೧೦. ಪುಬ್ಬಣ್ಹಸುತ್ತವಣ್ಣನಾ

೧೫೬. ದಸಮೇ ಸುನಕ್ಖತ್ತನ್ತಿಆದೀಸು ಯಸ್ಮಿಂ ದಿವಸೇ ತಯೋ ಸುಚರಿತಧಮ್ಮಾ ಪೂರಿತಾ ಹೋನ್ತಿ, ಸೋ ದಿವಸೋ ಲದ್ಧನಕ್ಖತ್ತಯೋಗೋ ನಾಮ, ತೇನಸ್ಸ ಸದಾ ಸುನಕ್ಖತ್ತಂ ನಾಮ ಹೋತೀತಿ ವುಚ್ಚತಿ. ಸ್ವೇವ ದಿವಸೋ ಕತಮಙ್ಗಲೋ ನಾಮ ಹೋತಿ, ತೇನಸ್ಸ ಸದಾ ಸುಮಙ್ಗಲನ್ತಿ ವುಚ್ಚತಿ. ಪಭಾತಮ್ಪಿಸ್ಸ ಸದಾ ಸುಪ್ಪಭಾತಮೇವ, ಸಯನತೋ ಉಟ್ಠಾನಮ್ಪಿ ಸುಹುಟ್ಠಿತಮೇವ, ಖಣೋಪಿ ಸುಕ್ಖಣೋವ, ಮುಹುತ್ತೋಪಿ ಸುಮುಹುತ್ತೋವ. ಏತ್ಥ ಚ ದಸಚ್ಛರಪಮಾಣೋ ಕಾಲೋ ಖಣೋ ನಾಮ, ತೇನ ಖಣೇನ ದಸಕ್ಖಣೋ ಕಾಲೋ ಲಯೋ ನಾಮ, ತೇನ ಲಯೇನ ಚ ದಸಲಯೋ ಕಾಲೋ ಖಣಲಯೋ ನಾಮ, ತೇನ ದಸಗುಣೋ ಮುಹುತ್ತೋ ನಾಮ, ತೇನ ದಸಗುಣೋ ಖಣಮುಹುತ್ತೋ ನಾಮಾತಿ ಅಯಂ ವಿಭಾಗೋ ವೇದಿತಬ್ಬೋ. ಸುಯಿಟ್ಠಂ ಬ್ರಹ್ಮಚಾರಿಸೂತಿ ಯಸ್ಮಿಂ ದಿವಸೇ ತೀಣಿ ಸುಚರಿತಾನಿ ಪೂರಿತಾನಿ, ತದಾಸ್ಸ ಸೇಟ್ಠಚಾರೀಸು ದಿನ್ನದಾನಂ ಸುಯಿಟ್ಠಂ ನಾಮ ಹೋತಿ. ಪದಕ್ಖಿಣಂ ಕಾಯಕಮ್ಮನ್ತಿ ತಂ ದಿವಸಂ ತೇನ ಕತಂ ಕಾಯಕಮ್ಮಂ ವಡ್ಢಿಕಾಯಕಮ್ಮಂ ನಾಮ ಹೋತಿ. ಸೇಸಪದೇಸುಪಿ ಏಸೇವ ನಯೋ. ಪದಕ್ಖಿಣಾನಿ ಕತ್ವಾನಾತಿ ವಡ್ಢಿಯುತ್ತಾನಿ ಕಾಯಕಮ್ಮಾದೀನಿ ಕತ್ವಾ. ಲಭನ್ತತ್ಥೇ ಪದಕ್ಖಿಣೇತಿ ಪದಕ್ಖಿಣೇ ವಡ್ಢಿಅತ್ಥೇಯೇವ ಲಭತಿ. ಸೇಸಂ ಉತ್ತಾನಮೇವಾತಿ.

ಮಙ್ಗಲವಗ್ಗೋ ಪಞ್ಚಮೋ.