೬. ಕುಹಸುತ್ತವಣ್ಣನಾ

೨೬. ಛಟ್ಠೇ ಕುಹಾತಿ ಕುಹಕಾ. ಥದ್ಧಾತಿ ಕೋಧೇನ ಚ ಮಾನೇನ ಚ ಥದ್ಧಾ. ಲಪಾತಿ ಉಪಲಾಪಕಾ. ಸಿಙ್ಗೀತಿ ‘‘ತತ್ಥ ಕತಮಂ ಸಿಙ್ಗಂ, ಯಂ ಸಿಙ್ಗಂ ಸಿಙ್ಗಾರತಾ ಚಾತುರತಾ ಚಾತುರಿಯಂ ಪರಿಕ್ಖತ್ತತಾ ಪಾರಿಕ್ಖತ್ತಿಯ’’ನ್ತಿ (ವಿಭ. ೮೫೨) ಏವಂ ವುತ್ತೇಹಿ ಸಿಙ್ಗಸದಿಸೇಹಿ ಪಾಕಟಕಿಲೇಸೇಹಿ ಸಮನ್ನಾಗತಾ. ಉನ್ನಳಾತಿ ಉಗ್ಗತನಳಾ ತುಚ್ಛಮಾನಂ ಉಕ್ಖಿಪಿತ್ವಾ ಠಿತಾ. ಅಸಮಾಹಿತಾತಿ ಚಿತ್ತೇಕಗ್ಗಮತ್ತಸ್ಸಾಪಿ ಅಲಾಭಿನೋ. ನ ಮೇ ತೇ, ಭಿಕ್ಖವೇ, ಭಿಕ್ಖೂ ಮಾಮಕಾತಿ ತೇ ಮಯ್ಹಂ ಭಿಕ್ಖೂ ಮಮ ಸನ್ತಕಾ ನ ಹೋನ್ತಿ. ‘‘ತೇ ಮಯ್ಹ’’ನ್ತಿ ಇದಂ ಪನ ಸತ್ಥಾರಂ ಉದ್ದಿಸ್ಸ ಪಬ್ಬಜಿತತ್ತಾ ವುತ್ತಂ. ತೇ ಖೋ ಮೇ, ಭಿಕ್ಖವೇ, ಭಿಕ್ಖೂ ಮಾಮಕಾತಿ ಇಧಾಪಿ ಮೇತಿ ಅತ್ತಾನಂ ಉದ್ದಿಸ್ಸ ಪಬ್ಬಜಿತತ್ತಾ ವದತಿ, ಸಮ್ಮಾಪಟಿಪನ್ನತ್ತಾ ಪನ ‘‘ಮಾಮಕಾ’’ತಿ ಆಹ. ವುದ್ಧಿಂ ವಿರೂಳ್ಹಿಂ ವೇಪುಲ್ಲಂ ಆಪಜ್ಜನ್ತೀತಿ ಸೀಲಾದೀಹಿ ಗುಣೇಹಿ ವಡ್ಢನತೋ ವುದ್ಧಿಂ, ನಿಚ್ಚಲಭಾವೇನ ವಿರೂಳ್ಹಿಂ, ಸಬ್ಬತ್ಥ ಪತ್ಥಟತಾಯ ವೇಪುಲ್ಲಂ ಪಾಪುಣನ್ತಿ. ತೇ ಪನೇತೇ ಯಾವ ಅರಹತ್ತಮಗ್ಗಾ ವಿರುಹನ್ತಿ, ಅರಹತ್ತಫಲಂ ಪತ್ತೇ ವಿರೂಳ್ಹಾ ನಾಮ ಹೋನ್ತಿ. ಇತಿ ಇಮಸ್ಮಿಂ ಸುತ್ತೇಪಿ ಗಾಥಾಸುಪಿ ವಟ್ಟವಿವಟ್ಟಮೇವ ಕಥಿತಂ.