೨. ಪಞ್ಹಬ್ಯಾಕರಣಸುತ್ತವಣ್ಣನಾ

೪೨. ದುತಿಯೇ ಯೋ ಚ ತೇಸಂ ತತ್ಥ ತತ್ಥ, ಜಾನಾತಿ ಅನುಧಮ್ಮತನ್ತಿ ಯೋ ಏತೇಸಂ ಪಞ್ಹಾನಂ ತಸ್ಮಿಂ ತಸ್ಮಿಂ ಠಾನೇ ಬ್ಯಾಕರಣಂ ಜಾನಾತಿ. ಚತುಪಞ್ಹಸ್ಸ ಕುಸಲೋ, ಆಹು ಭಿಕ್ಖುಂ ತಥಾವಿಧನ್ತಿ ತಥಾವಿಧಂ ಭಿಕ್ಖುಂ ತೇಸು ಚತೂಸು ಪಞ್ಹೇಸು ಕುಸಲೋತಿ ಏವಂ ವದನ್ತಿ. ದುರಾಸದೋ ದುಪ್ಪಸಹೋತಿ ಪರೇಹಿ ಘಟ್ಟೇತುಂ ವಾ ಅಭಿಭವಿತುಂ ವಾ ನ ಸಕ್ಕಾ. ಗಮ್ಭೀರೋತಿ ಸತ್ತಸೀದನ್ತರಮಹಾಸಮುದ್ದೋ ವಿಯ ಗಮ್ಭೀರೋ. ದುಪ್ಪಧಂಸಿಯೋತಿ ದುಮ್ಮೋಚಾಪಯೋ, ಗಹಿತಗ್ಗಹಣಂ ವಿಸ್ಸಜ್ಜಾಪೇತುಂ ನ ಸಕ್ಕಾತಿ ಅತ್ಥೋ. ಅತ್ಥೇ ಅನತ್ಥೇ ಚಾತಿ ವಡ್ಢಿಯಞ್ಚ ಅವಡ್ಢಿಯಞ್ಚ. ಅತ್ಥಾಭಿಸಮಯಾತಿ ಅತ್ಥಸಮಾಗಮೇನ. ಧೀರೋ ಪಣ್ಡಿತೋತಿ ಪವುಚ್ಚತೀತಿ ಧಿತಿಸಮ್ಪನ್ನೋ ಪುಗ್ಗಲೋ ‘‘ಪಣ್ಡಿತೋ ಅಯ’’ನ್ತಿ ಏವಂ ಪವುಚ್ಚತಿ.