(೧೧) ೧. ವಲಾಹಕವಗ್ಗೋ

೧-೨. ವಲಾಹಕಸುತ್ತದ್ವಯವಣ್ಣನಾ

೧೦೧-೨. ತತಿಯಪಣ್ಣಾಸಕಸ್ಸ ಪಠಮೇ ವಲಾಹಕಾತಿ ಮೇಘಾ. ಭಾಸಿತಾ ಹೋತಿ ನೋ ಕತ್ತಾತಿ ‘‘ಇದಞ್ಚಿದಞ್ಚ ಕರಿಸ್ಸಾಮೀ’’ತಿ ಕೇವಲಂ ಭಾಸತಿಯೇವ, ನ ಕರೋತಿ. ಕತ್ತಾ ಹೋತಿ ನೋ ಭಾಸಿತಾತಿ ಅಕಥೇತ್ವಾವ ‘‘ಇದಞ್ಚಿದಞ್ಚ ಮಯಾ ಕಾತುಂ ವಟ್ಟತೀ’’ತಿ ಕತ್ತಾ ಹೋತಿ. ಏವಂ ಸಬ್ಬತ್ಥ ಅತ್ಥೋ ವೇದಿತಬ್ಬೋ. ದುತಿಯಂ ಉತ್ತಾನತ್ಥಮೇವ.

೩. ಕುಮ್ಭಸುತ್ತವಣ್ಣನಾ

೧೦೩. ತತಿಯೇ ಕುಮ್ಭಾತಿ ಘಟಾ. ತುಚ್ಛೋ ಪಿಹಿತೋತಿ ರಿತ್ತಕೋ ಪಿಹಿತಮುಖೋ. ಪೂರೋ ವಿವಟೋತಿ ಉದಕಪುಣ್ಣೋ ಅಪಾರುತಮುಖೋ. ಸೇಸದ್ವಯೇಪಿ ಏಸೇವ ನಯೋ.

೪. ಉದಕರಹದಸುತ್ತವಣ್ಣನಾ

೧೦೪. ಚತುತ್ಥೇ ಉತ್ತಾನೋ ಗಮ್ಭೀರೋಭಾಸೋತಿಆದೀಸು ಪುರಾಣಪಣ್ಣರಸಸಮ್ಭಿನ್ನವಣ್ಣೋ ಕಾಳಉದಕೋ ಗಮ್ಭೀರೋಭಾಸೋ ನಾಮ, ಅಚ್ಛವಿಪ್ಪಸನ್ನಮಣಿವಣ್ಣಉದಕೋ ಉತ್ತಾನೋಭಾಸೋ ನಾಮ.

೫-೬. ಅಮ್ಬಸುತ್ತವಣ್ಣನಾ

೧೦೫-೬. ಪಞ್ಚಮೇ ಆಮಂ ಪಕ್ಕವಣ್ಣೀತಿ ಆಮಕಂ ಹುತ್ವಾ ಓಲೋಕೇನ್ತಾನಂ ಪಕ್ಕಸದಿಸಂ ಖಾಯತಿ. ಏವಂ ಸಬ್ಬಪದಾನಿ ದಟ್ಠಬ್ಬಾನಿ. ಛಟ್ಠಂ ಉತ್ತಾನತ್ಥಮೇವ.

೭. ಮೂಸಿಕಸುತ್ತವಣ್ಣನಾ

೧೦೭. ಸತ್ತಮೇ ಯೋ ಆವಾಟಂ ಖಣತಿ, ನ ಚ ತತ್ಥ ವಸತಿ, ಸೋ ಗಾಧಂ ಕತ್ತಾ ನೋ ವಸಿತಾತಿ ವುಚ್ಚತಿ. ಖನ್ತಾತಿಪಿ ಪಾಠೋ. ಇಮಿನಾ ನಯೇನ ಸಬ್ಬಪದಾನಿ ವೇದಿತಬ್ಬಾನಿ.

೮. ಬಲೀಬದ್ದಸುತ್ತವಣ್ಣನಾ

೧೦೮. ಅಟ್ಠಮೇ ಯೋ ಅತ್ತನೋ ಗೋಗಣಂ ಮದ್ದತಿ, ನ ಪರಗೋಗಣಂ, ಅಯಂ ಸಗವಚಣ್ಡೋ ನೋ ಪರಗವಚಣ್ಡೋತಿ ಏವಂ ಸಬ್ಬಪದಾನಿ ವೇದಿತಬ್ಬಾನಿ. ಉಬ್ಬೇಜೇತಾ ಹೋತೀತಿ ಘಟ್ಟೇತ್ವಾ ವಿಜ್ಝಿತ್ವಾ ಉಬ್ಬೇಗಪತ್ತಂ ಕರೋತಿ.

೯. ರುಕ್ಖಸುತ್ತವಣ್ಣನಾ

೧೦೯. ನವಮೇ ಫೇಗ್ಗು ಫೇಗ್ಗುಪರಿವಾರೋತಿ ನಿಸ್ಸಾರೋ ಫೇಗ್ಗುರುಕ್ಖೋ ಫೇಗ್ಗುರುಕ್ಖೇಹೇವ ಪರಿವುತೋ. ಸಾರಪರಿವಾರೋತಿ ಖದಿರಾದೀಹಿ ಸಾರರುಕ್ಖೇಹೇವ ಪರಿವುತೋ. ಏಸ ನಯೋ ಸಬ್ಬತ್ಥ.

೧೦. ಆಸೀವಿಸಸುತ್ತವಣ್ಣನಾ

೧೧೦. ದಸಮೇ ಆಗತವಿಸೋ ನ ಘೋರವಿಸೋತಿ ಯಸ್ಸ ವಿಸಂ ಆಗಚ್ಛತಿ, ಘೋರಂ ಪನ ನ ಹೋತಿ, ಚಿರಕಾಲಂ ನ ಪೀಳೇತಿ. ಸೇಸಪದೇಸುಪಿ ಏಸೇವ ನಯೋತಿ.

ವಲಾಹಕವಗ್ಗೋ ಪಠಮೋ.