೭. ಅಹಿರಾಜಸುತ್ತವಣ್ಣನಾ

೬೭. ಸತ್ತಮೇ ಇಮಾನಿ ಚತ್ತಾರಿ ಅಹಿರಾಜಕುಲಾನೀತಿ ಇದಂ ದಟ್ಠವಿಸಾನೇವ ಸನ್ಧಾಯ ವುತ್ತಂ. ಯೇ ಹಿ ಕೇಚಿ ದಟ್ಠವಿಸಾ, ಸಬ್ಬೇತೇ ಇಮೇಸಂ ಚತುನ್ನಂ ಅಹಿರಾಜಕುಲಾನಂ ಅಬ್ಭನ್ತರಗತಾವ ಹೋನ್ತಿ. ಅತ್ತಗುತ್ತಿಯಾತಿ ಅತ್ತನೋ ಗುತ್ತತ್ಥಾಯ. ಅತ್ತರಕ್ಖಾಯಾತಿ ಅತ್ತನೋ ರಕ್ಖಣತ್ಥಾಯ. ಅತ್ತಪರಿತ್ತಾಯಾತಿ ಅತ್ತನೋ ಪರಿತ್ತಾಣತ್ಥಾಯ. ಪರಿತ್ತಂ ನಾಮ ಅನುಜಾನಾಮೀತಿ ಅತ್ಥೋ.

ಇದಾನಿ ಯಥಾ ತಂ ಪರಿತ್ತಂ ಕಾತಬ್ಬಂ, ತಂ ದಸ್ಸೇನ್ತೋ ವಿರೂಪಕ್ಖೇಹಿ ಮೇತಿಆದಿಮಾಹ. ತತ್ಥ ವಿರೂಪಕ್ಖೇಹೀತಿ ವಿರೂಪಕ್ಖನಾಗಕುಲೇಹಿ. ಸೇಸೇಸುಪಿ ಏಸೇವ ನಯೋ. ಅಪಾದಕೇಹೀತಿ ಅಪಾದಕಸತ್ತೇಹಿ. ಸೇಸೇಸುಪಿ ಏಸೇವ ನಯೋ. ಸಬ್ಬೇ ಸತ್ತಾತಿ ಇತೋ ಪುಬ್ಬೇ ಏತ್ತಕೇನ ಠಾನೇನ ಓದಿಸ್ಸಕಮೇತ್ತಂ ಕಥೇತ್ವಾ ಇದಾನಿ ಅನೋದಿಸ್ಸಕಮೇತ್ತಂ ಕಥೇತುಂ ಇದಮಾರದ್ಧಂ. ತತ್ಥ ಸತ್ತಾ ಪಾಣಾ ಭೂತಾತಿ ಸಬ್ಬಾನೇತಾನಿ ಪುಗ್ಗಲವೇವಚನಾನೇವ. ಭದ್ರಾನಿ ಪಸ್ಸನ್ತೂತಿ ಭದ್ರಾನಿ ಆರಮ್ಮಣಾನಿ ಪಸ್ಸನ್ತು. ಮಾ ಕಞ್ಚಿ ಪಾಪಮಾಗಮಾತಿ ಕಞ್ಚಿ ಸತ್ತಂ ಪಾಪಕಂ ಲಾಮಕಂ ಮಾ ಆಗಚ್ಛತು. ಅಪ್ಪಮಾಣೋ ಬುದ್ಧೋತಿ ಏತ್ಥ ಬುದ್ಧೋತಿ ಬುದ್ಧಗುಣಾ ವೇದಿತಬ್ಬಾ. ತೇ ಹಿ ಅಪ್ಪಮಾಣಾ ನಾಮ. ಸೇಸಪದದ್ವಯೇಪಿ ಏಸೇವ ನಯೋ. ಪಮಾಣವನ್ತಾನೀತಿ ಗುಣಪ್ಪಮಾಣೇನ ಯುತ್ತಾನಿ. ಉಣ್ಣನಾಭೀತಿ ಲೋಮಸನಾಭಿಕೋ ಮಕ್ಕಟಕೋ. ಸರಬೂತಿ ಘರಗೋಲಿಕಾ. ಕತಾ ಮೇ ರಕ್ಖಾ, ಕತಾ ಮೇ ಪರಿತ್ತಾತಿ ಮಯಾ ಏತ್ತಕಸ್ಸ ಜನಸ್ಸ ರಕ್ಖಾ ಚ ಪರಿತ್ತಾಣಞ್ಚ ಕತಂ. ಪಟಿಕ್ಕಮನ್ತು ಭೂತಾನೀತಿ ಸಬ್ಬೇಪಿ ಮೇ ಕತಪರಿತ್ತಾಣಾ ಸತ್ತಾ ಅಪಗಚ್ಛನ್ತು, ಮಾ ಮಂ ವಿಹೇಠಯಿಂಸೂತಿ ಅತ್ಥೋ.