೧. ಚರಸುತ್ತವಣ್ಣನಾ

೧೧. ದುತಿಯಸ್ಸ ಪಠಮೇ ಅಧಿವಾಸೇತೀತಿ ಚಿತ್ತಂ ಅಧಿರೋಪೇತ್ವಾ ವಾಸೇತಿ. ನಪ್ಪಜಹತೀತಿ ನ ಪರಿಚ್ಚಜತಿ. ನ ವಿನೋದೇತೀತಿ ನ ನೀಹರತಿ. ನ ಬ್ಯನ್ತೀಕರೋತೀತಿ ನ ವಿಗತನ್ತಂ ಪರಿಚ್ಛಿನ್ನಪರಿವಟುಮಂ ಕರೋತಿ. ನ ಅನಭಾವಂ ಗಮೇತೀತಿ ನ ಅನುಅಭಾವಂ ಅವಡ್ಢಿಂ ವಿನಾಸಂ ಗಮೇತಿ. ಚರಮ್ಪೀತಿ ಚರನ್ತೋಪಿ. ಅನಾತಾಪೀತಿ ನಿಬ್ಬೀರಿಯೋ. ಅನೋತ್ತಾಪೀತಿ ಉಪವಾದಭಯರಹಿತೋ. ಸತತನ್ತಿ ನಿಚ್ಚಂ. ಸಮಿತನ್ತಿ ನಿರನ್ತರಂ. ಏವಂ ಸಬ್ಬತ್ಥ ಅತ್ಥಂ ಞತ್ವಾ ಸುಕ್ಕಪಕ್ಖೇ ವುತ್ತವಿಪರಿಯಾಯೇನ ಅತ್ಥೋ ವೇದಿತಬ್ಬೋ.

ಗಾಥಾಸು ಗೇಹನಿಸ್ಸಿತನ್ತಿ ಕಿಲೇಸನಿಸ್ಸಿತಂ. ಮೋಹನೇಯ್ಯೇಸೂತಿ ಮೋಹಜನಕೇಸು ಆರಮ್ಮಣೇಸು. ಅಭಬ್ಬೋತಿ ಅಭಾಜನಭೂತೋ. ಫುಟ್ಠುಂ ಸಮ್ಬೋಧಿಮುತ್ತಮನ್ತಿ ಅರಹತ್ತಮಗ್ಗಸಙ್ಖಾತಂ ಉತ್ತಮಞಾಣಂ ಫುಸಿತುಂ.