೭. ಖಿಪ್ಪನಿಸನ್ತಿಸುತ್ತವಣ್ಣನಾ

೯೭. ಸತ್ತಮೇ ಖಿಪ್ಪನಿಸನ್ತೀತಿ ಖಿಪ್ಪನಿಸಾಮನೋ ಸೀಘಂ ಜಾನಿತುಂ ಸಮತ್ಥೋ. ಸುತಾನಞ್ಚ ಧಮ್ಮಾನನ್ತಿ ಸುತಪ್ಪಗುಣಾನಂ ತನ್ತಿಧಮ್ಮಾನಂ. ಅತ್ಥೂಪಪರಿಕ್ಖೀತಿ ಅತ್ಥಂ ಉಪಪರಿಕ್ಖಕೋ. ಅತ್ಥಮಞ್ಞಾಯ ಧಮ್ಮಮಞ್ಞಾಯಾತಿ ಅಟ್ಠಕಥಞ್ಚ ಪಾಳಿಞ್ಚ ಜಾನಿತ್ವಾ. ಧಮ್ಮಾನುಧಮ್ಮಪ್ಪಟಿಪನ್ನೋ ಹೋತೀತಿ ನವಲೋಕುತ್ತರಧಮ್ಮಾನಂ ಅನುರೂಪಧಮ್ಮಭೂತಂ ಸಸೀಲಕಂ ಪುಬ್ಬಭಾಗಪ್ಪಟಿಪದಂ ಪಟಿಪನ್ನೋ ಹೋತಿ. ನೋ ಚ ಕಲ್ಯಾಣವಾಚೋತಿ ನ ಸುನ್ದರವಚನೋ. ನ ಕಲ್ಯಾಣವಾಕ್ಕರಣೋತಿ ನ ಸುನ್ದರವಚನಘೋಸೋ ಹೋತಿ. ಪೋರಿಯಾತಿಆದೀಹಿ ಸದ್ಧಿಂ ನೋ-ಕಾರೋ ಯೋಜೇತಬ್ಬೋಯೇವ. ಗುಣಪರಿಪುಣ್ಣಾಯ ಅಪಲಿಬುದ್ಧಾಯ ಅದೋಸಾಯ ಅಗಳಿತಪದಬ್ಯಞ್ಜನಾಯ ಅತ್ಥಂ ವಿಞ್ಞಾಪೇತುಂ ಸಮತ್ಥಾಯ ವಾಚಾಯ ಸಮನ್ನಾಗತೋ ನ ಹೋತೀತಿ ಅತ್ಥೋ. ಇಮಿನಾ ಉಪಾಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋ.