೫-೬. ಸಮಜೀವೀಸುತ್ತದ್ವಯವಣ್ಣನಾ

೫೫-೫೬. ಪಞ್ಚಮೇ ತೇನುಪಸಙ್ಕಮೀತಿ ಕಿಮತ್ಥಂ ಉಪಸಙ್ಕಮಿ? ಅನುಗ್ಗಣ್ಹನತ್ಥಂ. ತಥಾಗತೋ ಹಿ ತಂ ರಟ್ಠಂ ಪಾಪುಣನ್ತೋ ಇಮೇಸಂಯೇವ ದ್ವಿನ್ನಂ ಸಙ್ಗಣ್ಹನತ್ಥಾಯ ಪಾಪುಣಾತಿ. ನಕುಲಪಿತಾ ಕಿರ ಪಞ್ಚ ಜಾತಿಸತಾನಿ ತಥಾಗತಸ್ಸ ಪಿತಾ ಅಹೋಸಿ, ಪಞ್ಚ ಜಾತಿಸತಾನಿ ಮಹಾಪಿತಾ, ಪಞ್ಚ ಜಾತಿಸತಾನಿ ಚೂಳಪಿತಾ. ನಕುಲಮಾತಾಪಿ ಪಞ್ಚ ಜಾತಿಸತಾನಿ ತಥಾಗತಸ್ಸ ಮಾತಾ ಅಹೋಸಿ, ಪಞ್ಚ ಜಾತಿಸತಾನಿ ಮಹಾಮಾತಾ, ಪಞ್ಚ ಜಾತಿಸತಾನಿ ಚೂಳಮಾತಾ. ತೇ ಸತ್ಥು ದಿಟ್ಠಕಾಲತೋ ಪಟ್ಠಾಯ ಪುತ್ತಸಿನೇಹಂ ಪಟಿಲಭಿತ್ವಾ ‘‘ಹನ್ತಾತ, ಹನ್ತಾತಾ’’ತಿ ವಚ್ಛಕಂ ದಿಸ್ವಾ ವಚ್ಛಗಿದ್ಧಿನೀ ಗಾವೀ ವಿಯ ವಿರವಮಾನಾ ಉಪಸಙ್ಕಮಿತ್ವಾ ಪಠಮದಸ್ಸನೇನೇವ ಸೋತಾಪನ್ನಾ ಜಾತಾ. ನಿವೇಸನೇ ಪಞ್ಚಸತಾನಂ ಭಿಕ್ಖೂನಂ ಆಸನಾನಿ ಸದಾ ಪಞ್ಞತ್ತಾನೇವ ಹೋನ್ತಿ. ಇತಿ ಭಗವಾ ತೇಸಂ ಅನುಗ್ಗಣ್ಹನತ್ಥಾಯ ಉಪಸಙ್ಕಮಿ. ಅತಿಚರಿತಾತಿ ಅತಿಕ್ಕಮಿತಾ. ಅಭಿಸಮ್ಪರಾಯಞ್ಚಾತಿ ಪರಲೋಕೇ ಚ. ಸಮಸದ್ಧಾತಿ ಸದ್ಧಾಯ ಸಮಾ ಏಕಸದಿಸಾ. ಸೀಲಾದೀಸುಪಿ ಏಸೇವ ನಯೋ. ಛಟ್ಠಂ ಕೇವಲಂ ಭಿಕ್ಖೂನಂ ದೇಸಿತಂ. ಸೇಸಮೇತ್ಥ ತಾದಿಸಮೇವ.