೧. ಆಪಾಯಿಕಸುತ್ತವಣ್ಣನಾ

೧೧೪. ದುತಿಯಸ್ಸ ಪಠಮೇ ಅಪಾಯಂ ಗಚ್ಛಿಸ್ಸನ್ತೀತಿ ಆಪಾಯಿಕಾ. ನಿರಯಂ ಗಚ್ಛಿಸ್ಸನ್ತೀತಿ ನೇರಯಿಕಾ. ಇದಮಪ್ಪಹಾಯಾತಿ ಇದಂ ಬ್ರಹ್ಮಚಾರಿಪಟಿಞ್ಞತಾದಿಂ ಪಾಪಧಮ್ಮತ್ತಯಂ ಅವಿಜಹಿತ್ವಾ. ಬ್ರಹ್ಮಚಾರಿಪಟಿಞ್ಞೋತಿ ಬ್ರಹ್ಮಚಾರಿಪಟಿರೂಪಕೋ, ತೇಸಂ ವಾ ಆಕಪ್ಪಂ ಅವಿಜಹನೇನ ‘‘ಅಹಮ್ಪಿ ಬ್ರಹ್ಮಚಾರೀ’’ತಿ ಏವಂಪಟಿಞ್ಞೋ. ಅನುದ್ಧಂಸೇತೀತಿ ಅಕ್ಕೋಸತಿ ಪರಿಭಾಸತಿ ಚೋದೇತಿ. ನತ್ಥಿ ಕಾಮೇಸು ದೋಸೋತಿ ಕಿಲೇಸಕಾಮೇನ ವತ್ಥುಕಾಮೇ ಸೇವನ್ತಸ್ಸ ನತ್ಥಿ ದೋಸೋ. ಪಾತಬ್ಯತನ್ತಿ ಪಿವಿತಬ್ಬತಂ ಪರಿಭುಞ್ಜಿತಬ್ಬತಂ ನಿರಾಸಙ್ಕೇನ ಚಿತ್ತೇನ ಪಿಪಾಸಿತಸ್ಸ ಪಾನೀಯಪಿವನಸದಿಸಂ ಪರಿಭುಞ್ಜಿತಬ್ಬತಂ. ಇಮಸ್ಮಿಂ ಸುತ್ತೇ ವಟ್ಟಮೇವ ಕಥಿತಂ.