೧೦. ಸುಗತವಿನಯಸುತ್ತವಣ್ಣನಾ

೧೬೦. ದಸಮೇ ದುಗ್ಗಹಿತನ್ತಿ ಉಪ್ಪಟಿಪಾಟಿಯಾ ಗಹಿತಂ. ಪರಿಯಾಪುಣನ್ತೀತಿ ವಳಞ್ಜೇನ್ತಿ ಕಥೇನ್ತಿ. ಪದಬ್ಯಞ್ಜನೇಹೀತಿ ಏತ್ಥ ಪದಮೇವ ಅತ್ಥಸ್ಸ ಬ್ಯಞ್ಜನತೋ ಬ್ಯಞ್ಜನನ್ತಿ ವುತ್ತಂ. ದುನ್ನಿಕ್ಖಿತ್ತಸ್ಸಾತಿ ದುಟ್ಠು ನಿಕ್ಖಿತ್ತಸ್ಸ ಉಪ್ಪಟಿಪಾಟಿಯಾ ಠಪಿತಸ್ಸ. ಅತ್ಥೋಪಿ ದುನ್ನಯೋ ಹೋತೀತಿ ಅಟ್ಠಕಥಾ ನೀಹರಿತ್ವಾ ಕಥೇತುಂ ನ ಸಕ್ಕಾ ಹೋತಿ. ಛಿನ್ನಮೂಲಕೋತಿ ಮೂಲಭೂತಾನಂ ಭಿಕ್ಖೂನಂ ಉಪಚ್ಛಿನ್ನತ್ತಾ ಛಿನ್ನಮೂಲಕೋ. ಅಪ್ಪಟಿಸರಣೋತಿ ಅಪ್ಪತಿಟ್ಠೋ. ಬಾಹುಲಿಕಾತಿ ಪಚ್ಚಯಬಾಹುಲ್ಲಾಯ ಪಟಿಪನ್ನಾ. ಸಾಥಲಿಕಾತಿ ತಿಸ್ಸೋ ಸಿಕ್ಖಾ ಸಿಥಿಲಗ್ಗಹಣೇನ ಗಣ್ಹನಕಾ. ಓಕ್ಕಮನೇ ಪುಬ್ಬಙ್ಗಮಾತಿ ಪಞ್ಚ ನೀವರಣಾನಿ ಅವಗಮನತೋ ಓಕ್ಕಮನನ್ತಿ ವುಚ್ಚನ್ತಿ, ತತ್ಥ ಪುಬ್ಬಙ್ಗಮಾತಿ ಅತ್ಥೋ. ಪವಿವೇಕೇತಿ ತಿವಿಧೇ ವಿವೇಕೇ. ನಿಕ್ಖಿತ್ತಧುರಾತಿ ನಿಬ್ಬೀರಿಯಾ. ಇಮಿನಾ ನಯೇನ ಪನ ಸಬ್ಬತ್ಥ ಅತ್ಥೋ ವೇದಿತಬ್ಬೋ.

ಇನ್ದ್ರಿಯವಗ್ಗೋ ಪಠಮೋ.