೬. ಸೋಖುಮ್ಮಸುತ್ತವಣ್ಣನಾ

೧೬. ಛಟ್ಠೇ ಸೋಖುಮ್ಮಾನೀತಿ ಸುಖುಮಲಕ್ಖಣಪಟಿವಿಜ್ಝನಕಾನಿ ಞಾಣಾನಿ. ರೂಪಸೋಖುಮ್ಮೇನ ಸಮನ್ನಾಗತೋ ಹೋತೀತಿ ರೂಪೇ ಸಣ್ಹಸುಖುಮಲಕ್ಖಣಪರಿಗ್ಗಾಹಕೇನ ಞಾಣೇನ ಸಮನ್ನಾಗತೋ ಹೋತಿ. ಪರಮೇನಾತಿ ಉತ್ತಮೇನ. ತೇನ ಚ ರೂಪಸೋಖುಮ್ಮೇನಾತಿ ತೇನ ಯಾವ ಅನುಲೋಮಭಾವಂ ಪತ್ತೇನ ಸುಖುಮಲಕ್ಖಣಪರಿಗ್ಗಾಹಕಞಾಣೇನ. ನ ಸಮನುಪಸ್ಸತೀತಿ ನತ್ಥಿಭಾವೇನೇವ ನ ಪಸ್ಸತಿ. ನ ಪತ್ಥೇತೀತಿ ನತ್ಥಿಭಾವೇನೇವ ನ ಪತ್ಥೇತಿ. ವೇದನಾಸೋಖುಮ್ಮಾದೀಸುಪಿ ಏಸೇವ ನಯೋ.

ರೂಪಸೋಖುಮ್ಮತಂ ಞತ್ವಾತಿ ರೂಪಕ್ಖನ್ಧಸ್ಸ ಸಣ್ಹಸುಖುಮಲಕ್ಖಣಪರಿಗ್ಗಾಹಕೇನ ಞಾಣೇನ ಸುಖುಮತಂ ಜಾನಿತ್ವಾ. ವೇದನಾನಞ್ಚ ಸಮ್ಭವನ್ತಿ ವೇದನಾಕ್ಖನ್ಧಸ್ಸ ಚ ಪಭವಂ ಜಾನಿತ್ವಾ. ಸಞ್ಞಾ ಯತೋ ಸಮುದೇತೀತಿ ಯಸ್ಮಾ ಕಾರಣಾ ಸಞ್ಞಾಕ್ಖನ್ಧೋ ಸಮುದೇತಿ ನಿಬ್ಬತ್ತತಿ, ತಞ್ಚ ಜಾನಿತ್ವಾ. ಅತ್ಥಂ ಗಚ್ಛತಿ ಯತ್ಥ ಚಾತಿ ಯಸ್ಮಿಂ ಠಾನೇ ನಿರುಜ್ಝತಿ, ತಞ್ಚ ಜಾನಿತ್ವಾ. ಸಙ್ಖಾರೇ ಪರತೋ ಞತ್ವಾತಿ ಸಙ್ಖಾರಕ್ಖನ್ಧಂ ಅನಿಚ್ಚತಾಯ ಲುಜ್ಜನಭಾವೇನ ಪರತೋ ಜಾನಿತ್ವಾ. ಇಮಿನಾ ಹಿ ಪದೇನ ಅನಿಚ್ಚಾನುಪಸ್ಸನಾ ಕಥಿತಾ. ದುಕ್ಖತೋ ನೋ ಚ ಅತ್ತತೋತಿ ಇಮಿನಾ ದುಕ್ಖಾನತ್ತಾನುಪಸ್ಸನಾ. ಸನ್ತೋತಿ ಕಿಲೇಸಸನ್ತತಾಯ ಸನ್ತೋ. ಸನ್ತಿಪದೇ ರತೋತಿ ನಿಬ್ಬಾನೇ ರತೋ. ಇತಿ ಸುತ್ತನ್ತೇ ಚತೂಸು ಠಾನೇಸು ವಿಪಸ್ಸನಾವ ಕಥಿತಾ, ಗಾಥಾಸು ಲೋಕುತ್ತರಧಮ್ಮೋಪೀತಿ.