಪಸಙ್ಕಮತೀತಿ ‘‘ಇತಿ ಮಂ ಏತೇ ಜಾನಿಸ್ಸನ್ತೀ’’ತಿ ಜಾನನತ್ಥಾಯ ಕುಲಾನಿ ಉಪಸಙ್ಕಮತಿ. ಸೇಸಪದೇಸುಪಿ ಏಸೇವ ನಯೋ.